AZƏRBAYCAN NÜMAYƏNDƏ HEYƏTİNİN MOSKVA SƏFƏRİ SƏMƏRƏLİ OLMUŞDUR
DSMF-dən AZƏRTAC-a bildirmişlər ki, Beynəlxalq Sosial Təminat Assosiasiyasının (BSTA), Beynəlxalq Pensiya və Sosial Fondlar Assosiasiyasının (BPSFA), habelə MDB-nin və bir sıra Avropa dövlətlərinin sosial sığorta və pensiya fondları rəhbərlərinin dəvət olunduqları mərasimdə Rusiya Federasiyası Pensiya Fondunun İdarə heyətinin sədri Gennadi Batanov rəhbərlik etdiyi qurumun tarixi, fəaliyyəti, pensiya islahatı istiqamətində həyata keçirilən tədbirlər və iş təcrübəsi barədə ətraflı məlumat vermişdir.
Azərbaycan nümayəndə heyətinin başçısı səfər çərçivəsində BSTA-nın baş katibi vəzifəsini icra edən A.Bonilla, Almaniya İşləyənlərin Sosial Sığorta Fondunun direktoru A.Mörev, Ukrayna Pensiya Fondu İdarə heyətinin sədri B.Zayçuk, Gürcüstan Vahid Dövlət Sosial Sığorta Fondunun sədri Z.Sopromadze və digərləri ilə keçirdiyi görüşlərdə Azərbaycan iqtisadiyyatının sürətli inkişafı, uğurlu sosial siyasətin həyata keçirilməsi, yeni sığorta-pensiya sisteminin qurulması və s. barədə ətraflı məlumat vermişdir.
Sosial sığorta və pensiya fondlarının rəhbərlərinin Moskva görüşü zamanı “Qloballaşma şəraitində əmək miqrantlarının sosial müdafiəsinə dair BSTA və BPSFA-nın bəyannaməsi” imzalanmışdır.
Sənəd respublikamızın MDB-nin üzvü olan digər ölkələrlə və Avropa dövlətləri ilə bu sahədə sazişlər imzalamasında əhəmiyyətli rol oynayacaqdır ki, bu da hazırda müvəqqəti olaraq digər dövlətlərin ərazisində işləyən Azərbaycan vətəndaşlarının gələcək pensiya təminatına şərait yaradacaqdır.
