AZƏRBAYCAN PREZİDENTİ İLHAM ƏLİYEVİN QUSARA SƏFƏRİ
AZƏRTAC-ın xüsusi müxbiri xəbər verir ki, Azərbaycan Respublikasının Prezidenti İlham Əliyev iyulun 28-də Qusara gəlmişdir.
Dövlətimizin başçısını şəhərin girəcəyində minlərlə insan səmimiyyətlə, böyük hörmət və ehtiramla, gül-çiçək dəstələri ilə qarşıladı. Onların əllərində Azərbaycanın dövlət bayraqları, ümummilli lider Heydər Əliyevin və Prezident İlham Əliyevin portretləri, respublikamızın rəhbərini salamlayan şüarlar yazılmış transparantlar var idi.
Dövlətimizin başçısı İlham Əliyevə və onun xanımı Mehriban Əliyevaya gül dəstələri təqdim olundu.
Sonra Prezident İlham Əliyev Qusar Olimpiya İdman Kompleksinin təməlqoyma mərasimində iştirak etmək üçün tikinti yerinə gəldi. Burada da dövlətimizin başçısını böyük hörmətlə qarşıladılar. Gənc idmançılar və uşaqlar Prezidenti hərarətli alqışlarla salamladılar.
Dövlətimizin başçısı əvvəlcə layihə sənədləri ilə tanış oldu. Gənclər, idman və turizm naziri Əbülfəz Qarayev məlumat verərək bildirdi ki, bu obyekt 15 hektar sahəni əhatə edir. Olimpiya kompleksi açıq və qapalı idman qurğularından ibarət olacaqdır.
Azərbaycan Prezidenti kompleksə daxil olan müxtəlif təyinatlı idman salonlarının, əsas inzibati binanın, yardımçı otaqların, mini futbol, basketbol, voleybol meydançalarının, açıq və qapalı tennis kortlarının və digər qurğuların layihələri ilə tanış oldu. Prezident İlham Əliyevə məlumat verildi ki, burada turizm və istirahət kompleksi də yaradılacaqdır. Kompleksdə 20 kottec, mehmanxana tikiləcəkdir.
Azərbaycan Prezidenti və Milli Olimpiya Komitəsinin rəhbəri İlham Əliyevin ölkədə qış idman növlərinin inkişafı ilə bağlı müvafiq nazirliklərə və qurumlara verdiyi tapşırıqlara əsasən, Qusarda dağ xizəkçiliyi idmanı və istirahət kompleksinin yaradılması üzərində iş gedir. Kompleksin Qusar şəhərində 38 kilometr aralıda - Şahdağın ətəyində yaradılması qərara alınmışdır. Dövlətimizin başçısına kompleksin layihə sənədləri təqdim olunarkən bildirildi ki, 10 kvadratkilometrdən çox ərazidə xizək sürmək üçün enişlər salınacaq, mehmanxana kompleksi tikiləcək, kanat yollar çəkiləcək, qış idman növləri ilə məşğul olmaq və turizmin inkişafı üçün əlverişli şərait yaradılacaqdır. Regional və beynəlxalq yarışların keçirilməsi üçün hər cür imkana malik bu kompleksin Qafqazda analoqu olmayacaqdır. Kompleksin yerinin seçilməsi və onun smeta sənədlərinin hazırlanması Fransanın tanınmış mütəxəssislərinə həvalə olunub və indi onların təklifləri müzakirə edilir.
Azərbaycan Prezidenti İlham Əliyev idman-istirahət komplekslərinin bir il müddətində dünya standartlarına uyğun tikilib başa çatdırılması ilə bağlı tapşırıq və tövsiyələrini verdi.
Sonra dövlətimizin başçısı Qusar Olimpiya İdman Kompleksi və turizm bazasının təməlinə xatirə gilizini qoydu və ilk beton qarışığını tökdü.
X X X
Bildirildi ki, 10 kvadratkilometrdən çox ərazidə mehmanxana kompleksi tikiləcək, 9 min metr uzunluğunda kanat yollar çəkiləcək, qış idman növləri ilə məşğul olmaq və turizmin inkişafı üçün əlverişli şərait yaradılacaqdır. Regional və beynəlxalq miqyaslı yarışların keçirilməsi üçün hər cür imkana malik bu kompleksin Qafqazda analoqu olmayacaqdır. Kompleksin yerinin seçilməsi və onun smeta sənədlərinin hazırlanması Fransanın tanınmış mütəxəssislərinə həvalə olunub və indi onların təklifləri müzakirə edilir. İnşaat işlərini həyata keçirəcək Fransanın “CHAMBRE VİBERT” şirkəti indiyədək dünyanın bir çox ölkələrində ən müasir qış idman kompleksləri tikmişdir.
Xizək yollarının uzunluğu 30 kilometr olacaq və bu layihəyə 50 milyon avro sərmayə qoyulacaqdır. Bu ildən Şamaxıda da dağ xizəkçiliyi inkişaf etdirilir və bunun üçün 100 ədəd idman geyimi alınacaqdır.
Azərbaycan Prezidenti İlham Əliyev idman-istirahət komplekslərinin bir il müddətində və dünya standartlarına uyğun tikilib başa çatdırılması ilə bağlı tapşırıq və tövsiyələrini verdi, beynəlxalq yarışların da keçirilməsinin mümkünlüyünü nəzərə alaraq, tamaşaçı yerlərinin sayını 3 minə çatdırmağın vacibliyini vurğuladı. Eyni zamanda, dedi ki, gözəl iqlimə malik bölgələrdə idman komplekslərinin yaradılması ölkəmizdə turizmin inkişafına da müsbət təsir göstərəcəkdir. Dövlətimizin başçısı hazırda Quba Olimpiya Kompleksində keçirilən voleybol yarışına yerli əhalinin və ölkəmizin qonaqlarının böyük maraq göstərdiyini misal gətirərək bildirdi ki, regionlarımızın Avropa səviyyəsinə çatdırılması üçün bütün tədbirlər görülməlidir. Ölkəmizdə qış idman növlərinin, o cümlədən dağ xizəkçiliyinin inkişafı faydalı olacaqdır. Biz gərək maksimum dörd ay ərzində bu işlərə başlayaq. Əgər başlasaq, işlər daha da sürətlə gedəcəkdir. Ondan sonra başqa firmalar da maraq göstərəcəklər. Görəndə ki, burada infrastruktur, şərait var, artıq qaldırıcı qurğular qurulub, digər firmalar da gələcəkdir.
Sonra dövlətimizin başçısı Qusar Olimpiya İdman Kompleksi və turizm bazasının təməlinə xatirə gilizini qoydu və ilk beton qarışığını tökdü. Xatirə gilizinin içərisindəki kağıza bu sözlər yazılmışdır: “Azərbaycan xalqının ümummilli lideri Heydər Əliyevin ideyalarının dönmədən həyata keçirilməsi sayəsində gündən-günə çiçəklənən respublikamızın dilbər guşəsi olan Qusar rayonu sakinlərinə, müstəqil dövlətimizin sədaqətli vətəndaşlarına töhfə olaraq inşa edilən bu Olimpiya İdman Kompleksi hər bir qusarlıya sağlam həyat, Azərbaycanımızın idman tarixinə qızıl səhifələr bəxş etsin.
Qusarlılara hörmət və ehtiramla,
Azərbaycan Respublikasının Prezidenti
İlham Əliyev
28 iyul, 2005-ci il”.
Bölmənin digər xəbərləri
