Bu gün burada şəhər icra hakimiyyəti başçısının məlumatını dinlədik. Şəhərdə gedən proseslər haqqında məlumat verildi. Eyni zamanda, iqtisadi inkişaf naziri ölkə iqtisadiyyatında gedən meyllər haqqında məlumat verdi. Azərbaycan üçün ən mühüm sahə olan energetika sektorundakı vəziyyət haqqında Azərenerji Səhmdar Cəmiyyətinin prezidenti məlumat verdi.

Qeyd etməliyəm ki, bütün sahələrdə müşahidə olunan mənzərə çox müsbətdir. Bu da təbiidir. Çünki son 10 il ərzində xalqımızın ümummilli lideri Heydər Əliyev tərəfindən aparılmış siyasət bütün sahələrdə böyük uğurlara, nailiyyətlərə çatmağa imkan vermişdir. Ötən 10 il ərzində ölkə iqtisadi cəhətdən güclənmiş, iqtisadi potensial daha da artmış, yeni müəssisələr, iş yerləri açılmışdır. Azərbaycan üçün ən böyük əhəmiyyət kəsb edən irimiqyaslı layihələr – Bakı-Tbilisi-Ceyhan neft kəməri tikilməyə başlamışdır. Bu tikinti uğurla davam etdirilir. Səhər mən Yevlaxda bunun şəxsən şahidi olmuşam. Bir sözlə, son illər ərzində əldə etdiyimiz uğurlar Azərbaycanın daha da sürətlə inkişafına imkan verir.

Ölkəmizin qarşısında duran mühüm məsələlərdən biri dünyada özünə layiq yer tutmaqdır. Bu məsələ də öz həllini tapmışdır. Heydər Əliyev diplomatiyasının nəticəsində Azərbaycan dünya birliyində çox dəyərli bir ölkəyə çevrilmişdir. Azərbaycanla hesablaşırlar və ölkəmizin iştirakı olmadan regionda heç bir layihə həyata keçmir. Həm bölgədə, həm də bütün dünyada bizim nüfuzumuz artmışdır.

Ordu quruculuğu sahəsində böyük işlər görülmüşdür. Bilirsiniz ki, 1993-cü ilə qədər Azərbaycanda, demək olar ki, ordu yox idi. Ayrı-ayrı, heç kimə tabe olmayan silahlı birləşmələr siyasi qrupların təsiri altına düşmüşdülər və bəzi hallarda qeyri-qanuni hərəkətlərə yol verirdilər. Bu sahədə də böyük uğurlar əldə edilmişdir. Azərbaycanın qüdrətli ordusu var. Bu ordu qarşıda duran bütün vəzifələri həll etməyə qadirdir.

Azərbaycan öz enerji təhlükəsizliyini möhkəmləndirmişdir. Ölkəmiz bütün başqa sahələrdə, xüsusilə sosial sahədə də böyük uğurlar əldə etmişdir. Bu gün biz bu istiqamətdə əldə olunmuş böyük nailiyyətlərdən danışa bilərik. Ölkəmizdə ən çətin vəziyyətdə yaşayan, sosial cəhətdən ən az müdafiə olunan qaçqınlarımız və köçkünlərimiz də bu gün dövlət qayğısını hiss edirlər, onlar üçün yeni qəsəbələr, şəhərciklər salınır, xəstəxanalar, məktəblər, digər infrastruktur yaradılır. Bu gün biz yeni qəsəbənin açılışında iştirak etdik. Demək istəyirəm ki, son on ildə ölkənin qarşısında duran ən vacib, ən önəmli məsələlər öz həllini tapmışdır. Bu gün mən burada olarkən bir daha 1970-ci illəri xatırlayıram. Xüsusilə, Azərbaycan DRES-də olarkən həmin illəri xatırladım. Hamımız bilirik ki, bu müəssisə Azərbaycanın mühərrikidir, ölkəmizin döyünən ürəyidir. Azərbaycanı elektrik enerjisi ilə təmin edən nəhəng bir müəssisədir.

Bu müəssisənin yaradılmasında da xalqımızın ümummilli lideri Heydər Əliyevin müstəsna xidmətləri olmuşdur. Bu stansiya məhz Azərbaycanda tikilmişdir. Halbuki, o zaman biz Sovetlər İttifaqında yaşayırdıq və bu müəssisə istənilən yerdə, bizim regionumuzun digər respublikalarında tikilə bilərdi. Heydər Əliyevin uzaqgörənliyi, qətiyyəti, xalqa və millətə olan məhəbbəti bu stansiyanın Azərbaycanda tikilməsinə imkan verdi. Bu gün belə bir stansiyanın tikilməsinə ən azı 2 milyard dollar həcmində vəsait sərf olunardı. Təbii ki, Azərbaycanda belə imkanlar yoxdur. Əgər o vaxt stansiya tikilməsəydi, bu gün Azərbaycan enerji təhlükəsizliyi baxımından çox çətin vəziyyətdə olardı. Biz bu baxımdan ya kimdənsə asılı vəziyyətə düşəcəkdik, yaxud da ümumiyyətlə, elektrik enerjisindən məhrum olacaqdıq. Bu halda, ümumiyyətlə, iqtisadiyyat inkişaf edə bilməzdi.

Digər sahələrdə də o zaman böyük uğurlar qazanılmışdır. Vaxtilə Azərbaycanda böyük neft potensialı, infrastruktur, neft emalı zavodları, xüsusilə bu gün Heydər Əliyevin adını daşıyan neft emalı zavodu yaradılmışdır. Bu zavod məhz onun fəaliyyəti nəticəsində tikilmişdir və bu gün müəssisə ən yüksək standartlara cavab verir, xarici ölkələrə neft məhsulları ixrac edir. Azərbaycanda fəaliyyət göstərən dərin dəniz özülləri zavodu üçün texnologiyanı vaxtilə Heydər Əliyev Fransadan gətirtməsəydi, bu gün ümumiyyətlə platformalar tikilməzdi və indi dənizdə qazma işlərindən söhbət gedə bilməzdi.

Bütün bu məsələlərə diqqət yetirəndə görürsən ki, Azərbaycanın bugünkü uğurlarının təməli məhz 1970-ci illərdə qoyulmuşdu və 1993-cü ildən sonra bu proses davam etdirilmişdir. Düzdür, 1980-ci illərin sonlarında və 90-cı illərin əvvəllərində Azərbaycana rəhbərlik edən səriştəsiz, bacarıqsız və bəzi hallarda xəyanətkar insanlar nə qədər çalışdılarsa, bu infrastrukturu, Heydər Əliyev tərəfindən yaradılmış potensialı dağıda bilmədilər. Amma ölkə çox çətin vəziyyətə düşmüşdü. İqtisadiyyat dağılmışdı, iqtisadi böhran hökm sürürdü. Ölkə iqtisadiyyatı tənəzzülə uğrayırdı. Ancaq xalq yenidən müdrikliyini göstərdi, öz milli liderinə üz tutdu. Heydər Əliyev Azərbaycanda yenidən hakimiyyətə qayıtdığı vaxt çox çətin vəziyyət idi. Məhz onun səyləri nəticəsində biz bütün sahələrdə inkişafa nail olduq. Bu gün bizim vəzifəmiz ondan ibarətdir ki, yaradılmış potensialı gücləndirək, artıq həyatda öz təsdiqini tapmış bu meylləri daha da sürətləndirək, dünya birliyinə daha sürətlə inteqrasiya edək, ölkəmizin iqtisadi potensialını daha da gücləndirək, ehtiyac içində olan soydaşlarımıza kömək edək, sosial proqramları həyata keçirək, qaçqınlara və köçkünlərə yardım göstərək. Bütün sahələrdə işlər aparılır. Bu gün çox sevinirəm ki, mənim seçkilərdə bəyan etdiyim proqramlar həyatda öz təsdiqini tapdı.

Azərbaycan beynəlxalq aləmdə çox uğurlu siyasət aparır. Dünyanın aparıcı ölkələri, nüfuzlu beynəlxalq təşkilatları açıq şəkildə Azərbaycanı dəstəkləyirlər. İqtisadi inkişaf baxımından bu ilin birinci rübündə iqtisadiyyatımız 10 faiz artmışdır. Yeni iş yerlərinin açılması istiqamətində böyük işlər görülmüşdür. İqtisadi inkişaf naziri bu rəqəmi dedi, son 6-7 ay ərzində 30 minə yaxın iş yeri açılmışdır. Yəni biz doğru yoldayıq. Bütün səylərimizi bir istiqamətə yönəltməliyik – Azərbaycanı hərtərəfli inkişaf etdirmək, iqtisadiyyatımızı şaxələndirmək, neft amilindən istifadə edib iqtisadiyyatın digər sahələrini inkişaf etdirmək.

Təbii ki, burada dövlətin üzərinə düşən vəzifələr vardır, ancaq özəl sektorun və yerli icra orqanlarının üzərlərinə də mühüm vəzifələr düşür. Bütün bu qurumlar, tərəflər birgə fəaliyyət göstərməlidir. Dövlət tərəfindən müvafiq işlər görülür, proqramlar qəbul edilmişdir. Bu gün Mingəçevirdə regional proqram həyata keçirilir. Burada səslənən məlumatlar onu göstərir ki, artıq yeni iş yerləri açılır. Mən bu gün “Azərkabel” zavodunda istehsalla yaxından tanış oldum. Bu istehsal yaxın gələcəkdə beynəlxalq standartlara cavab verəcəkdir və müəssisənin bazarı da vardır. Zavodda artıq 200-dək işçi çalışır və gələcəkdə bir neçə milyon dollar investisiya qoyulduqdan sonra istehsal da artacaqdır. Mingəçevirdə fəaliyyət göstərən digər müəssisələr də işə başlamalıdır və əminəm ki, onların fəaliyyəti bərpa olunacaqdır.

Beləliklə, həm iqtisadi inkişaf baxımından, həm sosial məsələlərin həlli istiqamətində biz bütün qarşıda duran vəzifələrə çatacağıq. Qaçqınların və köçkünlərin sosial məsələləri öz həllini tapır. Mənim imzaladığım fərmanların əsasında yeni qəsəbə və şəhərciklər salınacaqdır. Bu da Heydər Əliyev siyasətinin davamıdır. Çünki bu siyasət onun tərəfindən başlanmışdır. Neft Fondunun hesabından ilk ödəmələr məhz Azərbaycanda ən çətin vəziyyətdə yaşayan qaçqınların şəraitinin yaxşılaşdırılmasına yönəldilmişdir. Ümidvaram ki, bütün məsələlər öz həllini tapacaq, Azərbaycan iqtisadi cəhətdən güclənəcək, yeni iş yerləri açılacaqdır. Əminəm ki, biz bəyan etdiyimiz rəqəmə çatacağıq və bunun üçün bütün imkanları səfərbər edəcəyik.

Özəl sektora və sahibkarlara mütləq və mütləq böyük diqqət göstərilməlidir. Lüzumsuz yoxlamalar aparılmamalı, əksinə, dövlət, yerli icra orqanları, eyni zamanda, hüquq mühafizə orqanları sahibkarlara yardım etməli, qayğı göstərməlidirlər. İqtisadiyyat bu yolla inkişaf edəcəkdir. Biz bütün bunları bəyan etmişik və ardıcıl surətdə həyata keçiririk. Ölkəmizin iqtisadiyyatı bazar iqtisadiyyatı prinsipləri əsasında inkişaf etməlidir. Dünya təcrübəsi göstərir ki, yalnız və yalnız bazar iqtisadiyyatı hər bir ölkəyə xeyir gətirə bilər. Biz əvvəllər başqa ictimai quruluşda yaşamışıq və həmin quruluşun iqtisadi cəhətdən o qədər də mükəmməl olmadığını görmüşük. Amma dünyanın inkişaf etmiş ölkələrinin iqtisadiyyatı bazar iqtisadiyyatı prinsipləri əsasında qurulmuşdur. Biz də bu prinsiplərin tərəfdarıyıq və bunu həyata keçirmək üçün özəl sektor, orta təbəqə güclənməlidir. Mən şadam ki, bu gün verilən məlumata görə, Mingəçevirdə bu məsələyə çox böyük diqqətlə yanaşırlar. İcra hakimiyyətinin başçısı və burada görüşdüyüm sahibkarlar mənə bildirdilər ki, onların fəaliyyəti icra orqanları tərəfindən dəstəklənir. Mən buna şadam və ümid edirəm ki, bu siyasət bundan sonra da davam etdiriləcəkdir. Azərbaycanın hər yerində özəl sektora, sahibkarlara böyük diqqət göstərilməlidir.

Bizim siyasətimizin əsas prioritetlərindən biri də sosial məsələlərin həllidir. Bazar prinsipləri üzərində qurulmuş iqtisadiyyat o demək deyil ki, bəzi ölkələrdəki kimi bizdə də sosial məsələlərə diqqət göstərilməsin. Əksinə, bizim dövlət büdcəmizin ən böyük hissəsi məhz sosial məsələlərin həllinə sərf olunur. Bu siyasət gələcəkdə də davam etdiriləcəkdir. Çünki bizim məqsədimiz ondadır ki, hər bir vətəndaş, hər bir şəxs daha yaxşı yaşasın. Bizim bütün iqtisadi göstəricilərimiz yüksək səviyyədədir. Amma elə etməliyik ki, hər bir vətəndaş bu müsbət meylləri öz gündəlik həyatında hiss etsin. Ona görə sosial məsələlərə - əmək haqlarının, pensiyaların artırılması ilə bağlı məsələlərə böyük diqqət göstərilir, xüsusi proqramlar hazırlanıbdır. Əminəm ki, qarşımızda duran bütün məsələlər öz həllini tapacaqdır. Bugünkü dünyada ancaq iqtisadiyyatı güclü olan ölkələr uğur qazana bilərlər. Azərbaycanın bu baxımdan çox gözəl perspektivləri vardır. Təbii sərvətlərimiz, peşəkar kadrlarımız, çox güclü kadr potensialımız vardır. Əlbəttə ki, son on ildə yaradılmış iqtisadi potensial bütün bunlara imkan verir. Heç kim üçün sirr deyildir ki, Bakı-Tbilisi-Ceyhan neft kəməri işə düşdükdən sonra ölkəmizin maliyyə imkanları daha da genişlənəcək və bu, bizə ölkəmizi daha səmərəli şəkildə və hərtərəfli inkişaf etdirməyə kömək edəcəkdir.

Mən vaxtınızı çox almaq istəmirəm. Çünki bayırda 35 dərəcə isti var. Amma sizdən də ayrılmaq da istəmirəm. Mənə göstərilən münasibətə və Mingəçevirdə gördüyüm qonaqpərvərliyə görə bir daha sizə minnətdarlığımı bildirirəm. Eyni zamanda, fürsətdən istifadə edərək, prezident seçkilərində mənə dəstək verdiyinizə görə, mənə səs verdiyiniz üçün sizə təşəkkürümü bildirirəm.

Mənim üçün ən böyük qiymət xalqın, insanlarımızın münasibətidir. Çalışıram ki, bu etimadı doğruldum. Görəndə ki, buna müvəffəq oluram, çox sevinirəm. Seçkilərdən sonra Azərbaycanda bütün istiqamətlərdə böyük uğurlar əldə olunmuşdur. Ölkəmizdə sabitliyi pozmaq istəyən qüvvələr öz layiqli cəzalarını alıblar. Biz heç vaxt imkan verməyəcəyik ki, Azərbaycanda yenidən xaos, anarxiya, hərc-mərclik yaransın, insanlarımızın həyatı yenidən təhlükə altına düşsün. Nəyin bahasına olursa-olsun, Azərbaycan dövləti və dövlətin başçısı bütün bu xoşagəlməz meyllərin qarşısını alacaqdır. Artıq bunun qarşısı alınıbdır. Azərbaycan xalqı seçkilərdən sonra bir daha gördü ki, yalnız və yalnız Heydər Əliyev siyasəti davam etdirilməlidir. Əks təqdirdə, ölkəmiz yenidən böyük bəlalarla üzləşə bilər.

Çox sevinirəm ki, iqtisadi inkişaf davam edir, sosial məsələlər öz həllini tapır, orduya böyük kömək və diqqət göstərilir, beynəlxalq aləmdə Azərbaycanın haqq səsi eşidilir. Ermənistan-Azərbaycan, Dağlıq Qarabağ münaqişəsi müzakirə olunur və müvafiq dövlətlər və beynəlxalq təşkilatların mövqeyi artıq daha çox ədaləti əks etdirir. Çünki hər bir insan, - əgər o qərəzli deyilsə, - hər bir təşkilat açıq-aşkar görür ki, Azərbaycan bu məsələdə zərərçəkən dövlətdir, Azərbaycanın torpaqları işğal altındadır, Azərbaycana təcavüz edilibdir. Biz əminik ki, bu məsələni həll edəcəyik. Başqa cür ola da bilməz. Azərbaycan xalqı heç vaxt öz torpaqlarının itirilməsi ilə barışmayacaqdır. Mən bunu bütün lazımi səviyyələrdə dəfələrlə açıq-aydın bəyan etmişəm.

Biz tam qətiyyətlə deyə bilərik ki, son altı-yeddi ay ərzində bütün istiqamətlərdə Heydər Əliyev siyasəti yaşayır, davam edir və Azərbaycana, xalqımıza böyük fayda gətirir və bundan sonra da gətirəcəkdir.

Mən bir daha sizi salamlamaq istəyirəm. Bizim görüşlərimiz hələ çox olacaqdır, Mingəçevirdə hələ çox müəssisələr açılacaq və mən bu açılışlarda iştirak edəcəyəm. Bu gün baxdığımız avarçəkmə bazası yaxın zamanlarda bərpa olunacaq, oraya böyük sərmayələr qoyulacaq və biz bu obyekti ən yüksək dünya standartları səviyyəsinə çatdıracağıq. Mən onun və digər müəssisələrin açılışına gələcəyəm. Amma hələlik mən sizdən ayrılıram, sizə öz minnətdarlığımı bildirirəm və ümidvaram ki, mingəçevirlilər həmişə olduğu kimi, yenə də Azərbaycanın müstəqilliyinə öz töhfəsini verəcək, ölkəmizin iqtisadi potensialını gücləndirəcək, Azərbaycanın bayrağını yüksək tutacaqlar.