Azərbaycan-Özbəkistan əlaqələri yeni geoiqtisadi imkanlar formalaşdırır ŞƏRH
Bakı, 25 avqust, AZƏRTAC
Prezident İlham Əliyevin Özbəkistana dövlət səfəri zamanı səsləndirdiyi fikirlər yalnız ikitərəfli münasibətlərin deyil, həm də daha geniş regional proseslərin qiymətləndirilməsi baxımından mühüm əhəmiyyət daşıyır. Dövlətimizin başçısının Mərkəzi Asiya ilə Azərbaycanı böyük potensiala malik vahid geosiyasi və geoiqtisadi məkan kimi xarakterizə etməsi son illərdə bölgədə baş verən dəyişikliklərin mahiyyətini dəqiq ifadə edir.
Bu fikirləri AZƏRTAC-a açıqlamasında Milli Məclisin deputatı Jalə Əliyeva deyib.
Onun sözlərinə görə, Azərbaycanın Mərkəzi Asiya ölkələri ilə əlaqələrinin intensivləşməsi yeni regional əməkdaşlıq modelinin formalaşmasına şərait yaradıb. Bu modelin əsas xüsusiyyəti Azərbaycanın yalnız Cənubi Qafqaz ölkəsi kimi deyil, həm də Mərkəzi Asiya ilə Avropa arasında əlaqələndirici rol oynayan mühüm dövlət kimi çıxış etməsidir. Azərbaycanın əlverişli coğrafi mövqeyi, Xəzər dənizinki imkanları, nəqliyyat infrastrukturu və logistika layihələri Mərkəzi Asiya ölkələrinin dünya bazarlarına çıxışında mühüm rol oynayır. Mərkəzi Asiyanın zəngin resursları və iqtisadi potensialı isə Azərbaycan üçün yeni əməkdaşlıq istiqamətləri yaradır. Bu baxımdan Azərbaycan-Özbəkistan münasibətləri xüsusi əhəmiyyət daşıyır. Özbəkistanın sürətli inkişafı və xarici iqtisadi əlaqələrinin genişlənməsi iki ölkə arasında əməkdaşlıqda yeni imkanlar açır.
“Azərbaycanın Mərkəzi Asiya ölkələrinin əməkdaşlıq formatına qoşulması bu prosesdə mühüm mərhələ olub. Özbəkistanın göstərdiyi siyasi dəstək isə iki ölkənin regional baxışlarının bir çox məsələdə üst-üstə düşdüyünü nümayiş etdirir. Bu gün nəqliyyat əlaqələrinin inkişafı xüsusi aktuallıq daşıyır. Orta Dəhliz Azərbaycanı Mərkəzi Asiya ilə Avropa arasında mühüm tranzit mərkəzlərindən birinə çevirir. Azərbaycan-Özbəkistan əməkdaşlığının nəqliyyat və logistika sahəsində gücləndirilməsi həm iki ölkənin, həm də daha geniş regionun iqtisadi maraqlarına cavab verir. Energetika, rəqəmsal texnologiyalar, kənd təsərrüfatı, sənaye, turizm, investisiya və humanitar sahələrdə əlaqələrin genişlənməsi regional iqtisadi məkanın formalaşmasına xidmət edir.
Qarabağın bərpasında Azərbaycan-Özbəkistanın əməkdaşlığı da bu regional yanaşmanın mühüm nümunəsidir. Füzulidə Mirzə Uluqbəy adına məktəbin inşası və Xankəndidə həyata keçirilən investisiya layihələri iki ölkə arasındakı siyasi həmrəyliyin iqtisadi və sosial təşəbbüslərdə təcəssümüdür. Qarabağda reallaşdırılan bu layihələr Azərbaycan-Özbəkistan münasibətlərinin yalnız ikitərəfli xarakter daşımadığını, eyni zamanda, Türk dünyası ölkələrinin respublikamızın ərazi bütövlüyünün bərpasından sonra regionun inkişafında fəal iştirak etdiyini göstərir”, - deyə deputat diqqətə çatdırıb.
J.Əliyeva, həmçinin qeyd edib ki, Türk Dövlətləri Təşkilatı çərçivəsində əməkdaşlığın gücləndirilməsi də mühüm istiqamətdir. Ortaq tarix, mədəniyyət və dil amili siyasi və iqtisadi əlaqələrin daha geniş platformada inkişafına imkan yaradır. Bu proses perspektivdə Mərkəzi Asiya ilə Azərbaycan arasında daha sıx iqtisadi və siyasi əlaqələrin formalaşmasına xidmət edə bilər.
“Prezident İlham Əliyevin mətbuata bəyanatında səsləndirdiyi “vahid geosiyasi və geoiqtisadi region” yanaşması da məhz bu reallığı ifadə edir. Burada söhbət coğrafi sərhədlərin dəyişdirilməsindən deyil, qarşılıqlı iqtisadi maraqlar, nəqliyyat bağlantıları, enerji əməkdaşlığı və siyasi həmrəylik əsasında yeni regional əməkdaşlıq məkanının formalaşmasından gedir. Azərbaycan-Özbəkistan münasibətlərinin inkişafı iki qardaş dövlət üçün olduğu qədər, bütövlükdə Mərkəzi Asiya və Cənubi Qafqaz üçün də strateji əhəmiyyət daşıyır. İki ölkənin artan iqtisadi potensialı, siyasi iradəsi və qarşılıqlı etimadı daha geniş regional inteqrasiya proseslərinə mühüm təkan verir. Bu əlaqələr Türk dünyasında yeni əməkdaşlıq imkanlarının, Mərkəzi Asiya ilə Cənubi Qafqaz arasında daha sıx inteqrasiyanın mühüm göstəricilərindən biridir”, - deyə o vurğulayıb.
Bölmənin digər xəbərləri
