Azərbaycan Qarabağ və Şərqi Zəngəzuru gələcəyin dayanıqlı inkişaf modeli əsasında qurur - ŞƏRH
Bakı, 11 may, AZƏRTAC
Azərbaycan işğaldan azad edilmiş ərazilərdə artıq təkcə bərpa deyil, yeni iqtisadi və geosiyasi inkişaf modelinin formalaşdırılması mərhələsinə keçib. Prezident İlham Əliyevin mayın 10-da Zəngilan şəhərindəki ilk yaşayış kompleksinə köçən ailələrlə görüşündə səsləndirdiyi fikirlər də bunu təsdiqləyir.
Bu fikirləri AZƏRTAC-a açıqlamasında “Orta Asiya və Güney Qafqaz Söz Azadlığı Şəbəkəsi” (CASCFEN) İctimai Birliyinin sədri, siyasi şərhçi Nadir Azəri bildirib.
Onun sözlərinə görə, xüsusi vurğulanan məqam ondan ibarətdir ki, Zəngilan postmünaqişə dövrünün simvolik bölgəsindən strateji nəqliyyat, logistika, enerji və kənd təsərrüfatı mərkəzinə çevrilməkdədir: “Bu isə bölgənin gələcəyi baxımından tamamilə yeni mərhələnin başlandığını göstərir. Prezident İlham Əliyevin vurğuladığı kimi, işğal dövründə dağıdılmış ərazilərin cəmi beş il ərzində müasir yaşayış məkanlarına çevrilməsi Azərbaycanın həm siyasi iradəsini, həm iqtisadi imkanlarını, həm də uzunmüddətli dövlət strategiyasını nümayiş etdirir. Zəngilanda yaşayış məhəllələrinin, məktəblərin, yolların, körpülərin, elektrik stansiyalarının, hava limanının və aqroparkların yaradılması göstərir ki, dövlət bölgəni sadəcə yenidən qurmaq deyil, onu regional inkişafın əsas dayaqlarından birinə çevirmək niyyətindədir”.
N.Azəri qeyd edib ki, Zəngilanın inkişafında nəqliyyat və sərhəd infrastrukturu xüsusi strateji əhəmiyyət daşıyır: “Eyni zamanda, İran sərhədində körpünün demək olar ki, tamamlanması və sərhəd-gömrük infrastrukturunun qurulması bölgənin beynəlxalq nəqliyyat sisteminə inteqrasiyasını təmin edəcək. Bu layihənin yaxın aylarda istifadəyə verilməsi Zəngilanı beynəlxalq tranzit dəhlizinin mühüm qovşaqlarından birinə çevirəcək. Buradan keçəcək dəmir və avtomobil yolları yalnız iqtisadi əlaqələri gücləndirməyəcək, həm də yeni iş yerlərinin yaradılmasına və yerli əhalinin məşğulluğunun artmasına xidmət edəcək. Nəticə etibarilə, bu infrastruktur həm Zəngilanın, həm də bütövlükdə Azərbaycanın iqtisadi potensialına ciddi töhfə verəcək”.
Ekspertin qənaətinə görə, xüsusilə Zəngəzur dəhlizi ilə bağlı səsləndirilən mesajlar mühüm strateji əhəmiyyət daşıyır: “Prezidentin qeyd etdiyi kimi, Bakı-Zəngilan-Naxçıvan dəmir yolu bağlantısının formalaşdırılması, İran sərhədində yeni nəqliyyat infrastrukturunun qurulması və Şərq-Qərb, eləcə də Şimal-Cənub dəhlizlərinin məhz Zəngilan üzərindən inteqrasiya olunması bölgənin beynəlxalq tranzit mərkəzinə çevriləcəyini göstərir. Hesab edirəm ki, bu yanaşma yalnız Azərbaycanın iqtisadi maraqlarına deyil, eyni zamanda Türk dünyasının bağlantılarının güclənməsinə və regionda yeni əməkdaşlıq platformalarının yaranmasına xidmət edir”.
N.Azərinin sözlərinə görə, Prezident İlham Əliyevin çıxışında diqqət çəkən əsas məqamlardan biri də azad edilmiş ərazilərin dünyanın nümunəvi bölgələrindən birinə çevrilməsi ilə bağlı ortaya qoyulan strateji baxışdır: “Yaşıl enerji” potensialının inkişafı, su elektrik stansiyalarının yaradılması, kənd təsərrüfatının genişləndirilməsi və müasir şəhərsalma konsepsiyasının tətbiqi göstərir ki, Azərbaycan Qarabağ və Şərqi Zəngəzuru gələcəyin dayanıqlı inkişaf modeli əsasında qurur. Bu isə Zəngilanın yaxın illərdə yalnız Azərbaycanın deyil, bütövlükdə Cənubi Qafqazın ən mühüm iqtisadi və strateji mərkəzlərindən birinə çevriləcəyini deməyə əsas verir”.
Bölmənin digər xəbərləri
