AZƏRBAYCAN SƏFİRLİYİNİN NÜMAYƏNDƏ HEYƏTİ SLOVENİYA XARİCİ İŞLƏR NAZİRLİYİNDƏ İŞÇİ GÖRÜŞLƏR KEÇİRMİŞDİR
AZƏRTAC-ın xüsusi müxbiri xəbər verir ki, Azərbaycanın Avstriyada, eləcə də Sloveniya və Slovakiyada akkreditə olunmuş səfirliyinin nümayəndələri mayın 7-8-də Lyublyana şəhərində Sloveniya xarici işlər nazirliyinin əməkdaşları ilə görüşmüşlər.
Nazirliyin konsulluq idarəsində, multilateral siyasi əlaqələr və diplomatik əlaqələr departamentində keçirilən görüşlərdə Azərbaycan ilə Sloveniya arasında münasibətlərin inkişaf perspektivləri, ikitərəfli yüksək səfərlərin təşkili, Xarici İşlər Nazirlikləri səviyyəsində məsləhətləşmələrin aparılması, hər iki ölkənin diplomatik və xidməti pasportlara malik vətəndaşlarının vizasız gediş-gəlişi və digər məsələlər ətrafında fikir mübadiləsi aparılmışdır.
Səfirliyin əməkdaşları yerli hakimiyyət nümayəndələri ilə birlikdə Sovet İttifaqı qəhrəmanı, Azərbaycanın igid oğlu Mehdi Hüseynzadənin Novo Qoritsa şəhəri yaxınlığında yerləşən Şempas qəsəbəsində ucaldılmış abidəsini ziyarət etmişlər.
Bölmənin digər xəbərləri
