Azərbaycan Respublikasının Prezidenti İlham Əliyev Molokançılıq təriqətinin 200 illiyi ilə əlaqədar iyulun 20-də Prezident sarayında ölkəmizdəki molokan icmasının nümayəndələrini qəbul etmişdir. 

Əlamətdar hadisə münasibətilə Azərbaycanın molokan icmasının nümayəndələrinə təbriklərini və xoş arzularını yetirən Prezident İLHAM ƏLİYEV ölkəmizdə bütün digər millətlərə və xalqlara, dinlərə həmişə dözümlü münasibət göstərildiyini bildirərək dedi:

- Təxminən iki əsr bundan əvvəl sizin əcdadlarınız Azərbaycana köçürülmüşlər. O vaxtdan, bütün bu illər ərzində biz mehribanlıq şəraitində, bir ailə kimi yaşayırıq. Xüsusən ötən dövrdə hökumətlərin də, ictimai-siyasi quruluşların da dəyişdiyini nəzərə alsaq, bu, çox mühümdür. Çar hökuməti dövründə də, sosializm dövründə də, Azərbaycanın müstəqil dövlət kimi yaşadığı indiki dövrdə də bu baxımdan heç nə dəyişməmişdir. Bizim cəmiyyətimizdə əmin-amanlıq, sıx qarşılıqlı anlaşma mövcuddur, heç bir problem, hansısa ikili münasibət olmamışdır və əminəm ki, bundan sonra da olmayacaqdır. Bu, ölkəmizin ən böyük nailiyyətlərindən biridir. Azərbaycanda həm dini, həm də milli baxımdan dözümlülük vardır. Dinindən və milliyyətindən asılı olmayaraq, Azərbaycanın hər bir vətəndaşı bütün hüquqlardan istifadə edir və gələcəkdə də istifadə edəcəkdir. Ümummilli liderimiz Heydər Əliyev bu siyasəti həmişə, 1970-ci illərdə respublikaya rəhbərlik etdiyi illərdə də və Azərbaycanın Prezidenti olanda da həyata keçirmişdir. Bu siyasət indi də davam edir.

Dövlətimizin başçısı vurğuladı ki, bir çox ölkələrdə milli azlıqlara ögey münasibət bəslənildiyi halda, respublikamızda yaşayan xalqlar arasında dostluq, qardaşlıq münasibətləri heç vaxt səngiməmişdir. Bu yaxınlarda növbəti qurultayını keçirən Azərbaycanın rus icması da ölkəmizin ictimai-siyasi həyatında yaxından iştirak edir. Molokan icmasının nümayəndələri ilə görüşündən məmnunluğunu vurğulayan Prezident İlham Əliyev onların arzu və istəklərini dinlədi.

Dünyasını dəyişmiş molokanların xatirəsi bir dəqiqəlik sükutla yad olundu.

Şamaxı rayonu icra hakimiyyəti başçısının Çuxuryurd kəndi üzrə nümayəndəsi, Prezident təqaüdçüsü MARİYA KOJEVNİKOVA Prezident İlham Əliyevə rayonda yaşayan molokanların ən xoş arzularını çatdıraraq dedi:

- Ata-babalarımızdan, ana və nənələrimizdən bizə qalan vəsiyyət, Tanrının böyük tövsiyəsi budur - ətrafdakıları, yaxınlarını özünü sevdiyin kimi sev. Biz həmişə bu ilahi tövsiyəyə əməl edərək yaşamışıq, xüsusilə də ümummilli liderimiz Heydər Əliyevin rəhbərliyi dövründə. Bu keyfiyyətlər - ətrafdakıları və yaxınlarını özünü sevdiyi kimi sevmək ona xas idi.

Respublikamızda yaşayan bütün xalqlar bərabər şəraitdə inkişaf edirdilər, ona görə də Heydər Əliyevin ümummilli lider olması heç də təsadüfi deyildir. Çünki o, bütün millətlərin xoşbəxtliyi uğrunda çalışırdı. Mən Heydər Əliyevin kolxozumuza gəldiyi vaxtları heç zaman unutmayacağam. O, kəndimizdə təxminən altı dəfə olmuşdu, zarafat edər və həmişə deyərdi ki, mənim molokanlarıma salam söyləyin. Bunu eşitmək bizim üçün son dərəcə xoş idi.

Mən bu şeirimi Heydər Əliyeviçin anasına, o dövrdə yaşamış bütün analara həsr edirəm. (Şeiri oxuyur).

Hesab edirəm ki, onların ruhları bizim bütün günahlarımızı bağışlayacaq və gələcək işlərimizə xeyir-dua verəcəkdir.

Sonra Mariya Kojevnikova dövlətimizin başçısına molokan dindarlarının müraciətini yetirdi:

“Çox hörmətli cənab Prezident İlham Heydər oğlu!

Uzaq keçmişdə dini əqidələrinə görə çar hökuməti tərəfindən təqib olunan əcdadlarımız pərən-pərən düşmüşdülər. Taleyin hökmü ilə onlar burada, gözəl Şirvan diyarında özlərinə ikinci vətən tapdılar. Onlar çox ağır sınaqlarla üzləşmiş, lakin dini əqidələrinə sadiq qalaraq, İsa Məsih vasitəsilə bir olan Allaha etiqadlarında qalmışlar. Bütpərəstliyə uymamışlar. 1830-cu ildə xeyirxah, gözəl Azərbaycan xalqının torpağında ilk molokan məskənləri yaranmağa başlamışdır.

Bizim xalqlarımız arasında heç vaxt milli ixtilaflar olmamışdır. Bizim genlərimizdə nəsildən-nəslə İlahinin ən başlıca tövsiyəsi kök salmışdır - ətrafdakıları, yaxınlarını özünü sevdiyin kimi sev. Bu tövsiyə ümummilli liderimizin fəaliyyətində özünün parlaq təcəssümünü tapmışdır. O, hamımızın, çoxmillətli respublikamızın bütün sakinlərinin rifahına və tərəqqisinə böyük diqqət yetirirdi. Heydər Əliyeviç bizim xalqımızın nümayəndələri ilə hər bir görüşündə deyirdi: mən sizin möhkəm, etibarlı təminatçınızam. Çox hörmətli cənab Prezident İlham Heydər oğlu, biz bunu həmişə hiss etmişik və indi də hiss edirik. Tarixi yubiley - Molokançılığın 200 illiyi ərəfəsində də biz Sizin qayğınızı hiss edir və deyirik: ataya inanmışıq, oğula da inanırıq, ataya etibar etmişik, oğula da etibar edirik. Ona görə də öz taleyimizi, burada qalan molokanların taleyini dərin ümidlə Sizə tapşırırıq. Şərəfli, xeyirxah və çox məsuliyyətli işinizdə Allah Sizə yar olsun! Sizə dərin hörmət və ehtiram bəsləyən dindar xristian molokanlar!”

Cənab Prezident, onlar bu hörmət və ehtiramlarını qadınlarımızın toxuduqları süfrəyə bükülmüş bu müqəddəs kitabla təsdiq edirlər.

Tanrının mərhəməti həmişə üstünüzdə olsun. Onların tapşırığı ilə müqəddəs kitabı Sizə təqdim edirəm.

İsmayıllı rayonunun İvanovka kəndindəki Nikitin adına təsərrüfatın rəhbəri ALEKSEY KOZLOVTSEV dövlətimizin başçısına həmkəndlilərinin xoş arzularını çatdıraraq dedi:

- Vaxtilə burada, əsasən, Rusiyanın Tambov və Saratov vilayətlərindən

köçürülmüş molokanlar məskunlaşmışdılar. Əcdadlarımız deyirdilər ki, “Molokançılıq” sözü “süd kimi pak sözlər” deməkdir.

Bizim kəndimiz bu gün də mərhum Heydər Əliyeviçin ideyalarına sadiqdir. O, Sizin ananızla birlikdə iki dəfə kəndimizin qonağı olmuşdur. İvanovkalılar bunu xatırlayır və yad edirlər. İndi kəndimizin həmin guşəsində muzey yaradılmışdır. Doğrudur, kinoarxivlə bağlı problemlərimiz vardır. Biz istəyirik ki, hər şeyi bu muzeydə toplayaq.

Sizin icazənizlə, biz 200 illik yubileyi məhz İvanovkada bayram etmək, hazırda yaşayan bütün ahılları bir yerə yığmaq istəyirik.

Heydər Əliyeviç indi təsərrüfatımızın adını daşıdığı mərhum sədrimiz Nikolay Vasilyeviç ilə yaxından dost idi. İndi bizim məhz bu təsərrüfatla bağlı problemimiz yaranmışdır. Biz kolxoz kimi qeydiyyatdan keçə bilmirik. Sizin atanız bizim kolxozçuların, ivanovkalıların yaxın dostu idi. Həmin vaxt o demişdi ki, qoy, ivanovkalılar necə istəyirlərsə, eləcə də yaşasınlar. Mən bilirəm ki, bu ideyanı Siz də dəstəklədiniz. Kənd camaatı kolxoz adını fermer təsərrüfatı və ya hansı səhmdar cəmiyyəti ilə əvəz etmək istəmir. Biz kolxoz olmuşuq və beləcə də qalmaq istəyirik.

Bizim daha bir məsələmiz var: hamımızın sevimlisi olan Mehriban xanıma müraciət etmişik ki, kəndimizdəki məktəb binası çox köhnədir və qəza vəziyyətindədir. Xahiş etmişik ki, imkan varsa, məktəb tikintisi üçün Heydər Əliyev Fondundan vəsait ayrılsın. İndi bizim məktəbin rus və Azərbaycan bölmələrində 600-dək şagird var. Son üç ildə kənddə əhalinin artımı müşahidə olunur. Ona görə də yeni məktəb binası azı 750 şagird üçün nəzərdə tutulmalıdır.

A.Kozlovtsev molokanlara göstərilən diqqət və qayğıya görə dövlətimizin başçısına minnətdarlığını bildirdi.

Prezident İlham Əliyev molokanlara indiyədək olan münasibətin bundan sonra daha da yaxşı olacağını vurğulayaraq dedi ki, hesab edirəm, Azərbaycanda hamımızın bir ailə kimi yaşaması bizim çox böyük nailiyyətimizdir. Bilirsiniz ki, Heydər Əliyevin sizə münasibəti çox səmimi olmuşdur. Dediyiniz kimi, o, sizin təminatçınız olub, bu gün isə mən sizin təminatçınızam.

Azərbaycanın sosial-iqtisadi inkişafının sürətləndirilməsi, regionların inkişaf etdirilməsi sahəsində görülən işlərdən ətraflı söhbət açan dövlətimizin başçısı molokanların məskunlaşdıqları ərazilərdəki problemlərin, o cümlədən görüşdə qaldırdıqları məsələlərin mütləq həll ediləcəyini vurğulayaraq dedi: Kolxoz forması qalmalıdır və mən bunu dəstəkləyirəm. Bunu təsbit etmək üçün hansısa bir hüquqi mexanizm tapılması barədə tapşırıq verəcəyəm. Çünki bunun özü də tarixdir. Prinsip etibarilə mahiyyət dəyişə bilər, lakin tarixi saxlamaq lazımdır. Kolxoz elə kolxoz olaraq da qalmalıdır.

Prezident İlham Əliyev molokan icmasının sosial-iqtisadi inkişafı ilə bağlı görüş iştirakçılarının istək və təkliflərini dinlədi, Azərbaycan molokanlarına ən xoş arzularını yetirdi.

Görüş iştirakçıları Azərbaycanın hərtərəfli inkişafı, ölkəmizin beynəlxalq aləmdə nüfuzunun möhkəmləndirilməsi, əhalinin firavan yaşayışı naminə ardıcıl və məqsədyönlü fəaliyyətində Prezident İlham Əliyevə uğurlar dilədilər. Dövlətimizin başçısı onlarla xatirə şəkli çəkdirdi.