AZƏRBAYCAN PREZİDENTİ İLHAM ƏLİYEVİN ALMANİYADA FƏALİYYƏT GÖSTƏRƏN AZƏRBAYCAN CƏMİYYƏTLƏRİNİN SƏDRLƏRİ İLƏ GÖRÜŞÜ
AZƏRTAC-ın xüsusi müxbirləri xəbər verirlər ki, Azərbaycan Respublikasının Prezidenti İlham Əliyev fevralın 15-də “Adlon Kempinski” mehmanxanasında Almaniyada fəaliyyət göstərən Azərbaycan cəmiyyətlərinin sədrləri ilə görüşmüşdür.
Dövlətimizin başçısı görüşü açaraq dedi ki, Almaniya bizim üçün dost, vacib və tərəfdaş ölkədir. Azərbaycan ilə Almaniya arasında, eləcə də Azərbaycan ilə Avropa İttifaqı arasında əməkdaşlıq uğurla gedir və bu istiqamətdə siyasətimizi davam etdiririk.
Avropanın enerji təhlükəsizliyi məsələsində Azərbaycanın rolundan danışan Prezident İlham Əliyev Avropa İttifaqı ilə “Yeni qonşuluq siyasətinə dair fəaliyyət planı”nın, enerji məsələləri üzrə strateji tərəfdaşlığa dair anlaşma memorandumunun imzalanmasının əhəmiyyətindən danışdı və bunun ölkəmiz üçün böyük fayda verəcəyini vurğuladı. Dövlətimizin başçısı dedi ki, Azərbaycan regionda lider dövlətdir, iqtisadi cəhətdən sürətlə inkişaf edən ölkədir, regional və beynəlxalq əhəmiyyətli layihələri uğurla həyata keçirmişdir və bu siyasət davam etdirilir. Avropaya inteqrasiya siyasətimizin əsas prioritet istiqamətidir. Avropa İttifaqı ilə əməkdaşlıq planında, əsasən, insan hüquqlarının qorunması, demokratik inkişaf prosesləri öz əksini tapmışdır və bu istiqamətdə səylərimizi davam etdiririk. Azərbaycanın artıq Avropada və beynəlxalq aləmdə çəkisi artmışdır. İstəyirik dünyada yaşayan azərbaycanlılar birləşsinlər, onların vəziyyəti yaxşı olsun. Azərbaycanın müstəqilliyinin möhkəmlənməsində xaricdəki soydaşlarımızın da üzərinə böyük vəzifənin düşdüyünü bildirən Prezident İlham Əliyev dünya azərbaycanlılarının Bakıda keçirilən II qurultayının əhəmiyyətinə toxundu, eyni zamanda, həmvətənlərimizin müdafiə olunması, onlara kömək göstərilməsi istiqamətində səylər göstəriləcəyini bildirdi.
Prezident İlham Əliyev daha sonra dedi ki, Azərbaycan dövləti artıq qüdrətlənir, xaricdə yaşayan azərbaycanlılar da bizim üçün dayaqdır, arxadır. Artıq Azərbaycan 50 ölkədə diplomatik nümayəndəliyini açmışdır. Avropanın bütün ölkələrində səfirliklərimiz vardır. Gələcəkdə mədəniyyət evlərinin yaradılması nəzərdə tutulur. Çevik xarici siyasət ölkəmizə uğurlar gətirir, dünya ölkələri ilə bərabər səviyyədə, açıq siyasət aparılır. Bizim beynəlxalq mövqeyimiz möhkəmlənibdir.
Dövlətimizin başçısı Ermənistan-Azərbaycan, Dağlıq Qarabağ münaqişəsindən danışarkən vurğuladı ki, bu problemi həll etmək üçün biz güclü olmalıyıq və bu baxımdan soydaşlarımızın da köməyinə ehtiyac vardır. Xarici ölkələrdəki Azərbaycan cəmiyyətləri ilə səfirliklər birgə işləməlidir, ölkəmizin təbliği, mövqeyinin daha yaxşı qorunması işində əllərindən gələn köməyi əsirgəməməlidir. Azərbaycan özünü dünyada daha layiqli təqdim etməlidir.
Prezident İlham Əliyev Bakı-Tbilisi-Ceyhan, Bakı-Tbilisi-Ərzurum neft və qaz kəmərlərinin, Bakı-Tbilisi-Qars dəmir yolu layihəsinin beynəlxalq əhəmiyyət daşıdığını bildirdi, Avropa ilə Asiyanı birləşdirəcək bu yolun Azərbaycan üçün və dünya üçün önəmini vurğuladı.
Dövlətimizin başçısı xarici səfərlərində soydaşlarımızla görüşdüyünü, onların problemləri ilə maraqlandığını bildirərək dedi ki, ölkəmizin Avropaya inteqrasiyasında Almaniyada yaşayan azərbaycanlılar da fəal olmalıdırlar. Gələcək illərdə müxtəlif ölkələrdə Azərbaycan mədəniyyəti günləri keçiriləcək, sərgilər təşkil olunacaqdır və bu, ölkəmizlə bağlı məlumatları daha da zənginləşdirəcəkdir.
Görüşdə Avropa Azərbaycanlıları Konqresinin sədri Bahəddin Kaya, Avropa-Azərbaycan Strateji Araşdırmalar Mərkəzinin sədri Başar Kömür, Alman-Azərbaycan Forumunun üzvü Samirə İsmayılova, Köln Universitetinin professoru, Alman-Azərbaycan Forumu sədrinin müavini Rza Talibi Dəryani çıxış etdilər.
Prezident İlham Əliyev görüşə yekun vurdu.
Görüşün sonunda dövlətimizin başçısına rəsm əsərləri, kitablar, disklər və digər xatirə hədiyyələri təqdim olundu.
(Ətraflı məlumat qəzetin növbəti nömrələrində dərc ediləcəkdir).
Bölmənin digər xəbərləri
