AZƏRBAYCAN NEFTİ MAYIN 28-DƏ CEYHAN LİMANINA ÇATMIŞDIR
Azərbaycan nefti mayın 28-də Türkiyənin Ceyhan limanına çatmışdır. Bu, Azərbaycanın dövlət müstəqilliyinin qorunması və mökəmləndirilməsində müstəsna xidmətləri olan ulu öndər Heydər Əliyevin neft strategiyasının Prezident İlham Əliyev tərəfindən uğurla həyata keçirilməsinin daha bir təntənəsidir.
Hazırda Ceyhan limanında Azərbaycan neftinin dünya bazarına çıxarılması üçün geniş hazırlıq işləri görülür. Burada ilk tankerə 600 min barrel neft yüklənəcəkdir.
Neftin Ceyhan limanına çatması ilə əlaqədar keçiriləcək təntənəli mərasimdə Azərbaycan, Gürcüstan, Türkiyə, Qazaxıstan prezidentləri, habelə layihənin həyata keçirilməsində iştirak edən şirkətlərin mənsub olduqları ölkələrin hökumət nümayəndələri iştirak edəcəklər.
Tikintisi dörd milyard ABŞ dollarına başa gələn kəmərlə gündə bir milyon barrel neft nəql olunacaqdır. Kəmərin istismarından Azərbaycan, Gürcüstan və Türkiyənin büdcəsinə milyonlarla dollar gəlir gələcəkdir. Türkiyə mətbuatının yazdığına görə, təkcə bu ölkənin kəmərin istismarından əldə edəcəyi illik gəlir 300 milyon dolları ötəcəkdir.
Bölmənin digər xəbərləri
