“Azərbaycan Qarabağ Atları Assosiasiyası”nın Aİ-nin aidiyyəti qurumlarına qeydiyyata alınması prosedurlarına başlanılıb
Bakı, 26 aprel, AZƏRTAC
Bu ilin martında “Azərbaycan Qarabağ Atları Assosiasiyası” (AQAA) adlı qeyri-hökumət təşkilatı rəsmi olaraq İspaniyada dövlət qeydiyyatından keçib. Assosiasiyanın İspaniyada dövlət qeydiyyatına alınması təşkilatın adı ilə bağlı müxtəlif bəhanələri dəf etməklə 8 aydan sonra mümkün olub. Hazırda assosiasiyanın Avropa İttifaqının (Aİ) aidiyyəti qurumları tərəfindən də qeydiyyata alınması məqsədilə Brüsseldə müvafiq prosedurlara başlanılıb.
AZƏRTAC xəbər verir ki, assosiasiyanın həmtəsisçiləri Azərbaycan-İspaniya Ticarət və Mədəniyyət Assosiasiyasının (ACAE) prezidenti Fərid Mustafayev, ACAE-nin maliyyə məsələlərinə cavabdeh nümayəndəsi Yone Quisado Bayon (ispan vətəndaşı), Qarabağ Atçılıq Zavodunun direktoru Elman Qədirov və Qarabağ atları üzrə mütəxəssis Yaşar Quluzadədir.
Təşkilatın məqsədi İspaniya və digər Avropa ölkələrində Qarabağ atlarının tanıdılması üzrə fəal təbliğat işinin aparılması, bu xüsusda müxtəlif sərgi və hərraclarda təqdimatların keçirilməsi və Azərbaycanın simvolu olan Qarabağ atları ilə bağlı məlumatların Avropa ictimaiyyətində təşviq edilməsindən ibarətdir. Assosiasiyanın verdiyi məlumata əsasən, yaxın gələcəkdə Qarabağ atlarının ilk sərgisinin İspaniyada təşkil olunması üçün hazırlıq işləri aparılır.
Qeyd edək ki, mayın 8-də assosiasiya tərəfindən Qarabağ Atçılıq Zavodunda yerli və xarici qonaqların iştirakı ilə müstəqil Azərbaycan dövlətinin qurucusu, dahi siyasətçi və qüdrətli dövlət xadimi Ulu Öndər Heydər Əliyevin anadan olmasının 100-cü ildönümünə həsr olunmuş tədbir keçiriləcək. Tədbirdə Qarabağ atlarının tarixi, o cümlədən Qarabağın mədəniyyəti və incəsənətinə həsr olunmuş çıxış və təqdimatların təşkil olunacağı nəzərdə tutulur.
Eyni zamanda, assosiasiyanın fəaliyyət istiqamətlərinə İspaniya və Azərbaycan arasında atçılıq sahəsi üzrə təcrübə mübadiləsini həyata keçirmək, bu xüsusda, hər iki ölkənin aidiyyəti mütəxəssislərinin qarşılıqlı səfərlərini təşkil etmək və s. kimi məsələlər də daxildir.
Bölmənin digər xəbərləri
