AZƏRBAYCAN PREZİDENTİ İLHAM ƏLİYEV FACİƏ QURBANLARININ XATİRƏSİNİ ANMA MƏRASİMİNDƏ İŞTİRAK ETMİŞDİR

26.02.2007 [14:33]
Çap et
A⁺ A^-

On beş il əvvəl, 1992-ci il fevralın 25-dən 26-na keçən gecə Xocalı şəhərinin sakinləri keçmiş sovet ordusunun 366-cı alayının bilavasitə iştirakı ilə erməni qəsbkarları tərəfindən qəddarcasına qətlə yetirilmişlər. Xocalı faciəsi XX əsrin ən dəhşətli soyqırımlarından biri kimi Azərbaycan xalqının qan yaddaşına yazılmışdır. Bu dəhşətli qırğın daim Azərbaycan torpaqlarına göz dikən ermənilərin xəstə təfəkkürdən doğan niyyətlərinə çatmaq məqsədi ilə xalqımıza qarşı yeritdikləri məkrli siyasətin daha bir

qanlı səhifəsidir. Hər il bu müdhiş faciənin ildönümü ölkəmizdə və dünyanın müxtəlif dövlətlərində yaşayan soydaşlarımız tərəfindən ürək ağrısı ilə qeyd olunur. Bu günlər dünyanı

n bir çox ölkəsində Xocalı qurbanlarının əziz xatirəsi anılır, mitinqlər, piketlər keçirilir.

15 il əvvəl Xocalı şəhərində törədilmiş qırğın zamanı 613 nəfər qəddarlıqla qətlə yetirilmişdir. Onların 83-ü uşaq, 106-sı qadın, 70-i qoca idi. Şəhərdə 8 ailə tamamilə məhv edilmiş, 25 uşaq hər iki valideynini, 130 uşaq isə valideynlərindən birini itirmişdir. Həmin dəhşətli hadisədə 487 nəfər yaralanmış, 1275 nəfər girov götürülmüş, 150 nəfər itkin düşmüşdür. Onların çoxunun aqibəti indiyədək məlum deyildir. O

vaxtın qiymətləri ilə dövlətin və əhalinin əmlakına 5 milyard rubl dəyərində ziyan dəymişdir.

Xocalı soyqırımının 15-ci ildönümü ilə əlaqədar Azərbaycan Prezidentinin xalqımıza müraciətində vurğulanır ki, bu faciə davakar erməni millətçilərinin yüzilliklər boyu türk və Azərbaycan xalqlarına qarşı apardığı soyqırımı və etnik təmizləmə siyasətinin qanlı səhifəsi, öz amansızlığına və qəddarlığına görə həm də bəşəriyyətə və insanlığa qarşı törədilmiş cinayət idi. Bununla onlar Azərbaycan xalqının mübarizə əzmini qırmaq, onu tarixi

torpaqlarımızın işğalı faktı ilə barışmağa məcbur etmək istəyirdilər. Lakin onların bu niyyətləri baş tutmadı.

Xocalı faciəsi qurbanlarının qanı yerdə qalmayacaq, erməni cəlladlar öz layiqli cəzalarını alacaqlar. Azərbaycan hökuməti erməni millətçilərinin xalqımıza qarşı törətdikləri cinayətlər, o cümlədən Xocalı faciəsi haqqında həqiqətlərin dünya ictimaiyyətinə çatdırılması, onun soyqırımı kimi tanınması üçün məqsədyönlü və ardıcıl fəaliyyət göstərir. Bu, Xocalı şəhidləri qarşısında bizim vətəndaşlıq və insanlıq borcumuzdur.

Xocalı soyqırımının 15-ci ildönümü ilə əlaqədar anma mərasimində iştirak etmək üçün fevralın 26-da səhər tezdən Azərbaycan paytaxtının minlərlə sakini faciə qurbanlarının xatirəsinə ucaldılmış “Vətən harayı” abidəsinin önünə toplaşmışdı.

Azərbaycan Respublikasının Prezidenti İlham Əliyev anma mərasimində iştirak etmişdir.

Abidənin yanında fəxri qarovul dəstəsi düzülmüşdü.

Dövlətimizin başçısı İlham Əliyev abidənin önünə əklil qoydu.

Mərasimdə Baş nazir Artur Rasizadə, Milli Məclisin sədri Oqtay Əsədov, Prezidentin İcra Aparatının rəhbəri Ramiz Mehdiyev, digər dövlət və hökumət nümayəndələri, Milli Məclisin deputatları, nazirlər, komitə və şirkət rəhbərləri, ölkəmizdə fəaliyyət göstərən diplomatik korpusun və beynəlxalq təşkilatların təmsilçiləri, paytaxt ictimaiyyətinin nümayəndələri, habelə Xocalı qırğınından xilas ola bilmiş sakinlər iştirak edirdilər.

Anma mərasiminin iştirakçıları abidənin önünə tər qızılgüllər, qərənfillər düzdülər.

Allah bütün şəhidlərimizə rəhmət eləsin!