CAVAB: Bəli. Azərbaycanın hər tərəfi, hər bir bölgəsi inkişaf etməlidir, yeni müəssisələr, fabriklər, iş yerləri, təhsil ocaqları açılmalıdır. Çox şadam ki, bu gün açılışında iştirak etdiyimiz məktəb də yüksək səviyyədə istifadəyə verilibdir. Üzgüçülük hovuzu da açılıbdır. Bilirsiniz ki, prezident seçkilərindən əvvəl Bərdədə olarkən söz vermişdim ki, burada həm üzgüçülük hovuzu, həm də yeni məktəb tikiləcək və mən onların açılışına gələcəyəm. İndi çox şadam ki, bütün nəzərdə tutduğumuz planlar həyatda öz əksini tapmışdır. Bu da əlbəttə ki, Bərdəyə həm yaraşıq verir, həm də uşaqlar və yeniyetmələr, böyüklər bu obyektlərin bəhrəsini görəcəklər.

SUAL: Cənab Prezident, Fransada Jak Şirakla və ATƏT-in Minsk qrupunun fransalı həmsədri ilə keçirdiyiniz görüşdə Dağlıq Qarabağ münaqişəsi müzakirə mövzusu oldu. Bundan sonrakı görüşlər, danışıqlar hansı istiqamətdə aparılacaq?

CAVAB: Gündəlikdə, əlbəttə ki, münaqişənin nizamlanması məsələsi durur. Bilirsiniz ki, danışıqlar aparılır, xarici işlər nazirlərinin görüşləri artıq ənənəvi xarakter alıbdır. Bir dəfə sizin sualınıza cavab verərkən demişdim ki, danışıqlar konkret mövzular ətrafında aparılır. Bizim mövqeyimiz dəyişməz olaraq qalır - Azərbaycanın ərazi bütövlüyü bərpa olunmalıdır. Bundan sonra başqa məsələdən söhbət gedə bilər. Fransada da Azərbaycanın mövqeyi cənab Jak Şiraka bir daha çatdırıldı, bu məsələ ətrafında fikir mübadiləsi aparıldı.

SUAL: Cənab Prezident, Ermənistan hərbçilərinin Bakıya gəlməsi gözlənilir və yəqin bilirsiniz ki, Azərbaycan cəmiyyətində bununla bağlı narahatçılıq var. NATO bayrağı altında Bakıda keçirilən tədbirlərdə erməni zabitlərinin iştirakına Sizin münasibətiniz necədir?

CAVAB: Birinci onu demək istəyirəm ki, NATO ilə Azərbaycanın əməkdaşlığı çox uğurludur. Biz bu əməkdaşlığa çox böyük əhəmiyyət veririk. Uzun illərdir ki, Azərbaycan NATO-nun “Sülh naminə tərəfdaşlıq” proqramının iştirakçısıdır və son zamanlar biz yeni bir mərhələyə qədəm qoymuşuq. Fərdi əməkdaşlıq proqramı artıq icra olunur və Azərbaycan bu proqrama qoşulmuş ilk ölkələrdən biridir. Bakıda keçiriləcək tədbir də NATO tərəfindən təşkil olunur və bilirsiniz ki, Azərbaycan hansısa bir ölkənin hərbçilərini buraya dəvət etməyibdir. O cümlədən də erməni hərbçilərini. Təbii ki, hər bir insandan soruşsanız ki, istərdinizmi erməni hərbçisi Azərbaycana gəlsin, əlbəttə, deyəcəkdir ki, yox.

Elə adam tapmaq çətindir ki, desin, mən istəyirəm ki, erməni zabiti Azərbaycana gəlsin. O cümlədən mən də. Mən də istəmirəm ki, erməni zabiti Azərbaycana gəlsin, mən də bunun əleyhinəyəm və Azərbaycan lazımi tədbirləri görür. Mən bir dəfə buna oxşar məsələyə dair demişdim ki, bu məsələdə, əlbəttə, ictimai təşkilatların fəallığı və yaxud hansısa başqa tədbirləri vacibdir və labüddür.

Amma məsələnin mahiyyətini tam təfsilatı ilə bilən Azərbaycan iqtidarıdır, Azərbaycan rəhbərliyidir. Azərbaycan rəhbərliyi daha yaxşı bilir ki, nəyi nə vaxt, necə və hansı formada və hansı anda etmək lazımdır. Azərbaycan ictimaiyyəti əmin ola bilər ki, Ermənistan-Azərbaycan, Dağlıq Qarabağ münaqişəsi məsələsində bizim mövqeyimiz dəyişməz olaraq qalır. Şəxsən mən bundan əvvəl də dəfələrlə demişəm və indi də bu fikirdəyəm ki, Ermənistanla Azərbaycan arasında yalnız səlahiyyətli orqanlar arasında danışıqlar aparıla bilər. Prezidentlərin görüşləri vacibdir. Xarici işlər nazirlərinin, lazım gələrsə, müdafiə nazirlərinin də. Amma geniş ictimaiyyətin bir-biri ilə əlaqə saxlamasına mən ehtiyac duymuram. Ermənistan bizim torpaqlarımızı işğal edib, Azərbaycanın ərazi bütövlüyünü pozubdur. Bu işğala son qoyulmalıdır. Bundan sonra, əlbəttə ki, münasibətlər də normallaşa bilər, jurnalistlər, ictimai xadimlər də görüşə bilərlər. Bu münaqişə həll olunmayana qədər hər hansı ünsiyyətlər yersizdir.

SUAL: Cənab Prezident, Sizin fransalı həmsədrlə görüşünüzdən sonra onun belə bir açıqlaması olmuşdur ki, bir həftədən sonra prezidentlərə yeni təkliflər təqdim ediləcəkdir. Bu gün münaqişə ilə bağlı hər hansı yeni təkliflər, ideyalar varmı?

CAVAB: Hər halda, Minsk qrupu son zamanlar fəallaşıb və biz bu fəallaşmanı görürük. Yeni təklifləri də gözləmək olar. Biz daim bildirmişik ki, biz Minsk qrupundan yeni təkliflər gözləyirik. Beynəlxalq hüquq normalarına əsaslanmış təkliflər olmalıdır ki, bu məsələnin həllinə nail olaq. Fransalı həmsədr Jakolənlə də bu məsələ ətrafında söhbət gedirdi. Minsk qrupunun həmsədrləri Astana görüşündə iştirak etmək istəyirlər. Mən də hesab edirəm ki, onlar həmişə olduğu kimi iştirak etsinlər və ola bilsin ki, yeni təkliflər üzə çıxsın. Amma bəri başdan bir şey demək istəmirəm.

SUAL: Cənab Prezident, son dövrdə danışıqlar prosesində müşahidə edilən intensivlik deməyə əsas verirmi ki, hansısa məsələdə müəyyən bir razılaşma əldə olunub?

CAVAB: Razılaşma yoxdur. Əgər razılaşma olsaydı, əlbəttə ki, bu barədə açıqlama verilərdi, biz bunu bəyan edərdik. Çünki bu məsələni gizlətməyə ehtiyac yoxdur. Razılaşma yoxdur, amma necə deyim ki, həm məxfiliyi saxlayım, həm də sizin marağınızı ödəyək. Yəni imkan var ki, razılaşma yolları müəyyənləşsin. Əsas budur. Real danışıqlar məhz bundan sonra başlanacaqdır. İlk növbədə, gərək prinsiplər haqqında ümumi razılığa gələk. Əgər buna biz nail olsaq, sonra detallı danışıqlar başlanacaqdır. Hər halda, Astana görüşündən çox şey asılıdır. Ermənistan Prezidenti ilə mənim iki görüşüm olub və mövqelər də açıqlanıbdır. Bundan sonra da müxtəlif bəyanatlarda hər iki tərəfin mövqeyi kifayət qədər səslənibdir. Ümid edirəm ki, Astana görüşü bu baxımdan müəyyən aydınlıq gətirə bilər ki, biz haradayıq, razılığa yaxınlaşırıqmı, yoxsa, əks istiqamətə gedirik. Ona görə gəlin, bu görüşü gözləyək.

SUAL: Bir neçə gündən sonra “Əsrin müqaviləsi”nin onuncu ildönümü gəlir. Bu barədə nə deyə bilərsiniz?

CAVAB: “Əsrin müqaviləsi”nin imzalanması Azərbaycanın müasir tarixində çox müsbət, görkəmli rol oynamış bir hadisədir. 10 il bundan əvvəl bu müqavilə yalnız və yalnız xalqımızın ümummilli lideri Heydər Əliyevin uzaqgörənliyi və qətiyyəti nəticəsində imzalanmışdır. Çoxusu inanmırdı ki, müqavilənin icrası bu qədər uğurlu olacaqdır. Amma həyat göstərdi ki, Azərbaycan buna qadirdir. Keçən 10 il ərzində neft kəmərləri tikildi, ölkəmiz öz neft ehtiyatlarını dünya bazarlarına çatdırdı, Azərbaycan iqtisadi potensialını gücləndirə bildi. Bunun əsasında, əlbəttə ki, “Əsrin müqaviləsi” və ondan gələn gəlirlər dayanır. “Əsrin müqaviləsi” həm iqtisadi, həm siyasi və həm də bütün cəhətlərdən Azərbaycanın bu gününü və gələcəyini xeyli dərəcədə müəyyən edən bir müqavilədir. Əlbəttə, biz çalışırıq ki, onu lazımi səviyyədə qeyd edək.

SUAL: Cənab Prezident, proporsional seçki sisteminin bərpası ilə bağlı cəmiyyətdə gedən müzakirələrə münasibətiniz necədir?

CAVAB: Hər bir məsələ ətrafında müzakirə gedə bilər. Amma bilirsiniz ki, referendum keçirilmiş və bu məsələyə münasibət bildirilmişdir. Belə olan halda mən yenidən bu məsələnin ciddi şəkildə müzakirəsinə ehtiyac duymuram. Bu, yersizdir. Amma, əlbəttə ki, hər bir insan, hər bir təşkilat istənilən məsələni müzakirə edə, öz mövqeyini bildirə bilər.

SUAL: Cənab Prezident, ali məktəblərə bu il keçirilən qəbul imtahanlarından sonra bir qrup tələbənin nəticələrinin ləğv olunması ictimaiyyət tərəfindən narazılıqla qarşılanmışdır. Buna münasibətiniz necədir?

CAVAB: Bu məsələ araşdırılır. Mənə də məruzə edilmişdir ki, orada müəyyən problemlər, pozuntular var. Əlbəttə ki, məsələ tam ciddiliyi ilə araşdırılır. Ümid edirəm ki, bu yaxınlarda ictimaiyyətə məlumat veriləcəkdir. Hər şey gərək ədalətli və qanun çərçivəsində olsun.

SUAL: Cənab Prezident, qaçqın-köçkün soydaşlarımızla söhbətinizdə dediniz ki, 70 min o cümlədən, 50 min daimi iş yeri açılmışdır. Respublikanın hər yerində bu cür iş yerləri çoxdur. Bu, onu deməyə əsas verirmi ki, Azərbaycanda gələcəkdə 600 mindən də çox yeni iş yerləri olacaq?

CAVAB: Əlbəttə, mən seçkilərdən əvvəl demişəm ki, bu bizim məqsədimizdir. Əgər bu, seçkilərdən əvvəl hansısa bir vəd naminə deyilsəydi, mən 100 min də, 200 min də, 300 min də deyə bilərdim və bunlar da Azərbaycan üçün çox böyük rəqəmlərdir və məsələ öz həllini kifayət qədər tez tapa bilərdi.

Mən, bəlkə də, bilərəkdən qarşımıza ən çətin məqsədi qoydum, bu, ən yüksək rəqəmdir. Bu rəqəm havadan götürülməyib. Əgər biz növbəti illərdə də belə fəallıqla, işgüzarlıqla, peşəkarlıqla işləsək, məqsədimizə çatacağıq. Bu aylar ərzində yaranmış on minlərlə iş yeri bunu göstərir ki, biz düz yoldayıq. Əlbəttə ki, bunu etmək çətindir. Amma biz ona görə bu vəzifədəyik ki, çətin məsələləri həll edək. Asan məsələləri həll etmək asandır. Mən ümid edirəm ki, biz, keçmişdə olduğu kimi, bu sözə də sadiq olacağıq və Azərbaycanda 600 min iş yeri yaradılacaqdır.