AZƏRBAYCAN NÜMAYƏNDƏLƏRİ ÜMUMDÜNYA POÇT İTTİFAQININ SESSİYASINDA İŞTİRAK ETMİŞLƏR
AZƏRTAC-ın xəbər verdiyi kimi yanvarın 17-dən 28-dək İsveçrənin Bern şəhərində Ümumdünya Poçt İttifaqının (ÜPİ) Poçt İstismarı Şurasının sessiyası, İnzibati Şuranın qrup və komissiya iclasları olmuşdur. Azərbaycanı bu tədbirdə Rabitə və İnformasiya Texnologiyaları Nazirliyinin poçt şöbəsinin baş məsləhətçisi Nasir Həmidov və Azərpoçt Dövlət Müəssisəsinin baş direktorunun müavini Sübhan Kazımov təmsil etmişlər.
Azərbaycan nümayəndə heyətinin üzvləri ÜPİ-nin Beynəlxalq Bürosunun təzəcə seçilmiş baş direktoru Eduard Dayanla görüşmüş, onu yeni vəzifəsi münasibətilə təbrik etmiş, nazir Əli Abbasovun məktubunu vermişlər. Görüşdə ÜPİ ilə Azərbaycan poçtu arasında faydalı əməkdaşlıq məsələləri müzakirə olunmuşdur. E.Dayan ölkəmizdə poçt sisteminin inkişafı məqsədi ilə birgə layihələrin vacibliyini vurğulamış, bunun üçün ÜPİ-nın ölkəmizə texniki yardım göstərəcəyini də vəd etmişdir. Bundan başqa sahənin inkişafı üçün Poçtun Keyfiyyətinin Artırılması Fondunun imkanlarından da istifadə etmək tövsiyə olunmuşdur.
Bölmənin digər xəbərləri
