AZƏRBAYCAN RESPUBLİKASININ PREZİDENTİ HEYDƏR ƏLİYEVİN FRANSA RESPUBLİKASINA SƏFƏRİNİN NƏTİCƏLƏRİ HAQQINDA YEKUN MƏLUMATI
Səfər zamanı yüksək səviyyədə Fransa-Azərbaycan danışıqları keçirilmiş, Fransanın dövlət rəhbərləri, ziyalıları, iş adamları, ictimaiyyətin nümayəndələri ilə Azərbaycan rəhbərinin səmimi görüşləri olmuşdur.
İki ölkə prezidentlərinin danışıqlarında Fransa ilə Azərbaycan arasında iqtisadiyyat, mədəniyyət, elm, təhsil və digər sahələrdə uzunmüddətli əməkdaşlığın perspektivləri barədə fikir mübadiləsi aparılmışdır. Danışıqlarda Azərbaycan torpağında gedən müharibə ilə əlaqədar məsələlərə geniş yer verilmişdir. Fransua Mitteran bildirmişdir ki, Fransa Azərbaycanın ərazi bütövlüyünü tanıyır və onu dəstəkləyir. Bu tarixi görüş Azərbaycanla Fransa və digər Avropa ölkələri arasında sıx əməkdaşlığın əsasını qoymuşdur. Səmimilik və mehribanlıq şəraitində keçən yüksək səviyyəli danışıqlardan sonra prezidentlər Fransua Mitteran və Heydər Əliyev Yelisey sarayında Azərbaycan ilə Fransa arasında dostluq, qarşılıqlı anlaşma və əməkdaşlıq haqqında müqavilə imzalamışlar.
Həmin gün respublika Prezidenti Heydər Əliyev ATƏM-in əsas sənədlərindən biri olan yeni Avropa üçün Paris Xartiyasına Azərbaycanın qoşulması barədə sənədi də imzalamışdır.
Sənədlərin imzalanması mərasimindən sonra prezidentlər jurnalistlərin qarşısında bəyanat verərək, bu hadisənin böyük əhəmiyyətindən danışmışlar.
Azərbaycan Prezidenti Fransada yaşayan azərbaycanlılar icmasının nümayəndələri ilə görüşərək onlara respublikadakı ictimai-siyasi vəziyyət, Ermənistan Silahlı Qüvvələrinin təcavüzünün qarşısını almaq üçün görülən tədbirlər haqqında məlumat vermişdir.
Heydər Əliyev Parisdəki Sen-Klu qəbiristanında xalqımızın görkəmli oğulları Əlimərdan bəy Topçubaşovun və onun ailə üzvlərinin, Ceyhun bəy və onun oğlu Timuçin Hacıbəylilərin məzarlarını ziyarət edərək əklil qoymuşdur.
Azərbaycan dövlətinin başçısı və onu müşayiət edən şəxslər Luvr sarayına gedərək, bu möhtəşəm muzeydə nümayiş etdirilən sənət əsərləri ilə tanış olmuşlar.
Respublika Prezidenti Fransa Xarici İşlər Nazirliyi yanında diplomatik mətbuat assosiasiyasının üzvləri ilə görüşmüş, Azərbaycanda müstəqil dövlət quruculuğu, demokratiyanın inkişafı, Ermənistanın ölkəmizə qarşı təcavüzü, qaçqınların vəziyyəti, müharibəyə son qoymaq üçün respublikamızın sülh təşəbbüsləri barədə danışmış, jurnalistlərin suallarına cavab vermişdir.
Azərbaycan rəhbəri ölkənin işgüzar dairələri nümayəndələrinin dəvətini qəbul edərək Fransa Milli Sahibkarlarının Mərkəzində iş adamları ilə görüşmüşdür. Heydər Əliyev görüşdə çıxış edərək müstəqil Azərbaycan dövlətinin qarşılaşdığı problemlər, ölkəmizin bazar iqtisadiyyatı yolunu seçməsi, beynəlxalq iqtisadi əməkdaşlığa böyük maraq göstərməsi barədə söhbət açmışdır.
Görüş zamanı Heydər Əliyev Fransa işgüzar dairələri nümayəndələrinin suallarına cavab vermişdir.
Azərbaycan dövlətinin başçısı Fransanın xarici işlər naziri Alen Jüppeni qəbul etmişdir. Görüşdə yüksək səviyyədə Fransa-Azərbaycan danışıqlarının ölkələrimiz arasında münasibətlərin daha da möhkəmləndirilməsində mühüm rolu qeyd edilmiş, qarşılıqlı maraq doğuran məsələlər müzakirə olunmuşdur.
Fransa Diplomatiya Akademiyasında Azərbaycan Respublikasının Prezidenti Heydər Əliyev ilə görüş keçirilmiş, onun şərəfinə ziyafət verilmişdir. Azərbaycan dövlətinin başçısı akademiyanın üzvləri qarşısında geniş nitq söyləmişdir.
Heydər Əliyev Parisdə YUNESKO-nun iqamətgahına gedərək bu beynəlxalq təşkilatın baş direktoru Federiko Mayor ilə görüşmüşdür. Görüşdə YUNESKO-nun respublikamızla əlaqələrini genişləndirməyin perspektivləri, xüsusən onun Azərbaycan üzrə milli komissiyasının yaradılması məsələləri müzakirə olunmuşdur. Qeyd edilmişdir ki, yaxın vaxtlarda YUNESKO erməni təcavüzü nəticəsində zərər çəkmiş təhsil və mədəniyyət müəssisələrinin fəaliyyətinin bərpasında respublikamıza yardımın həcmini müəyyən etmək üçün Azərbaycana beynəlxalq missiya göndərmək niyyətindədir.
Federiko Mayor Heydər Əliyevə YUNESKO-nun xatirə medalını təqdim etmişdir.
Azərbaycan Prezidentinin iqamətgahında Heydər Əliyevin Fransaya səfərinə həsr olunmuş mətbuat konfransı keçirilmişdir. Azərbaycan rəhbəri jurnalistlər qarşısında çıxış etmiş və onların suallarına cavab vermişdir.
Heydər Əliyev Fransanın sənaye, rabitə, telekommunikasiya və xarici ticarət naziri Jerar Lonke ilə görüşmüşdür. Söhbət zamanı iki ölkənin sənaye sahəsində əməkdaşlığı üçün yaranan imkanlar müzakirə edilmişdir.
Azərbaycan dövlətinin başçısı Fransa Respublikası senatının yerləşdiyi Lüksemburq sarayına getmiş, senatın sədri Rene Monari ilə görüşüb söhbət etmişdir. Rene Monari senatın fəxri medalını Heydər Əliyevə təqdim etmişdir. Respublikamızın Prezidenti senatın fəxri qonaqlar üçün Qızıl kitabına avtoqraf yazmışdır.
Heydər Əliyev öz iqamətgahında Fransanın “Tomson” firmasının rəhbərlərindən biri olan Filipp Jiskar d’Esteni və ölkənin humanitar məsələlər üzrə naziri xanım Mişo Şevrini qəbul etmişdir.
Respublikamızın Prezidenti Fransanın məşhur TV-5 televiziya kanalı ilə çıxış etmişdir.
Azərbaycan Respublikasının Prezidenti Heydər Əliyevin Fransa Respublikasına səfəri iki ölkənin dövlət başçıları arasında birbaşa ünsiyyət yaradılmasında, ölkələrimizin qarşılıqlı münasibətlərinin möhkəmləndirilməsində, siyasi, iqtisadi və mədəni əməkdaşlığın inkişafında mühüm rolu olan tarixi səfərdir. Görüşlər və danışıqlar zamanı Azərbaycan həqiqətləri yüksək səviyyədə izah və şərh edilmiş, müstəqil demokratik dövlət quruculuğunda, bazar iqtisadiyyatına keçid yolunda həyata keçirilən tədbirlər, respublikamızın ərazi bütövlüyünü pozan Ermənistanın işğalçılıq siyasəti barədə aydın təsəvvür yaradılmış, xalqımızın haqq işinin başa düşülməsi və müdafiə edilməsi üçün geniş fəaliyyət göstərilmişdir.
Azərbaycan ilə Fransa arasında gələcək əlaqələrin üfüqlərini müəyyənləşdirən dostluq, qarşılıqlı anlaşma və əməkdaşlıq haqqında müqavilə münasibətlərimizin inkişafında mühüm mərhələ kimi qiymətləndirilməlidir.
Heydər Əliyevin Fransaya səfəri Azərbaycan Respublikasının beynəlxalq mövqelərinin möhkəmlənməsinə, müstəqil və suveren dövlət kimi onun nüfuzunun artmasına xidmət edəcəkdir.
Aslan Aslanov
AZƏRTAC-ın xüsusi müxbiri
Paris
Bölmənin digər xəbərləri
