RƏSMİ XRONİKA
AZƏRBAYCAN RESPUBLİKASININ PREZİDENTİ HEYDƏR ƏLİYEVİN SƏUDİYYƏ ƏRƏBİSTANINA RƏSMİ SƏFƏRİ BAŞA ÇATDI
Elə həmin gün Azərbaycan Prezidenti və onu müşayiət edən şəxslər Peyğəmbər məscidində oldular, axşam həmin məsciddə namaz qıldılar, Həzrəti Məhəmməd Peyğəmbərin, islam dininin digər görkəmli şəxsiyyətlərinin məzarlarını ziyarət etdilər. Daha sonra Heydər Əliyev möhtəşəm Peyğəmbər məscidi ilə yaxından tanış oldu, insanı heyrətə gətirən əzəmətli salona tamaşa etdi.
Azərbaycan nümayəndə heyətinin üzvləri Peyğəmbər məscidinin kitabxana-muzeyi ilə də tanış oldular, burad saxlanılan nadir Quran nüsxələrinə baxdılar.
Peyğəmbər məscidi və kitabxana-muzeylə tanışlıqda Azərbaycan Prezidentini Səudiyyə Ərəbistanının həcc naziri doktor Mahmud ibn Məhəmməd Səfər və digər rəsmi şəxslər müşayiət edirdilər.
İyulun 13-də səhər Heydər Əliyev Mədinə şəhərində Quran çap edilən nəhəng mətbəədə oldu. Burada Azərbaycan Prezidentinə iki müqəddəs şəhərin xadimi, Səudiyyə Ərəbistanının məliki Fəhd ibn Əbdül Əziz əl-Səudun adından Quranın nadir nüsxələri bağışlandı.
Heydər Əliyev başda olmaqla Azərbaycan nümayəndə heyəti həmin gün Səudiyyə Ərəbistanından Vətənə qayıtdı. Binə hava limanında Azərbaycan Prezidentini respublika Ali Sovetinin sədri Rəsul Quliyev, Baş nazir Surət Hüseynov və digər rəsmi şəxslər qarşıladılar.
Aslan Aslanov
AZƏRTAC-ın xüsusi müxbiri