Azərbaycan Ordusu yeni taktiki yanaşmalarla minimum itkilərlə Füzuli şəhərini azad etdi – AÇIQLAMA
Bakı, 17 oktyabr, AZƏRTAC
Vətən müharibəsində Füzuli rayonunun və digər yaşayış məntəqələrinin azad edilməsinin böyük strateji əhəmiyyəti vardı. Hələ Birinci Qarabağ savaşında Ulu Öndər Heydər Əliyevin rəhbərliyi ilə Azərbaycanın hərb tarixinə qızıl hərflərlə yazılan uğurlu Horadiz əməliyyat aparılmışdı. O zaman Füzulinin 22 yaşayış məntəqəsi, o cümlədən Horadiz qəsəbəsi düşməndən azad edildi. Nəticədə Ermənistan tərəfi “Bişkek Protokolu”nu imzalamağa məcbur oldu və atəşkəs dövrü başladı. 1994-cü ilin mayında atəşkəs haqqında “Bişkek Protokolu” qüvvəyə minəndən 2020-ci il sentyabrın 27-dək olan müddətdə Azərbaycan Silahlı Qüvvələri formalaşdırıldı, peşəkar ordu quruculuğu istiqamətində ciddi islahatlar aparıldı. Görülən işlərin nəticəsidir ki, İkinci Qarabağ müharibəsində düşmən döyüş meydanında darmadağın edildi.
Azərbaycan Milli Ordusunun 1994-cü ildə keçirdiyi “Horadiz əməliyyatı” zamanı Horadiz qəsəbəsinin işğaldan azad olunmasında iştirak edən N saylı briqadanın komandiri olmuş, ehtiyatda olan polkovnik, Qarabağ müharibəsi və Silahlı Qüvvələrin veteranı, hərbi ekspert Şair Ramaldanov AZƏRTAC-a açıqlamasında uğurlu Füzuli əməliyyatının bəzi məqamlarına toxunub.
Hərbi ekspert Şair Ramaldanov deyib ki, bir çox hərbi mütəxəssislər Vətən müharibəsində cənub istiqamətində Azərbaycan Ordusunun uğurunu 1994-cü ilin Horadiz əməliyyatının davamı kimi də qiymətləndirirlər. Çünki Birinci Qarabağ müharibəsində ordumuz qısa zamanda irəliləyərək 22 yaşayış məntəqəsini düşməndən təmizləmişdi. Vətən müharibəsində qısa müddətdə Cəbrayıl və Zəngilan kimi böyük rayonlarımız düşməndən azad olundu. Hətta “Böyük Qayıdış”ın ilk addımlarından olan Cəbrayıl rayonunun Cocuq Mərcanlı kəndi məhz 1994-cü ildə Horadiz əməliyyatı zamanı igid əsgər və zabitlərimizin qəhrəmanlığı sayəsində azad edilmişdi. 2016-cı ilin Aprel döyüşləri zamanı isə Lələtəpə yüksəkliyi düşməndən təmizləndikdən sonra həmin kəndin təhlükəsizliyi təmin edildi. Prezident İlham Əliyevin Cocuq Mərcanlı kəndinin bərpası ilə bağlı gördüyü işlər və ora əhalinin qayıtması “Böyük Qayıdış”ın ilk addımları kimi xalqımız tərəfindən yüksək qiymətləndirilirdi.
“Füzuli rayonu cənub istiqamətində ən böyük şəhərlərdən biri idi, həm də rayonun strateji əhəmiyyətinə görə orada düşmən çox güclü mühəndis-istehkam qurğuları yaratmışdı. Rayonun azad edilməsi üçün əvvəlcə Cəbrayıl şəhərini, sonra isə Hadrutu, daha sonra isə Füzuli ətrafındakı geniş yol qovşağı nəzərə alınaraq uğurlu əməliyyat aparılıb. Bu əməliyyat zamanı şəhidlərimiz, yaralılarımız olsa da, Füzuli şəhərinin azad olunması zamanı itkilər demək olar ki, minimum endirildi. İtkiləri minimuma endirən amillərdən ən əsası Prezident İlham Əliyevin ordu quruculuğundakı müasir prinsipləridir. Yəni Azərbaycan Ordusu son nəsil tələblərə cavab verən silahlarla təmin olunmuşdu. Bu silahlar dəqiq vurma imkanları ilə seçilir və onlarla bağlı çoxsaylı videomateriallar mediada nümayiş olunur. Bu materiallardan da görünür ki, yeni Azərbaycan Ordusu həmin o silahlardan istifadə edərək müqavimət göstərən düşmənin müdafiəsini dəqiq atəş vasitələri ilə sıradan çıxarıb. Bu isə Silahlı Qüvvələrimizin düşmənin həmin istiqamətdə müdafiəsini yarıb uğurlu əməliyyat həyata keçirməsinə imkan vermişdir”, - deyə ehtiyatda olan polkovnik söyləyib.
Ş.Ramaldanovun sözlərinə görə, xüsusən də məhz müasir silahların tətbiqi nəticəsində Ordumuz düşmənə maksimum zərbə endirərək bölmələrimizin şəxsi heyəti arasında itkilərin minimuma endirilməsinə nail olundu. Azərbaycan Ordusunun 44 günlük Vətən müharibəsində minimum itkilərlə apardığı hərbi əməliyyat təcrübəsi hazırda ən böyük silahlı qüvvələri olan dövlətlərdə, hərbi məktəb və akademiyalarda nümunə kimi öyrənilir. Köhnə texnika ilə silahlanmış işğalçı ermənilər Azərbaycanın müasir silahlarının və texnikalarının qarşısında aciz qaldı. Bu yeni taktiki yanaşmalar nəticəsində Azərbaycan minimum itkilərlə Füzuli şəhərini və onun yaşayış məntəqələrini düşməndən azad etməyə nail olmuşdu.
“Bir zamanlar tariximizdə müxtəlif rayon və yaşayış məntəqələrimizin düşmən tərəfindən işğal olunduğunu xatırladırdıq. Prezident, Müzəffər Ali Baş Komandanın bilavasitə rəhbərliyi ilə İkinci Qarabağ savaşında Ordumuzun apardığı uğurlu əməliyyat nəticəsində Azərbaycan müharibədə şanlı və tarixi Qələbə qazandı. İndi Füzulinin azad olunmasının üçüncü ildönümünü məhz Ali Baş Komandan İlham Əliyevin 20 illik Prezident fəaliyyəti ilə eyni vaxtda qeyd edirik.
Bu gün Ali Baş Komandanın rəhbərliyi ilə Azərbaycan Ordusu müasirlik prinsipini rəhbər tutaraq yeni silahlarla və texnikalarla təchiz olunmağa davam edir. Təsadüfi deyil ki, Ordumuz qısa zamanda dünyanın 50 ən güclü silahlı qüvvələri arasında yer tutmağı bacarıb”, - deyə Qarabağ müharibəsi veteranı vurğulayıb.
Bölmənin digər xəbərləri
