AZƏRBAYCAN PREZİDENTİ İLHAM ƏLİYEV VƏ İRANPREZİDENTİ MƏHƏMMƏD XATƏMİ HEYDƏR ƏLİYEV FONDUNDA OLMUŞLAR
Burada Prezident Məhəmməd Xatəmiyə və nümayəndə heyətinin üzvlərinə Azərbaycan xalqının ümummilli liderinin xatirəsinə ehtiram əlaməti olaraq yaradılan Fondun məqsədləri barədə məlumat verildi. Bildirildi ki, Fondun əsas məqsədləri Prezident Heydər Əliyevin zəngin irsinin öyrənilməsinə, Azərbaycanın tərəqqisinə yönəldilmiş genişmiqyaslı proqramların həyata keçirilməsini dəstəkləməkdən, müstəqil Azərbaycanın iqtisadi qüdrətinin artmasına xidmət edən layihələrin gerçəkləşdirilməsində iştirak etməkdən, əhalinin rifahının yüksəldilməsinə dair müxtəlif proqramların və tədbirlərin dəstəklənməsindən, milli-mənəvi dəyərlərin qorunması, azərbaycançılıq ideologiyasının və Azərbaycan mədəniyyətinin geniş təbliği ilə bağlı işlərin görülməsinə kömək göstərməkdən ibarətdir.
Dövlətimizin başçısı İlham Əliyev ali qonağa və nümayəndə heyətinin üzvlərinə ümummilli liderimiz Heydər Əliyevin şəxsi arxivindən götürülmüş və müxtəlif dövrlərə aid eksponatlar barədə ətraflı söhbət açdı.
Qonaqlar Heydər Əliyevin həyatının ən müxtəlif məqamlarını əks etdirən, Azərbaycan tarixinin bütöv bir dövrü barədə geniş təsəvvür yaradan çoxsaylı fotoşəkillərlə, dünyanın məşhur siyasi liderlərinin bəxş etdikləri hədiyyələrlə, ulu öndərimiz haqqında kitablarla tanış oldular.
Cənab Məhəmməd Xatəmi Azərbaycan Prezidenti Heydər Əliyevlə birgə çəkilmiş fotoşəklə xüsusi maraqla baxdı.
İran Prezidenti Məhəmməd Xatəmi Fondla tanışlıqdan sonra fəxri qonaqlar kitabına ürək sözlərini yazdı: “Mən Azərbaycanda, Bakı şəhərində avqustun 5-dən 7-dək olacağım müddətdə Heydər Əliyev Fondunu ziyarət etməyi arzu edirdim. İndi bu Fondu ziyarət etmək mənə çoxlu xatirələri yada salır və cənab Heydər Əliyevin Azərbaycanın müstəqil olması, inkişaf etməsi, ölkədə sabitlik və təhlükəsizlik şəraiti yaratması mənim bu xatirələrimi və onunla keçirdiyim görüşləri dirildir. Hamımız bilirik ki, iki qonşu və müsəlman ölkə - İran və Azərbaycan arasında yaranan əlaqələr mərhum Heydər Əliyevin rolunu göstərir və bu rol həmişəyaşardır.
Mənim bu səfərim bir daha fürsət yaratdı ki, İran İslam Respublikasının Prezidenti kimi, eləcə də İranın mədəniyyətsevən və uzun tarixi olan milləti adından cənab Heydər Əliyevin xidmətlərinə və fəaliyyətinə görə ona öz minnətdarlığımı bildirim”.
Dövlət başçıları və qonaqlar Fondun eyvanına çıxaraq, Bakının mənzərəsini seyr etdilər. Prezident İlham Əliyev şəhərdə görülən işlərdən danışdı. İran Prezidenti Bakıda geniş miqyasda dəyişikliyin yaranmasını yüksək qiymətləndirdi.
Sonra söhbət çay süfrəsi ətrafında davam etdirildi.
Prezident Məhəmməd Xatəmi Heydər Əliyev Fonduna böyük zövqlə toxunmuş Təbriz xalçası təqdim edərək dedi ki, icazənizlə, biz Heydər Əliyev Fonduna xalça bağışlayardıq. Allah ona rəhmət eləsin, ruhu şad olsun. Bu, xalçanın pasportudur. Xalça 2002-ci ildən 2004-cü ilədək toxunubdur, yəni iki il ərzində ərsəyə gəlibdir. Müəllifi Cavad Pasbandır. Qədim Təbriz şəhərində toxunmuşdur. Ölçüsü 6 metrdir və hər bir santimetrində 50 ilmə vardır. Üzərindəki güllər ipəkdəndir, bunların toxunuşunun incəlikləri xalçanın arxasından görünür. Əlbəttə, bu, rəhmətlik Heydər Əliyevin ruhuna kiçik bir hədiyyədir. Amma bunun çox incəlikləri var, onun ruhuna xatirə ola bilən incəlikləri var.
Hədiyyəni yüksək qiymətləndirən Prezident İlham Əliyev təşəkkür edərək dedi ki, bu, bizim üçün çox qiymətli və əzizdir, Heydər Əliyev Fonduna təqdim edilən ilk hədiyyədir. Bu xalçanın burada xüsusi yeri olacaqdır.
Dövlətimizin başçısı İran Prezidentinə Bakıya rəsmi səfərinin ötən hissəsini əks etdirən fotoalbom təqdim edərək, sonrakı görüşlərə dair şəkillərin də veriləcəyini bildirdi.
Prezident Məhəmməd Xatəmi fotoalboma görə təşəkkür etdi.
Bölmənin digər xəbərləri
