Azərbaycan səfirinin İtaliya mətbuatında Ermənistanın son təxribatlarına dair yazıları dərc olunub
Roma, 17 iyul, AZƏRTAC
Azərbaycanın İtaliyadakı səfiri Məmməd Əhmədzadənin Ermənistanın Azərbaycana qarşı hərbi təcavüzü və Ermənistan-Azərbaycan sərhədi boyunca həyata keçirdiyi hərbi təxribatları ilə bağlı İtaliyanın “Sardegnagol”, “Agenzia Nova” və “İnsideOver” kimi kütləvi informasiya vasitələrində məqalə və açıqlamaları dərc olunub.
AZƏRTAC xəbər verir ki, yazılarda Azərbaycanın 30 ildir Ermənistanın hərbi təcavüzünə məruz qaldığı, Dağlıq Qarabağ bölgəsi və ətraf yeddi rayonu daxil olmaqla beynəlxalq səviyyədə tanınmış ərazilərinin 20 faizinin işğalı, azərbaycanlılara qarşı etnik təmizləmə, 1 milyondan çox azərbaycanlının qaçqın və məcburi köçkünə çevrilməsi, ölkəmizin tarixi-mədəni irsini dağıdılması, Xocalı soyqırımı, Ermənistan silahlı qüvvələrinin Azərbaycan ərazilərindən çıxarılmasını tələb edən BMT Təhlükəsizlik Şurasının qətnamələri və onlara Ermənistanın məhəl qoymaması faktları əksini tapıb.
Diplomat qeyd edir ki, Ermənistan ordusunun bu təxribatı ölkə rəhbərliyinin son zamanlar bölgədə gərginliyin artmasına xidmət edən fəaliyyət və bəyanatlarının davamı kimi nəzərdən keçirilməlidir. Bu avantüra Ermənistan rəhbərliyinin özünün yarıtmaz siyasəti və pandemiya nəticəsində daha da kəskinləşən sosial-iqtisadi problemlərin və dərin böhran, habelə daxildəki problemlərdən diqqəti yayındırmaq məqsədi daşıyır.
M.Əhmədzadə Ermənistanın silahlı qüvvələrini Azərbaycanın beynəlxalq səviyyədə tanınmış ərazilərindən çıxartmaq əvəzinə yeni mövqelər əldə etmək və bölgədə gərginliyi daha da artırmaq məqsədi güddüyünü, eləcə də hərbi təxribatlarda Azərbaycan əhalisinin sıx məskunlaşdığı əraziləri bombaladığını, beynəlxalq hüququn fundamental norma və prinsipləri, o cümlədən beynəlxalq humanitar hüququ pozduğunu bildirir.
Diplomat vurğulayır ki, Ermənistanın hərbi təxribatları təmas xəttində yox, iki ölkə arasındakı dövlət sərhədinin Tovuz rayonu istiqamətində baş verir və məhz bu ərazilərdə təxribat və gərginlikdə məqsəd münaqişəyə üçüncü tərəfləri cəlb etməkdir. Lakin Ermənistan rəhbərliyinin gözləntiləri puç olub, erməni tərəfinin məkrli niyyətləri anlaşılaraq sağlam məntiq qalib gəlib.
Diplomat qeyd edir ki, Tovuz rayonu strateji əhəmiyyətə malik bir ərazidir. Buradan Avropaya, xüsusilə də İtaliyaya xam neft daşıyan Bakı-Tbilisi-Ceyhan, İtaliyaya qədər uzanan TransAdriatik boru kəmərinin də daxil olduğu Cənub Qaz Dəhlizinin başlanğıc hissəsi olan Cənubi Qafqaz boru kəmərləri, habelə İpək Yolunun yenidən canlandırılmasına əsas yaradan Bakı-Tbilisi-Qars dəmir yolu xətti keçir. Bu səbəblərdən də Ermənistanın son təxribatlarında məqsədi bu ərazidə sabitliyi pozmaq və Avropa üçün alternativ enerji mənbələrinə və yeni bazarlara çıxmağa imkan yaradan bu əhəmiyyətli layihələrin fəaliyyətinə maneçilik törətməkdir.
Məqalələrdə Azərbaycan və İtaliya arasında yaxın əlaqələr nəzərə alınmaqla, İtaliyanın bu münaqişənin həllində daha fəal olmasının vacibliyi vurğulanıb. Prezident İlham Əliyevin cari ilin fevral ayında İtaliyaya dövlət səfəri zamanı imzalanmış “Azərbaycan Respublikası ilə İtaliya Respublikası arasında Çoxşaxəli Strateji Tərəfdaşlığın Gücləndirilməsinə dair Birgə Bəyannamə”də tərəflərin bir-birinin müstəqilliyini, suverenliyini, ərazi bütövlüyünü və beynəlxalq səviyyədə tanınmış sərhədlərinə dəstəyini, dövlətlərarası münasibətlərdə təcavüz aktlarının yolverilməzliyini təsdiq etdiklərini, habelə İtaliyanın Ermənistan-Azərbaycan Dağlıq Qarabağ münaqişəsinin Helsinki Yekun Aktının təməl prinsipləri, xüsusilə suverenlik, ərazi bütövlüyü və beynəlxalq sərhədlərin toxunulmazlığı əsasında, BMT və ATƏT-in müvafiq sənəd və qərarlarında təsbit olunduğu kimi sülh yolu ilə nizamlanmasını dəstəklədiyini bildirir.
“Ermənistan Azərbaycan ərazilərini işğal edib və təcavüzkardır, Azərbaycan isə təcavüzə məruz qalan tərəfdir. Dünya ictimaiyyəti təcavüzkarla təcavüzə məruz qalan tərəf arasında fərq qoymayana, onu bu siyasətindən çəkindirmək üçün güclü təzyiq etməyənədək, təcavüzkar öz cinayətkar əməllərini davam etdirəcək. Ermənistanın hazırkı təxribatlarının səbəbi beynəlxalq ictimaiyyət tərəfindən güclü təzyiqin olmamasıdır, çünki cəzasızlıq yeni cinayətlərə yol açır. Bu səbəbdən də dünya ictimaiyyəti Ermənistanın Azərbaycana qarşı işğal siyasətini və dövlət sərhədi boyu hazırda həyata keçirdiyi təxribatları sərt şəkildə qınamalıdır”, - deyə diplomat fikirlərini tamamlayıb.
Aygün Əliyeva
AZƏRTAC-ın xüsusi müxbiri
Roma
Bölmənin digər xəbərləri
