AZƏRBAYCAN PREZİDENTİ İLHAM ƏLİYEVİN ALMANİYA ŞİRKƏTLƏRİNİN RƏHBƏRLƏRİ İLƏ GÖRÜŞÜ
Xəbər verdiyimiz kimi, Azərbaycan Respublikasının Prezidenti İlham Əliyev fevralın 15-də Berlinin “Adlon Kempinski” mehmanxanasında Almaniyanın “Şərqi və Mərkəzi Avropa Birliyi” Cəmiyyətinin üzvü olan bir sıra şirkətlərin idarə heyətlərinin rəhbərləri və nümayəndələri ilə görüşmüşdür. Bu Cəmiyyət Almaniyanın 15-dək nüfuzlu şirkətini birləşdirir.“Şərqi və Mərkəzi Avropa Birliyi” Cəmiyyətinin rəhbəri, “Accumulatorenverke Hoppecke Gmbh” şirkətinin idarə heyətinin sədri KLAUS KSOLNER onları qəbul etdiyinə görə Prezident İlham Əliyevə dərin təşəkkürünü bildirərək dedi:
- Hörmətli xanımlar və cənablar!
Mən sizə Azərbaycan Respublikasının Prezidenti, zati-aliləri cənab İlham Əliyevi təqdim edirəm. Cənab Prezident, xoş gəlmisiniz. Mən istəyirəm, söhbətimizin əvvəlində burada işçi naharda iştirak edəcək bütün şəxslər adından Sizi bir daha salamlayaq. Buraya “Şərqi və Mərkəzi Avropa Birliyi” Cəmiyyətinə üzv olan bir sıra şirkətlərin idarə heyətlərinin rəhbərləri gəliblər. Mən bu fürsətdən istifadə edərək, bu görüşə görə Sizə təşəkkürümüzü bildirirəm. Biz bu görüş əsnasında Sizinlə və nümayəndə heyətinizlə ölkənizdə gedən proseslər barədə fikir mübadiləsi aparacağıq. Biz bilirik ki, ölkənizdə iqtisadi, siyasi və sosial sahədə çox böyük inkişaf müşahidə olunur. Eyni zamanda, qarşılaşdığınız təhdidlər, çətinliklər və imkanlarınız haqqında söhbət edəcəyik.
Biz bilirik ki, ümumi daxili məhsulun artımına görə Sizin ölkəniz gözəl nəticələrə nail olmuşdur. Siz ölkənizi daha güclü iqtisadiyyata və mütəşəkkil cəmiyyətə malik olan dövlətə çevirmək üçün, sözün əsl mənasında, səylərinizi əsirgəmirsiniz. Biz bu gün Sizin mülahizələrinizi eşitməkdən çox məmnun olarıq. Burada olan nümayəndələr - bizim idarə heyətinin üzvləri və bir sıra alman şirkətlərinin və müəssisələrinin təmsilçiləri Sizinlə görüşə gəliblər. Onlar Sizinlə tərəfdaşlar, sərmayədarlar və təchizatçılar qismində işləmək arzusundadırlar.
Mən ticarət, mühəndis işi, maliyyə və digər sahələrə aid təcrübəli şəxsləri Sizə təqdim etməkdən şərəf duyuram. Onların hamısının yetərincə imkanları və bilikləri var və Sizin ölkənizin inkişafına töhfə verə bilərlər. Eyni zamanda, biz Azərbaycana məhsul ixrac edən ölkə kimi beşinci yerdəyik. Sizin bu sahədə bizə verdiyiniz tövsiyələri yüksək qiymətləndirərdik.
O ki qaldı Almaniyanın sərmayələrinə, biz bu sahədə artıq fəaliyyət göstəririk. Biz 2006-cı ilin martında Azərbaycanda bu məsələ ilə bağlı görüş keçirmiş və yeni sərmayə sahələrini araşdırmışıq. Mən indi həmkarlardan xahiş edəcəyəm ki, onlar öz şirkətlərini təqdim etsinlər. Sonra Sizin şərhlərinizi dinləyəcək və Azərbaycanda mövcud olan potensial imkanlar barədə məlumat əldə edəcəyik.
Cənab Prezident, görüşə görə bir daha çox sağ olun.
X X X
Görüşdə iştirak edən şirkətlərin rəhbərləri və nümayəndələri böyük perspektivə malik Azərbaycan iqtisadiyyatının inkişafında yaxından iştirak etmək istədiklərini diqqətə çatdırdılar. Xatırladaq ki, həmin iqtisadi qurumlar istehsalın təşkili, təchizat və sərmayə qoyuluşu üzrə zəngin təcrübəyə malikdirlər, dünyanın ən etibarlı şirkətlərindən sayılırlar. Bu şirkətlər neft-qaz sənayesi, sement, polad və polad məmulatları istehsalı, energetika, metallurgiya, neft kimyası, gəmiqayırma, tikinti, kreditlərin verilməsi, kreditlərin sığortalanması, konsaltinq xidməti və sair sahələrdə xidmət göstərir və əksəriyyəti dünyanın onlarca ölkəsində iş qurmuş, bəzilərinin illik gəliri isə 10 milyard avronu üstələyir.
Almaniyanın Kredit və Yenidənqurma Bankının (KFW) idarə heyətinin üzvü Haynrix Hayms Avropanın və dünyanın digər ölkələrində də stimullaşdırıcı bank kimi fəaliyyət göstərərək, maliyyə ixracı və layihə maliyyələşdirməsi sahələrində əməkdaşlıq etdiklərini, məsləhət və digər xidmətlər göstərdiklərini bildirdi. Bankın səhmlərinin 80 faizi Almaniya hökumətinə, qalan 20 faizi federal əyalətlərə məxsusdur. Almaniyanın 10 ən iri bankından biri olan KFW 1994-cü ildən Azərbaycanda həyata keçirilən müxtəlif layihələrdə fəal iştirak edir.
“Euler Hermes Kreditverşixerungs AG” şirkəti də görüşdə təmsil olunurdu. Bu şirkətin əsas fəaliyyəti alman iş adamları tərəfindən xaricdə biznes fəaliyyətinin qurulması üçün əldə etdikləri kreditlərin sığortalanmasından ibarətdir.
60 ölkədə nümayəndəlikləri olan “ThussenKrupp Services AG” şirkəti polad və polad məmulatları, digər sənaye məhsulları istehsalı və bu sahələr üzrə xidmətlərin göstərilməsi üzrə dünyanın aparıcı şirkətlərindən biridir. Son 2-3 ildə şirkətin illik gəliri 12-13 milyard avro olmuşdur. Uçot, hesablama və konsaltinq xidmətləri və digər fəaliyyət sahəsi ilə məşğul olan “Price Vaterhous Coopers” şirkəti də Azərbaycanda çalışmaq istəyini bildirdi. “MAN Ferrostaal AG” və digər şirkətlərin təmsilçiləri də Azərbaycanla energetika, metallurgiya, neft kimyası, polad istehsalı, gəmiqayırma və sair sahələrdə əməkdaşlıq etmək arzusunda olduqlarını vurğuladılar.
Azərbaycan Prezidenti İlham Əliyev görüşdə çıxış etdi.
Bölmənin digər xəbərləri
