AZƏRBAYCAN RESPUBLİKASININ PREZİDENTİ ZATİ-ALİLƏRİ CƏNAB İLHAM ƏLİYEVƏ
Möhtərəm Prezident!
Sadə bir Azərbaycan şairini Vətənin ən yüksək mükafatına - “Xalq şairi” fəxri adına layiq gördüyünüz üçün Sizə ürəkdən təşəkkürümü və minnətdarlığımı bildirirəm. Yaşadığım 55 illik ömrün 15 ilə yaxın bir mərhələsi taleyin xoşbəxtliyindən ulu ondərimiz, ümummilli liderimiz Heydər Əliyevin qızğın fəaliyyəti dövrü ilə bir vaxta düşüb. Bu illər ərzində müstəqil Azərbaycan o böyük şəxsiyyətin qətiyyəti və yenilməzliyi, zəngin siyasi təcrübəsi və tükənməz dövlətçilik bacarığı sayəsində iqtisadi inkişafa, daxili sabitliyə, əmin-amanlığa, mənəvi və mədəni yüksəlişə nail olub. Azərbaycan müstəqil bir dövlət kimi beynəlxalq aləmdə güclü nüfuz sahibinə çevrilib. Heydər Əliyevin yüksək yaradıcılıq eşqi, gərgin zəhməti Azərbaycana “Əsrin müqaviləsi”ni, üç dənizin əfsanəsinə çevrilən Bakı-Tbilisi-Ceyhan boru kəmərini, İpək yolunun bərpasını, “Dədə Qorqud”un 1300 illik bayramını, Dünya azərbaycanlılarının I qurultayında görünməmiş bir təntənəni, saymaqla qurtarmayan nə qədər uğurlu günü, barlı-bəhrəli ayı-ili bəxş edib.
Şükürlər olsun Allaha ki, ulu öndərin siyasi xətti bu gün çox uğurla davam edir, gələcəkdə də aydın sabahlara doğru daha böyük inamla və ilhamla davam edəcəkdir. Bu, bizim xoşbəxtliyimizdir. Ona görə ki, bu gün həmin çətin və şərəfli yolu Siz davam etdirir, onun böyük arzularını xalq ilə birlikdə Siz həyata keçirirsiniz.
Möhtərəm Prezident!
Heydər Əliyevin siyasi təfəkküründən mayalanan, onun dövlətçilik akademiyasında yetkinləşən, dünyanın aparıcı dillərini öz ana dili qədər gözəl bilən və bu dillərdə Azərbaycan həqiqətlərini dünyaya çatdıran, dünyanın ən məşhur dövlət xadimləri ilə yanaşı dayanıb müdrik və təmkinli çıxışlar edəndə qəlbimizi qürur hissi ilə dolduran bir Prezident kimi Sizinlə fəxr edirik. Biz bütün varlığımızla inanırıq ki, atadan oğula, oğuldan gələcəyə - sabaha gedən yolda Sizin çox böyük uğurlarınız olacaqdır. Bu uğurlar millətlə dövləti, xalqla hakimiyyəti möhkəm tellərlə bir-birinə bağlayıb bütün sahələrdə inkişaf etmiş daha möhtəşəm bir Azərbaycan yaradacaqdır. Bu möhtəşəmliyin içində ədəbiyyatımıza, incəsənətimizə, poeziyamıza, musiqimizə böyük qayğınız və diqqətiniz bizi həmişə ilhamlı yaradıcılıq yollarında irəli aparacaqdır.
Şəxsən mənə verilən çox şərəfli fəxri adı Sizin tərəfinizdən mədəniyyətimizə, yaradıcı ziyalılara, görkəmli qələm adamlarına dərin məhəbbətin və böyük qayğının ifadəsi kimi qəbul edirəm. İnanıram ki, əsası Heydər Əliyev tərəfindən qoyulan müqəddəs bir ənənə - ziyalılara böyük hörmət ənənəsi Sizin şəxsinizdə uğurla davam etdiriləcəkdir. Qəti əminəm ki, bu qayğıdan mənəvi haqqı olan bütün fədakar ziyalılar və ədəbiyyata yeni gələn istedadlı gənclər də arzu olunan səviyyədə bəhrələnəcəklər.
Möhtərəm Prezident!
Göydə xaliq, yerdə xalq yaxşı bilir ki:
Nə alim doğuldum, nə də ki dahi,
Peşman da deyiləm gələn günümə.
Əliboş aparma məni İlahi,
Doğulan günümdən ölən günümə
deyib, bütün ömrüm boyu nəyi yazmışamsa, Tanrının hökmü və ürəyimin diktəsi ilə yazmışam. Allahımın və ürəyimin diktəsi ilə xalqıma, millətimə, dövlətimə, oxucularıma nəyi demişəmsə dolaşa-dolaşa, dolaşdıra-dolaşdıra yox, birbaşa, kəsə və aydın, duru və təmiz səmimiyyətlə demişəm. Bu səmimiyyət mənim südümdən, sümüyümdən, kökümdən, zatımdan, ağsaqqalımdan, ağbirçəyimdən, sazımdan, sözümdən, Borçalımdan, Azərbaycanımdan gəlibdir. Dövlətimə, dövlətçiliyimə tükənməz inamımdan, insanlar arasında mənəvi birlik yaratmaq eşqimdən gəlibdir.
Möhtərəm Prezident!
İki müqəddəs sözü - xalq və şair sözünü taleh ünvanında qoşalaşdıran mənim üçün unudulmaz tarix olan Sərəncama görə, Azərbaycanın hər yerindən, qoynunda boya-başa çatdığım Borçalı mahalından, xarici ölkələrdən gələn çoxlu sayda zənglərə, təbrik teleqramlarına, oxucu məktublarına görə bir daha Sizə - sevimli Prezidentimə və böyük xalqıma dərin təşəkkürümü və tükənməz sevgimi və sevincimi çatdırıram. Əmin ola bilərsiniz ki, bu vaxta qədər olduğu kimi, bundan sonra da qəlbim, ruhum və qələmimlə, sazım, sözüm və şeiriyyətimlə müstəqil Azərbaycan Respublikasına, onun xalqına və Prezidentinə, ən nəhayət, ulu öndərimiz Heydər Əliyevin bizə əmanət qoyub getdiyi yola sədaqətlə xidmət edəcəyəm. Bir daha sağ olun!
Hörmətlə,
Zəlimxan Yaqub
21 yanvar 2005-ci il.
Bölmənin digər xəbərləri
