Hörmətli xanımlar və cənablar!

 Hörmətli cənab Prezident, mən Sizi və Polşadan gəlmiş nümayəndə heyətinin bütün üzvlərini Azərbaycanda bir daha salamlayıram. Ölkəmizə xoş gəlmisiniz! Əminəm ki, bu səfər çox uğurlu olacaq və səfərin nəticələri də bizim aramızda olan münasibətlərin inkişafında çox böyük rol oynayacaqdır.

Polşa ilə Azərbaycan arasında əlaqələr çox uğurla inkişaf edir. Azərbaycan öz müstəqilliyini bərpa etdikdən sonra biz həmişə Polşanın dəstəyini hiss etmişdik. Həm ikitərəfli münasibətlərimiz çox uğurludur, səmimidir və dostluq əsasında qurulubdur, eyni zamanda, Polşa Avropa İttifaqına və NATO-ya daxil olandan sonra Azərbaycanın Avratlantik inteqrasiyada atdığı addımları da həmişə dəstəkləmişdir. Xüsusilə Avropa İttifaqı ilə Azərbaycan arasında “Yeni qonşuluq siyasətinə dair fəaliyyət planı”nın imzalanmasında Polşanın çox böyük rolu olmuşdur və buna görə biz sizə öz minnətdarlığımızı bildirmək istəyirik.

Bu gün bizim aramızda çox açıq, səmimi diskussiya, müzakirələr olmuşdur. İkitərəfli münasibətlər təhlil olunmuş və gələcək əməkdaşlıq haqqında fikir mübadiləsi aparılmışdır. Xüsusilə bizim regionda mövcud olan vəziyyət, perspektivlər, təhlükələr geniş şəkildə müzakirə edilmişdir. Regionda gərginlik yaradan münaqişələr və onların həlli yolları geniş müzakirə olunmuşdur. Mən cənab Prezidentə Ermənistan-Azərbaycan, Dağlıq Qarabağ münaqişəsinin tarixini çatdırdım, eyni zamanda, danışıqlar prosesində əldə olunan nailiyyətlər və problemlər haqqında geniş söhbət açıldı.

Polşa Azərbaycanın ərazi bütövlüyünü həmişə dəstəkləmişdir və bu, bizim üçün çox önəmlidir, vacibdir.

Energetika sahəsində mümkün olan əməkdaşlıq haqqında da danışdıq və bildiyiniz kimi, Azərbaycan bu sahədə öz siyasətini uğurla aparır. Bizim neft strategiyamız Azərbaycan xalqının rifah halının yaxşılaşdırılmasına yönəldilibdir. Eyni zamanda, regional məsələlərə də öz təsirini göstərir. Bizim siyasətimiz müstəqil siyasətdir və Azərbaycan xalqının milli maraqlarının üstündə qurulubdur və bütün dost ölkələrlə bütün sahələrdə, o cümlədən bu sahədə də əməkdaşlıq etmək fikrindəyik. Azərbaycanın artan enerjidaşıyıcıları dünya, Avropa bazarlarına çıxarılır və Polşa ilə bu sahədə əməkdaşlıq da çox uğurlu ola bilər. Biz bu sahəyə böyük əhəmiyyət veririk və ümid edirəm ki, gələcəkdə bizim əməkdaşlığımızın yeni formaları da yaranacaqdır.

Eyni zamanda, Avropa İttifaqı-Azərbaycan münasibətləri müzakirə olundu və bu sahədə də bizim aramızda fikir ayrılığı yoxdur. Əksinə, bizim fikirlərimiz üst-üstə düşür və bir daha demək istəyirəm ki, Azərbaycanın Yeni qonşuluq siyasətinə qoşulması, eyni zamanda, Avropa İttifaqı ilə energetika sahəsində strateji tərəfdaşlıq haqqında memorandum imzalanması bizim niyyətimizi açıq şəkildə ifadə edir. Bu, bizim üçün çox önəmli istiqamətdir və əminəm ki, bu vaxta qədər olduğu kimi, Polşa bundan sonra da Azərbaycanı bu işlərdə dəstəkləyəcəkdir.

Bütövlükdə deyə bilərəm ki, bizim söhbətimiz çox səmimi şəkildə keçmişdir. Biz bir-birimizi tanıyırıq, əvvəllər də görüşmüşük və bu söhbətlər əvvəlki illərdə yaranmış səmimi münasibətlərin davamıdır. Eyni zamanda, ölkələrimizin arasında da münasibətlər çox səmimidir, çox açıqdır və biz bundan çox məmnunuq.

Beləliklə, artıq indidən demək olar ki, səfərin nəticələri çox uğurludur. İmzalanmış birgə sənəd bizim siyasi niyyətimizi əks etdirir. Əminəm ki, nümayəndə heyətinin üzvləri burada bütün sahələrdə öz həmkarları ilə geniş fikir mübadiləsi aparacaqlar və beləliklə, bizim dostluğumuz davam edəcək, əməkdaşlığımız daha da möhkəmlənəcəkdir.

Əziz qonaqlar, mən sizi Azərbaycanda bir daha salamlayıram. Əminəm ki, sizin Azərbaycana səfəriniz xoş keçəcək və vətəninizə xoş təəssüratlarla gedəcəksiniz. Sağ olun.