AZƏRBAYCAN RESPUBLİKASININ NAZİRLƏR KABİNETİNDƏ
“Azərbaycan Respublikasının “2002-ci il dövlət büdcəsi haqqında Azərbaycan Respublikası Qanununun tətbiq edilməsi barədə” Azərbaycan Respublikası Prezidentinin 2001-ci il 26 fevral tarixli Fərmanının 5-ci bəndinin 14 abzasının icrası ilə əlaqədar olaraq, ölkədə istehsalın inkişafını həvəsləndirmək, yerli istehsal mallarının daxili bazarda rəqabət qabiliyyətini artırmaq məqsədi ilə gömrük rüsumlarının tətbiqinin çevik mexanizminin yaradılmasını, tarif və qiymətlərin iqtisadi inkişafın tələblərinə uyğun olaraq dövlət tərəfindən tənzimlənməsini təmin etmək üçün Azərbaycan Respublikasının Nazirlər Kabineti Azərbaycan Respublikası Tarif (qiymət) Şurasının yaradılması haqqında qərar qəbul etmişdir.
Azərbaycan Respublikasının iqtisadi inkişaf naziri Fərhad Əliyev Şuranın sədri təyin olunmuşdur.
Tarif (qiymət) Şurasının Əsasnaməsi təsdiq edilmişdir.
Tarif (qiymət) Şurasına tapşırılmışdır ki, gördüyü işlər barədə hər ilin yekununa görə Azərbaycan Respublikasının Nazirlər Kabinetinə ətraflı hesabat təqdim etsin.
Azərbaycan Respublikası Nazirlər Kabinetinin “Gömrük Tarif Şurasının yaradılması haqqında” 1993-cü il 6 aprel tarixli və “Gömrük Tarif Şurasının Əsasnaməsi” haqqında 1994-cü il 18 fevral tarixli qərarları qüvvədən düşmüş hesab edilmişdir.
Qərar imzalandığı gündən qüvvəyə minmişdir.
Bu məlumatı AZƏRTAC-a Nazirlər Kabinetinin mətbuat mərkəzindən vermişlər.
Bölmənin digər xəbərləri
