AZƏRBAYCAN PREZİDENTİ HEYDƏR ƏLİYEVİN FRANSAYA RƏSMİ SƏFƏRİ
Respublikanın dövlət başçısı Binə aeroportundan yola düşməzdən əvvəl müxbirlərlə müsahibədə demişdir ki, bu səfər Azərbaycanın beynəlxalq mövqeyinin möhkəmləndirilməsinə xidmət edəcək, qarşıdakı danışıqlar Fransa dövləti ilə əməkdaşlığımızın əsasını qoyacaqdır. Prezident qeyd etmişdir ki, Azərbaycan tərəfi bu görüşlərin nəticələrinin böyük əhəmiyyəti olacağına ümid bəsləyir.
Hava limanında respublika Prezidenti Heydər Əliyevi Ali Sovetin sədri Rəsul Quliyev, Baş nazir Surət Hüseynov və digər rəsmi şəxslər yola salmışlar.
Dekabrın 19-da Bakıdan Fransaya istiqamət götürən xüsusi təyyarə yerli vaxtla saat 12.50-də Parisdə yeri endi.
Paytaxtın məşhur “Orli” aeroportu Azərbaycanın və Fransanın dövlət bayraqları ilə bəzədilmişdi. Fransa Prezidenti Fransua Mitteranın dəvəti ilə buraya rəsmi əməli görüşə gələn Azərbaycan Respublikasının Prezidenti Heydər Əliyevi təyyarənin pilləkəni yanında Fransa Prezidentinin şəxsi nümayəndəsi, ölkənin Xarici İşlər Nazirliyinin yüksək vəzifəli şəxsləri və Fransanın Azərbaycandakı səfiri Jan Perren qarşıladılar. Azərbaycan dövləti başçısının şərəfinə təyyarə meydanında fəxri qarovul düzülmüşdür.
Rəsmi qarşılanma mərasimindən sonra fəxri motosikletçilər dəstəsinin müşayiəti ilə avtomaşınlar karvanı Azərbaycan Prezidenti üçün ayrılmış iqamətgaha doğru yollandı.
Belə səfərləri, adətən, tarixi səfər adlandırırlar. Doğrudan da, Azərbaycan rəhbərinin Fransaya səfəri iki ölkə arasında münasibətlərin tarixinə çox böyük əhəmiyyətli bir hadisə kimi daxil olacaqdır. Fransa suveren Azərbaycan dövlətinin başçısını ilk dəfədir ki, qəbul edir. Müstəqil ölkəmizin üçrəngli bayrağı qədim Paris üzərində ilk dəfədir ki, dalğalanır.
Fransada əhalinin müəyyən təbəqələrinin Azərbaycan haqqında təsəvvürləri məhdud olsa da, Qərbin bu nüfuzlu dövlətində Heydər Əliyevi yaxşı tanıyırlar. Küçədə, yaşadığımız mehmanxanada rastlaşdığımız fransızlar Azərbaycandan gəldiyimizi bilən kimi Heydər Əliyevin adını çəkirlər.
Yerli siyasi dairələr, kütləvi informasiya vasitələri bu səfəri Azərbaycanla Fransa arasında əlaqələr yaradılmasında mühüm mərhələ kimi qiymətləndirirlər. İcmalçılar Fransua Mitteranı və Heydər Əliyevi dünyanın görkəmli siyasi xadimləri kimi səciyyələndirir, onların qarşıdakı görşünün iki ölkə arasında əməkdaşlığın inkişafına müsbət təsir göstərəcəyindən bəhs edirlər.
Yüksək səviyyədə Azərbaycan-Fransa görüşü sırf işgüzar xarakter daşıyır. Görüşün proqramı son dərəcə zəngindir. Səfər zamanı dostluq və əməkdaşlıq haqqında müqavilə bağlanacaqdır. Azərbaycan dövlətinin başçısı yeni Avropa üçün Paris Xartiyasını da imzalayacaqdır.
Dekabrın 19-da respublikanın rəhbəri Fransada yaşayan azərbaycanlılar icmasının nümayəndələri ilə görüşdü. Səmimilik və mehribanlıq şəraitində keçən söhbət zamanı Heydər Əliyev görüş iştirakçılarını doğma Vətən adından salamlayaraq, respublikadakı ictimai-siyasi vəziyyət və Ermənistan Silhalı Qüvvələrinin Azərbaycana təcavüzü barədə onlara ətraflı məlumat verdi.
Çar Rusiyası və keçmiş Sovet İttifaqı dövründə xaricdəki həmvətənlərimizlə əlaqələrin qırılmasından təəssüflə söhbət açan Heydər Əliyev bildirdi ki, indi Azərbaycan müstəqil dövlətdir və biz bu əlaqələrin nəinki bərpa olunmasına, həm də vahid bir mərkəzdən istiqamətləndirilməsinə xüsusi diqqət yetiririk.
Müharibəyə zorla cəlb edilmiş Azərbaycanın haqq işini beynəlxalq aləmdə, xüsusilə də dünyanın ən nüfuzlu dövlətlərindən biri olan Fransada geniş təbliğ etməyin vacibliyinə toxunan Heydər Əliyev qeyd etdi ki, bu çətin işin ağırlığının bir hissəsi də Fransada yaşayan həmvətənlərimizin üzərinə düşür və onlar bu sahədə öz əməli köməyini əsirgəməməlidirlər.
Beynəlxalq icmalçı Qabil Hüseynli bu görüşü şərh edərək AZƏRTAC-ın müxbirinə dedi ki, əgər təkcə son iki ildə hakimiyyətdə olanlar həmin istiqamətdə müəyyən addımlar atsaydılar, müxtəlif ölkələrdə yaşayan azərbaycanlılar diasporu bu gün diplomatiyamızın söykənc yeri ola bilərdi. Doğrudur, Azərbaycan diasporu say etibarilə azdır, təəssüf ki, həm də pərakəndədir, lazımi təşkilati strukturlarına malik deyil. Digər çətinliklər də var. Bütün bunlar həll olunmalı, xaricdə yaşayan həmvətənlərimiz lazımi informasiya ilə dolğun təmin edilməlidirlər. Bu görüşü Fransada yaşayan soydaşlarımızla əlaqələrin tənzimlənməsində yeni ənənənin başlanğıcı hesab etmək olar.
Elə həmin gün Azərbaycan dövlətinin başçısı Parisdəki Senklu qəbiristanında xalqımızın görkəmli oğulları Əlimərdan bəy Topçubaşovun və onun ailə üzvlərinin, Ceyhun bəy və onun oğlu Timuçin Hacıbəylinin məzarlarını ziyarət edərək əklil qoydu.
Bölmənin digər xəbərləri
