RƏSMİ XRONİKA
AZƏRBAYCAN PREZİDENTİ HEYDƏR ƏLİYEV UKRAYNANIN ÖLKƏMİZDƏKİ SƏFİRİNİ QƏBUL ETMİŞDİR
Azərbaycan Prezidenti Heydər Əliyev aprelin 30-da Prezident sarayında Ukraynanın ölkəmizdəki fövqəladə və səlahiyyətli səfiri Boris Aleksenkonu qəbul etmişdir.
Cənab BORİS ALEKSENKO bu görüş üçün imkan yaratdığına görə dövlətimizin başçısına təşəkkürünü bildirdi. O, Prezident Heydər Əliyevə Ukrayna Prezidenti Leonid Kuçmanın ən xoş arzularını çatdıraraq dedi ki, yaxın vaxtlarda Ukrayna rəhbərinin öz arzularını bilavasitə yetirmək imkanı olacaqdır.
Səfir dövlətimizin başçısına ötən il ərzində Azərbaycan-Ukrayna münasibətlərinin genişlənməsi istiqamətində ikitərəfli səviyyədə görülmüş işlər barədə məlumat verdi. Bildirildi ki, indiyədək bütünlükdə 96 dövlətlərarası sənəd imzalanmış, onların 18-i tamamilə həyata keçirilmişdir. İqtisadi əməkdaşlıq sahəsində də böyük uğurlar əldə edilmişdir. Hökumətlərarası komissiyanın iki iclası keçirilmiş, ölkələrimiz arasında əmtəə dövriyyəsinin həcmi iki dəfə artmışdır. Ukrayna müəssisələri Azərbaycanın energetika sahəsinin inkişafında uğurla iştirak etmişlər. Sumı maşınqayırma zavodu “Şimal” DRES-də kompressor stansiyası tikmiş, Xarkovun “Turboatom” zavodu Yenikənd SES-in 4-cü enerji bloku üçün turbin göndərmişdir.
Diplomat dedi ki, siyasi məsləhətləşmələr sahəsində də müəyyən iş görülmüşdür. Ukrayna XİN-in dövlət katibi Yuri Sergeyev Bakıda səfərdə olmuş, burada ikitərəfli siyasi, iqtisadi, mədəni və hərbi-texniki əməkdaşlıq məsələləri müzakirə edilmişdir.
Boris Aleksenko dövlətimizin başçısının qarşıdakı yubileyi münasibətilə diplomatik korpusun ən xoş arzularını və təbrikini yetirərək dedi ki, əcnəbi diplomatlar Prezident Heydər Əliyev ilə görüşmək arzusundadırlar. O, həmçinin bildirdi ki, Bakıdakı diplomatlar Azərbaycan paytaxtının yaşıllaşdırılması və abadlaşdırılması tədbirlərində icra hakimiyyəti ilə birlikdə fəal iştirak etmişlər.
Səfir Ukraynadakı siyasi və sosial-iqtisadi vəziyyət barədə də məlumat verərək dedi ki, hazırda Prezident Leonid Kuçmanın təşəbbüsü ilə ölkədə siyasi sistemin islahatı layihəsinin müzakirəsi gedir.
Ukrayna Prezidenti ölkənin siyasi sistemini dəyişərək, onu parlament-prezident respublikasına çevirmək təklifi irəli sürmüşdür. İkipalatalı parlament yaratmaq, deputatların sayını azaltmaq nəzərdə tutulur. Seçki sistemində də müəyyən dəyişikliklər ediləcəkdir. Bütün hakimiyyət orqanlarına seçkiləri bir il ərzində keçirmək planlaşdırılır. Azərbaycanın təcrübəsindən istifadə edərək, belə bir qayda qoymaq nəzərdə tutulur ki, ölkədə keçirilən referendumun yekunları Mərkəzi Seçki Komissiyası nəticələri elan etdikdən sonra qüvvəyə minsin.
Daha sonra Boris Aleksenko Ukrayna Prezidenti Leonid Kuçmanın məktubunu Azərbaycan Prezidentinə təqdim edərək dedi ki, bu sənəd Yalta görüşündə qəbul olunmuş rəsmi məlumatın müddəalarına əsaslanır.
Prezident HEYDƏR ƏLIYEV məktubun mətni ilə tanış olaraq bildidi ki, onun çatdırılması bir qədər geçikdirilmişdir.
Səfir bunun səbəbini izah edərək dedi ki, mənə onu Sizə şəxsən təqdim etmək tapşırılmışdı. Siz son dərəcə məşğul olduğunuza görə, bunu edə bilmədim.
Dövlətimizin başçısı səfirə müraciətlə vurğuladı ki, mənə desəydilər Leonid Daniloviçin məktubu var, sizi bütün hallarda qəbul edərdim. Belə sənədlər gecikdirilməməlidir.
Sonra Prezident Herdər Əliyev məktubla tanış olduğunu və düşünmək, məsləhətləşmək lazım gəldiyini bildirdi. Dövlətimizin başçısı dedi ki, bu məsələ bir müddət əvvəl Ukrayna, Rusiya və Qazaxıstan rəhbərləri arasında müzakirə olunmuşdur. Biz də müzakirə edəcək və nəticəsini bildirəcəyik.
X X X
Qəbulda Prezidentin Katibliyinin rəisi Dilarə Seyidzadə, Prezidentin İcra Aparatının xarici əlaqələr şöbəsinin müdiri Novruz Məmmədov iştirak edirdilər.
Foto Oqtay Aydınoğlunundur