Bakı, 11 dekabr, AZƏRTAC

Azərbaycanda uzunmüddətli iqtisadi inkişaf strategiyası əlverişli mühitin, o cümlədən, regionlarda dayanıqlı inkişaf prinsiplərinə əsaslanan, sosial təminatın ən yüksək standartlarına cavab verən ekoloji təhlükəsizlik sisteminin formalaşmasına, təbii ehtiyatlardan səmərəli istifadəyə və ətraf mühitin etibarlı qorunmasına imkan verən rəqabətqabiliyyətli iqtisadiyyatın yaradılmasına yönəlib. Azərbaycan iqtisadiyyatına investisiyaların təşviqi və stimullaşdırılması həyata keçirilən iqtisadi siyasət strategiyasının əsas xətti olub.

Bu fikirləri AZƏRTAC-a açıqlamasında Milli Məclisin deputatı, YAP İdarə Heyətinin üzvü Rəşad Mahmudov söyləyib.

O bildirib ki, Prezident İlham Əliyev “Euronews” televiziyasına verdiyi müsahibəsində ölkəmizin bütün bu uğurlarından, həmçinin Azərbaycanın qarşıya qoyduğu hədəflərindən danışaraq, həm də regionun geopolitik durumunu dəyərləndirdi. Ümumiyyətlə, Prezident İlham Əliyevin dünyanın nüfuzlu media orqanlarına müsahibələri beynəlxalq ictimaiyyət tərəfindən həmişə böyük diqqətlə və maraqla izlənilir. Bu baxımdan dövlət başçısının “Euronews” televiziyasına müsahibəsi də eyni maraqla qarşılandı. Bu dəfə də Prezident suallara faktlara söykənərək tutarlı və məntiqli cavablar verdi, bir çox mühüm məsələlərə aydınlıq gətirdi, Ermənistanın qərəzli, qarayaxma siyasətinin mahiyyətini açıqladı, Azərbaycana yönəlmiş iftiraları ifşa etdi. Heç kimə sirr deyil ki, Qarabağ müharibəsində ağır məğlubiyyət acısı yaşamış Ermənistan Azərbaycana qarşı Avropa ictimaiyyətində mənfi fikir formalaşdırmağa çalışır.

Cənab İlham Əliyevin müsahibəsində dövlətimizin regionda sülhün təmin edilməsində həyata keçirdiyi siyasət, sülh prosesinə töhfə verə biləcək addımlardan danışaraq anti-Azərbaycan qüvvələrinə yerini göstərdi. Müsahibədə dövlət başçısı sülh üçün alternativin olmadığını deyərək, revanşistlərə və regionda “bulanıq suda balıq tutmağa” çalışanlara da sərt mesaj göndərdi. Prezident açıq şəkildə bildirdi ki, əgər sülh sazişi imzalanmasa, bu, bütöv bölgə üçün çox pis olacaq: “Biz istəyirik ki, Cənubi Qafqaz bölgəsində hər hansı risk olmasın. Əlbəttə, biz istəyirik ki, Ermənistan nə bu gün, nə də gələcəkdə ərazi bütövlüyümüzü sual altına qoymasın və Azərbaycana qarşı hər hansı ərazi iddialarından tam əl çəksin”.

Bu gün Şərq-Qərb və Şimal-Cənub nəqliyyat dəhlizləri Azərbaycandan keçir və region, eyni zamanda digər çoxsaylı ölkələr bundan faydalanır. Son illərdə nəqliyyat infrastrukturuna milyardlarla dollar sərmayə qoyulub. Azərbaycan infrastrukturunu tamamilə modernləşdirərək həm Qərbdən Şərqə, həm də Şimaldan Cənuba regionun tranzit mərkəzinə çevrilib. Bu, Azərbaycanın dəmir yollarına, avtomobil yollarına, eləcə də limanlarına aiddir. Azərbaycanda həyata keçirilən həmin infrastruktur layihələrindən fəal şəkildə istifadə olunacaqdır. Qeyd edək ki, bu gün Şərq-Qərb və Şimal-Cənub nəqliyyat layihələrinə qoşulan ölkələrin sayı ondan artıqdır. Azərbaycan unikal coğrafi mövqeyinə görə hər iki layihədə iştirak edən yeganə ölkədir. Bu, ölkəmiz haqqında beynəlxalq tranzit mərkəzlərindən biri kimi danışmağa imkan verir. Dövlətimizin başçısı “Euronews” televiziyasına müsahibəsində Azərbaycanın iqtisadi-sosial inkişafı barədə danışaraq, ölkəmizin Qərb-Şərq arasında strateji mövqeyində uğurla yararlandığını və həyata keçirilən qlobal əhəmiyyətli layihələr sayəsində mühüm kommunikasiya-nəqliyyat qovşağına çevrildiyini bildirdi.

Prezident İlham Əliyev müsahibəsində Azərbaycanda hökm sürən siyasi sabitliyə də toxundu. Sirr deyil ki, ölkəmizdəki ictimai-siyasi sabitlik sosial-iqtisadi inkişafın, beynəlxalq aləmdə qazanılan uğurların əsasını təşkil edir. Ona görə də ölkədə ictimai-siyasi sabitliyin qorunması çox vacibdir. Prezident İlham Əliyevin həyata keçirdiyi siyasət vətəndaşların sosial vəziyyətinin yaxşılaşdırılmasına, Azərbaycanın dünyada layiqli yer tutmasına yönəlib. Bu siyasət artıq öz bəhrəsini verməkdədir. Azərbaycan cəmiyyəti əmindir ki, dövlət başçısının uğurla həyata keçirdiyi və xalqın etimadını doğrultmuş ictimai-siyasi islahatlar hələ uzun illər Azərbaycanın möhkəmlənməsinə və güclənməsinə, ölkənin iqtisadi qüdrətinin artmasına, xalqın layiq olduğu firavanlığa nail olmağa xidmət edəcəkdir.

Müsahibədə maraq doğuran məqam Prezident İlham Əliyevin jurnalistin Azərbaycanda müşahidə edilən iqtisadi inkişafın səbəblərinin başqa amillərlə bağlamaq istəməsinə tutarlı faktlarla cavab verməsi oldu. Dövlət başçısı birmənalı şəkildə diqqətə çatdırdı ki, Azərbaycanın iqtisadi inkişafının təməlində məhz həyata keçirilən islahatlar dayanır: “Biz iqtisadiyyatımızı şaxələndirməyə, neft və qaz sektorundan asılılığı azaltmağa nail olmuşuq. Ancaq neft və qaz sektoru iqtisadiyyatımızın əsas hissəsi olmaqda davam edir”. Dünya Bankının qiymətləndirmələrinə görə, Azərbaycan 2002-ci ildəki aşağı orta gəlirli ölkələr qrupundan 2022-ci ildə yuxarı orta gəlirli ölkələr qrupuna daxil olub. Son 20 il ərzində (2003-2022) Azərbaycanda Ümumi Daxili Məhsul (ÜDM) 4 dəfə, adambaşına düşən ÜDM isə 3.2 dəfə artıb. Bütün bu nailiyyətlərə düşünülmüş sosial siyasət həyata keçirməklə nail olunub.

Deputat sonda qeyd edib ki, Prezident İlham Əliyevin “Euronews” televiziyasına müsahibəsi düşünürəm ki, bölgədə sabitliyin, davamlı sülhün əldə olunması istiqamətində həm Ermənistan hakimiyyəti, həm də cəmiyyəti üçün vacib bir mesaj idi. Prezident açıq şəkildə bəyan etdi ki, bu gün Azərbaycanın müxtəlif yerlərində erməni əhalisi heç bir problem olmadan yaşayır. Belə nümunə kifayət qədər ölkələrdə mövcuddur.

Azərbaycanlılar və ermənilər Rusiyada, Ukraynada, Gürcüstanda hətta eyni kəndlərdə yaşayırlar. Demək, bunu Azərbaycanda, yaxud Ermənistanda etmək də mümkündür. Xüsusilə onu vurğulamaq vacibdir ki, multikultural dəyərlərin ünvanı, çoxmillətli ölkə olan Azərbaycanda etnik, dini zəmində heç vaxt qarşıdurma, narahatlıq olmayıb və ermənilər bundan nəticə çıxarmalıdır.