AZƏRBAYCAN PREZİDENTİ İLHAM ƏLİYEV “AQO” MONİTORİNQ QRUPU NÜMAYƏNDƏ HEYƏTİNİ QƏBUL ETMİŞDİR
Azərbaycan Respublikasının Prezidenti İlham Əliyev iyulun 1-də Prezident sarayında “Aqo” monitorinq qrupunun nümayəndə heyətini qəbul etmişdir.
Dövlətimizin başçısı “Aqo” monitorinq qrupunun nümayəndə heyətinin Azərbaycana növbəti səfərinin qarşılıqlı maraq doğuran məsələlərlə daha yaxından tanış olması üçün yaxşı imkan yaratdığını vurğuladı, ölkəmizdəki demokratik inkişaf prosesləri barədə qonaqlara ətraflı söhbət açdı.
Qrupun rəhbəri - Almaniyanın Avropa Şurasındakı daimi nümayəndəsi Roland Vegener əvvəlki səfərlərindən ötən dövr ərzində Azərbaycanda müxtəlif sahələrdə böyük irəliləyişlərin şahidi olduqlarını söylədi. O, Prezident İlham Əliyevin imzaladığı əfv fərmanlarını, seçki praktikasının təkmilləşdirilməsinə dair Sərəncamı, penitensiar sahədəki müsbət dəyişiklikləri, məhbusların hüquq və mənafelərinin müdafiəsi, qarşıdakı parlament seçkilərində namizədlərə bərabər imkanların yaradılması üçün görülən tədbirləri, iqtidarla müxalifət arasındakı dialoq təşəbbüsünü, mitinqlərin keçirilməsinə icazə verilməsini demokratik inkişafın bütün istiqamətlərindəki müsbət irəliləyişlər kimi dəyərləndirdi və bu prosesin çox yaxşı həyata keçirildiyini vurğuladı.
Cənab Roland Vegener Prezident İlham Əliyevin SNN-Türk telekanalına müsahibəsində Azərbaycanda gedən demokratik proseslər barədə verdiyi ətraflı məlumatların “Aqo” monitorinq qrupu tərəfindən maraqla izlənildiyini bildirdi. Qarşıdakı parlament seçkilərinin çox böyük əhəmiyyət daşıdığını bildirən qonaq dedi ki, bu, Azərbaycanda çox mühüm siyasi hadisə olacaqdır.
Görüşdə Ermənistan-Azərbaycan, Dağlıq Qarabağ münaqişəsi və qarşılıqlı maraq doğuran bir sıra məsələlər barədə fikir mübadiləsi aparıldı.
Bölmənin digər xəbərləri
