AZƏRBAYCAN NÜMAYƏNDƏ HEYƏTİNİN ƏFQANISTANA SƏFƏRİ BAŞA ÇATMIŞDIR
Azərbaycanın Əfqanıstandakı müvəqqəti işlər vəkili İbrahim Qafarov AZƏRTAC-a bildirmişdir ki, səfərin son günü - avqustun 28-də Azərbaycan nümayəndə heyətinin başçısı, xarici işlər nazirinin müavini Araz Əzimov Əfqanıstan parlamentinin sədri Yunus Qanuni ilə görüşmüşdür.
Əfqanıstana Azərbaycan Prezidenti İlham Əliyevin tapşırığı ilə səfər etdiyini bildirən A.Əzimov, Milli Məclis sədrinin salamlarını Y.Qanuniyə çatdırmışdır. Səfər çərçivəsində bu ölkənin xarici işlər, daxili işlər, müdafiə, səhiyyə, mədən və sənaye, iqtisadiyyat nazirləri ilə çox səmərəli görüşlər keçirdiyini vurğulayan A.Əzimov, dost Əfqanıstanın iqtisadiyyatının inkişaf etdirilməsi, hökumətin üzləşdiyi bəzi problemlərin həlli və qardaş əfqan xalqının rifahının yaxşılaşdırılması üçün Azərbaycanın da digər donor ölkələr kimi töhfə vermək niyyətini diqqətə çatdırmışdır. Sülhməramlı qüvvələrin tərkibində Azərbaycan əsgərlərinin də olduğunu qeyd edən A.Əzimov, ölkələrimizin mövcud potensialının bir çox sahələrdə əməkdaşlığı genişləndirməyə imkan verdiyini, siyasi səhnədə biri-birimizə göstərdiyimiz dəstəyin iqtisadi sahələri də əhatə etməsinin vacibliyini bildirmişdir.
Azərbaycan nümayəndə heyətinin Əfqanıstana səfərini yüksək qiymətləndirən Y.Qanuni, ölkələrimiz arasında əlaqələrin qədim tarixi olduğunu vurğulamış, siyasi, iqtisadi, mədəni və elm sahələrində əməkdaşlığın genişləndirməsinin vacibliyini bildirmişdir. Azərbaycan sülhməramlılarının məhdud sayda olması fikrini qəbul etməyən parlament sədri 45 azərbaycanlı əsgərin Əfqanıstan hökuməti və xalqının gözündə əsgərlərinin sayı dörd min beş yüzdən çox olan ölkələrdən daha yuxarıda durduğunu, əfqan xalqının onlara minnətdar olduğunu bildirmişdir.
Y.Qanuni ölkələrimiz arasında mövcud dostluq münasibətlərinin parlamentlər səviyyəsində də davam etdirilməsini arzulamış, yaxın zamanda Azərbaycana səfər edəcəyini bildirmişdir.
Əfqanıstanın hökumət rəsmiləri ilə görüşlər keçirən Azərbaycan nümayəndə heyətinin başçısı A.Əzimov, həmçinin səfər çərçivəsində NATO-nun Əfqanıstandakı mülki nümayəndəsi səfir Fernando Centelini, ABŞ səfiri Uilliyam B. Vud, İSAF-ın komandanı general David Mak Kiernan və Kabul bölgə komandanı general Mişel Stollsteiner ilə də görüşlər keçirmiş, Əfqanıstanda və regionda baş verən proseslər barədə fikir mübadiləsi aparmış, Əfqanıstan iqtisadiyyatının yenidən bərpa olunması, xalqın yaşayış səviyyəsinin yaxşılaşdırılması, dinc həyata qayıtması, regionda sülh və əmin-amanlığın bərqərar olması sahəsində ABŞ-ın və Qərb ölkələrinin həyata keçirdiyi layihələrlə maraqlanmışdır.
Xarici işlər nazirinin müavini A.Əzimovun keçirdiyi görüşlərdə səfir Eynulla Mədətli və nümayəndə heyətinin üzvləri iştirak etmişlər.
Azərbaycan nümayəndə heyətinin Əfqanıstana səfəri avqustun 28-də başa çatmışdır.
Bölmənin digər xəbərləri
