- Müşavirə çox səmərəli oldu, çox vacib məsələlər müzakirə edildi. Əminəm ki, bölgənin indi və gələcək üçün vacib olan məsələləri bu gün öz həllini tapıbdır və tapacaqdır. İqtisadiyyatın müxtəlif sahələrini və gedən prosesləri təhlil etdik. Yolların çəkilməsi, kənd təsərrüfatının, turizmin, sahibkarlığın inkişafı - bütün istiqamətlərdə işlər daha da sürətlə getməlidir. Görülən işlər məni qane edir, mövcud olan bütün problemlərə baxmayaraq, çox sürətlə inkişaf edirik. Əlbəttə ki, enerjiyə olan tələbat da daha böyük həcmdə ödənilməlidir. 

Məktəblərin tikintisinə də toxunuldu. Bu, bizim böyük problemimizdir. Azərbaycanda 400-500-dən çox məktəb var ki, yararsız vəziyyətdədir, uzun illərdir təmir olunmur. Bəziləri qəza vəziyyətindədir. Heydər Əliyev Fondu tərəfindən qəza vəziyyətində olan məktəblərin tikintisi təşəbbüsü irəli sürülmüşdür. 130-dan çox məktəb tikilir. Sentyabrın 15-nə onlar hazır olacaqdır. Amma bununla məsələ bitmir. Bu, çox böyük, genişmiqyaslı və çox böyük vəsait tələb edən proqramdır. Gələn ilin büdcəsində bunu nəzərdə saxlamalıyıq. Bizim uşaqlarımız müasir şəraitdə oxumalıdırlar, məktəblərin istilik sistemləri olmalıdır, uşaqlar qışda üşüməməlidirlər. Partalar, digər ləvazimat olmalıdır. Biz indi bütün məktəbləri internet sisteminə qoşuruq. 4500 məktəbdə kompüter sinifləri olacaqdır. Kompüter sinfi olan yerdə gərək başqa şərait də yaxşı olsun. Amma yenə də deyirəm, uzun illər bu sahəyə vəsait az ayrılırdı, yəni imkan daxilində ayrılırdı. Bu gün imkan var və gələn ilin büdcəsində böyük həcmdə vəsait nəzərdə tutmalıyıq ki, məktəblərin tikintisi sürətlə getsin. Azərbaycanda yararsız vəziyyətdə olan bir dənə də məktəb qalmamalıdır.

Bu gün biz daha çox iqtisadi-sosial məsələlərə vaxt sərf etdik və bu da təbiidir. Bu bölgənin böyük potensialı var. İnkişaf sürətlə gedir. Ancaq eyni zamanda, gərək başqa məsələləri də unutmayaq. İlk növbədə insanlara qarşı münasibət, diqqət, qayğı yüksək səviyyədə olmalıdır. Mən bütün bölgələrdə olarkən icra hakimiyyətlərinin başçılarından bunu tələb edirəm. Məmnunam ki, bu sahədə işlər görülür.

Mənə çoxlu ərizələr verilir, şikayət məktubları verilir. Bütün bu məktublar yığılır, təhlil olunur. Onların, demək olar ki, əksəriyyəti şəxsi məsələlərlə bağlıdır. Kiminsə xəstəsi var, kimsə xahiş edir ki, müalicəyə göndərilsin. Kiminsə qohumu, yaxud əri, ya qardaşı həbsdədir. Belə məktubların sayı həddən artıq çoxdur və xahiş olunur ki, onların işlərinə yenidən baxılsın, yaxud da əfv olunsunlar. Təhlil onu göstərir ki, əhalini narahat edən ümumi məsələlərin məktublarda əks olunması azalır. Yəni bu, o deməkdir ki, ümumi məsələlər öz həllini tapır.

Əhalini narahat edən ciddi məsələlər, tutaq ki, elektrik enerjisi, su, qaz, yaxud hansısa bir ədalətsizlik, belə hallar azalır. Ərizələrdə daha çox xahişlər, müraciətlər səslənir. Bu, müsbət bir haldır və onu göstərir ki, ölkədə ciddi problemlərin kəskinliyi azalmaqdadır. Bu, görülən işlərin nəticəsində, aparılan və davam etdirilən islahatlar nəticəsində yaranmış vəziyyətdir. Bütövlükdə onu göstərir ki, ölkə düzgün istiqamətdə inkişaf edir. Çünki bu məktublar mənə uzun illərdir ki, gəlir. Hələ mən Milli Məclisin deputatı kimi fəaliyyət göstərəndə həmişə bütün məktublara cavab verirdim, onları təhlil edirdim. Əlbəttə, indi məktubların sayı qat-qat çoxalıbdır. Təhlil aparanda bunu görürük. Bu da müsbət haldır. Ancaq fərdi qaydada vətəndaşların ərizələrinə daha da böyük diqqətlə yanaşılmalıdır. Harada imkan varsa, kömək edilməlidir. İmkan yoxdursa, mərkəzi orqanlara müraciət olunmalıdır. Mən demişəm, əgər insanı heç nə narahat etmirsə, incitmirsə, o, heç vaxt ərizə ilə saatlarla gözləməyəcək, heç vaxt başqa rayondan, şəhərdən mən gələn yerə gəlməyəcək. Əgər gəlirsə, deməli, onu doğrudan da nəsə narahat edir. Ona görə, insanlara diqqət göstərmək, onlara xidmət etmək bizim vəzifəmizdir və icra hakimiyyətlərinin başçılarından tələb edirəm ki, bu məsələyə daim böyük diqqət göstərsinlər.

Parlament seçkiləri yaxınlaşır, noyabr ayında seçkilər keçiriləcəkdir. Seçkilərə hazırlıq çox yaxşı gedir. Lazım olan bütün məsələlər öz həllini tapır. Bilirsiniz ki, bir müddət bundan əvvəl mən seçki praktikasının təkmilləşdirilməsinə dair Sərəncam imzaladım. Artıq seçki kampaniyasına başlanmışdır. Kampaniya çox rahat, sakit keçir. Artıq yüzlərlə insan seçki vərəqələrini almışlar. Deputatlığa namizəd olmaq, parlamentə seçilmək istəyirlər. Bu, onu göstərir ki, seçkilərə və seçkilərin ədalətli keçiriləcəyinə insanların inamı çox böyükdür. Əgər bu olmasaydı, indiyədək 400-500 insan öz namizədliyini irəli sürməzdi. Özü də onların tam əksəriyyəti cəmiyyətdə o qədər də tanınmayan insanlardır. Əgər onlar öz namizədliklərini irəli sürürlərsə, deməli inanırlar ki, seçkilər ədalətli keçəcəkdir. Bu, həqiqətən də belədir. Mən əminəm ki, seçkilər ədalətli keçəcək, Azərbaycan xalqının iradəsi, 2003-cü ildə keçirilmiş prezident seçkilərində olduğu kimi, tam mənada öz əksini tapacaqdır.

Yerli icra orqanlarından tələb edirəm ki, seçkilərin ədalətli, şəffaf keçirilməsi üçün şərait yaratsınlar. Bütün namizədlərə eyni şərait yaradılmalıdır. Mitinqlərin keçirilməsi üçün, namizədlərin insanlarla görüşlərini təşkil etməsi üçün lazımi şərait yaradılmalıdır, heş bir maneçilik törədilməməli, heç bir məhdudiyyət qoyulmamalıdır. Azərbaycan xalqı müdrik xalqdır. Yaxşını pisdən ayıra bilir və dəstəklədiyi namizədə öz səsini verəcəkdir. Yerli icra orqanları seçki prosesinə müdaxilə etməməlidirlər. Şəraiti yaratmalıdırlar, amma bu prosesə müdaxilə etməməlidirlər. Biz seçkiləri ən yüksək səviyyədə keçirməliyik və keçirəcəyik də. Əminəm ki, yeni formalaşacaq parlament Azərbaycan xalqının iradəsini əks etdirəcəkdir. Xalqın arzularını yerinə yetirəcək və Azərbaycanda demokratiyanın inkişafına növbəti böyük və güclü təkan veriləcəkdir.

Mən bir daha demək istəyirəm ki, bu müşavirə çox səmərəli keçdi. Sizi bir daha əmin etmək istəyirəm ki, Azərbaycanın Prezidenti kimi mən öz vəzifə borclarımı bundan sonra da inamla yerinə yetirəcəyəm. Mən xalqın dəstəyinə, inamına arxalanıram. Mənim güc mənbəyim də xalqdır. Xalq məni seçib, mənə inanıb, mən də gərək xalqa ləyaqətlə xidmət edim və bunu etməyə çalışıram.

Sizə də tövsiyə edirəm ki, öz yerinizdə səmərəli işləyəsiniz. Mövcud olan bütün problemləri həll edəsiniz, insanlara daha böyük diqqətlə yanaşasınız ki, biz ölkəmizi daha da gücləndirək, zəngin və qüdrətli dövlətə çevirək. Bu işdə sizin hamınıza uğurlar arzulayıram.

Sağ olun.