AZƏRBAYCAN ŞAHMATÇILARI KİŞİLƏR ARASINDA AVROPA KLUBLARININ KUBOKU YARIŞLARINDA İŞTİRAK EDƏCƏKLƏR
Bakı, 1 oktyabr (AZƏRTAC). Oktyabrın 4-də Makedoniyanın Oxrid şəhərində kişilər arasında şahmat üzrə Avropa klublarının 25-ci kuboku yarışları başlanacaqdır. Yarışlara 54 komanda qatılacaqdır. Azərbaycan idmançıları müxtəlif komandaların tərkibində yarışacaqlar. Vüqar Həşimov (2740) İsrailin “Aşdod” klubunun tərkibində ikinci şahmat taxtasında oynayacaqdır. Birinci nömrə ilə Ukrayna qrossmeysteri Vasili İvançuk (2756) çıxış edəcəkdir. İsrail komandasına, həmçinin Emil Sutovski (2676), Boris Avrux (2668), İlya Smirin (2648), Vitali Qolod (2602) və Artur Koqan (2522) daxildir.
Şəhriyar Məmmədyarov (2721), Qədir Hüseynov (2667), Rauf Məmmədov (2626) Makedoniyanın ”Alkaloid” klubunun tərkibində oynayacaqlar. Onlarla birlikdə bu komandada Qata Kamski (ABŞ, 2692), Andrey Volokitin (Ukrayna, 2681), Trajko Nedev (Makedoniya, 2511), Zvonko Tranojovski (Makedoniya, 2492) və Aleksandr Koloviç (Makedoniya, 2441) yarışacaqlar.
Turnir oktyabrın 11-də başa çatacaqdır.
Bölmənin digər xəbərləri
