AZƏRBAYCAN PREZİDENTİ İLHAM ƏLİYEVİN ÇIXIŞI
- Çox sağ olun. Mən sizin hamınızı görməkdən çox şadam. Sizin bəzilərinizlə biz Bakıda və burada görüşmüşdük. Hesab edirəm, bu, çox gözəl bir fürsətdir ki, biz yenidən bir-birimizi görürük. Həyat davam edir, ölkələrimiz inkişaf edir.Almaniyada 2004-cü ildə olduqdan sonra, hesab edirəm, bizim planlarımız, proqramlarımız daha da artmışdır, xüsusən də enerji sahəsində bütün layihələr yerinə yetirilir. İndi isə vaxt gəlib çatıb ki, Azərbaycanın digər sahələrinə diqqət yetirək. Bizim bir çox ideyalarımız var, qəbul edilmiş çoxlu proqramlarımız var. Burada tikinti, infrastrukturun inkişaf etdirilməsi, xidmətlər, turizm və iqtisadiyyatın digər sahələrini nəzərdə tuturuq. Təbii ki, son iki il ərzində Azərbaycanın dinamik inkişaf həcmi ümumilikdə 60 faiz təşkil etmişdir. Bu il isə təqribən 30 faiz olacaqdır. Bu o deməkdir ki, biz ümumi daxili məhsulu iki dəfə artırmış olacağıq. Bütün bunlar biznesin inkişafı və daha böyük infrastruktur layihələrinin həyata keçirilməsi üçün imkanlar yaradır. Bütün bu işlərin ən vacib elementi ondan ibarətdir ki, Azərbaycanda fəaliyyət göstərən və göstərəcək bütün şirkətlər işləri ən yüksək standartlara uyğun aparmalıdırlar. Bilirik ki, sizin ölkənizdə yüksək standartlar var. Beynəlxalq standartlar artıq təsbit olunubdur. İstəyirik ki, bizim ölkəmizdə də şirkətlərimiz bu standartlara uyğun işləsin. Alman şirkətləri ilə işləmək bizə, bizim sahibkarlara çox yaxşı təcrübə verə bilər. Bu da bizim üçün daha güclü imkanlar açır.
Ümumiyyətlə, iqtisadiyyatımız neftin və qazın qiymətlərindən asılı olmayacaqdır. Bu, bizim məqsədimiz, gündəliyimizdir. Bu gün artıq biz gözəçarpan maliyyə resurslarına malikik və xarici sərmayələrin cəlbini də davam etdirmək istəyirik. Ancaq bunu iqtisadiyyatda yeganə yol kimi görmürük. Artıq bizim öz resurslarımız var və bunları istifadə etmək istəyirik. Biz Dövlət İnvestisiya Şirkəti yaratmışıq, onun öz kapitalı var. Bununla bağlı büdcəmizdə xüsusi vəsaitlər var. Onlar əsasən infrastruktur - elektrik stansiyalarının, məktəblərin və xəstəxanaların tikilməsi, yolların çəkilməsi üçün ayrılacaqdır. Bütün bunlar biznes mühitinin daha da yaxşılaşdırılması üçün zəmin yaradacaq və hesab edirəm ki, bizim əməkdaşlığımız çox uğurlu olacaqdır.
Ümumiyyətlə, Almaniya ilə bizim çox yüksək səviyyədə təmaslarımız var. Bu, mənim Almaniyaya ikinci rəsmi səfərimdir. Təbii ki, bizim iqtisadi sahədə də bir çox imkanlarımız var və Azərbaycanda işləmək arzusunda olan şirkətlərin də sayı çoxdur. Bu görüş də həmin tərəfdaşlığın rəmzidir. Sağ olun.
X X X
Sonra söhbət süfrə arxasında davam etdirildi.
Bölmənin digər xəbərləri
