AZƏRBAYCAN ŞAHMATÇISI NİCAT MƏMMƏDOV “PREZİDENT KUBOKU” TURNİRİNDƏ ÜÇÜNCÜ YERƏ YÜKSƏLMİŞDİR
AZƏRTAC xəbər verir ki, Bakı Əyləncə Mərkəzində ümummilli lider Heydər Əliyevin xatirəsinə həsr olunmuş “Prezident kuboku” ikinci beynəlxalq şahmat festivalı davam edir.
Festivalın nüfuzlu açıq turnirində Azərbaycan şahmatçıları Rauf Məmmədov yarışın hazırkı lideri isveçrəli Vadim Milovla, Nicat Məmmədov isə ukraynalı Aleksandr Zubarevlə heç-heçə oynamışlar. Hazırda V.Milov 6 xalla birinci yeri tutur. Gürcüstanlı Davit Lomsadzeni məğlub edən Belarus qrossmeysteri Vadim Malaxatko 5,5 xalla ikinci yerdədir. Eyni xala malik Nicat Məmmədov isə üçüncü pilləyə yüksəlmişdir.
Digər Azərbaycan şahmatçıları Qədir Hüseynov, Zeynəb Məmmədyarova və Loğman Quliyev də bu turda qələbə qazanmışlar.
Turnirdə ən yüksək reytinqə malik britaniyalı Naycel Şort isə gürcüstanlı Davit Şengeliyanı məğlub etmişdir. Hazırda qrossmeyster 5,5 xalla 8-ci yeri tutur. Daha bir iddialı şahmatçı alman Arkadi Naydiç Konstantin Şanava (Gürcüstan) üzərində qələbə qazanmışdır. Təcrübəli Lyuk Van Veyli (Hollandiya) isə bu turda Stanislav Savçenko (Ukrayna) ilə heç-heçə oynamışdır.
Bölmənin digər xəbərləri
