Azərbaycan səhnəsindən beynəlxalq uğurlara: Akademik Musiqili Teatrın 115-ci mövsüm nailiyyətləri
Bakı, 7 yanvar, Fidan Əlizadə, AZƏRTAC
Azərbaycan Dövlət Akademik Musiqili Teatrının yaradıcı kollektivi yanvarın 11-i və 12-də Xalq artisti İlham Namiq Kamalın yubileyi münasibətilə hazırlanan “Əliqulu bu gün evlənir” tamaşasını təqdim edəcək. Dövrümüzlə səsləşən, maraqlı və dinamik süjet xətti olan komediya yazıçı-dramaturq Sabit Rəhmanın əsəri əsasında səhnələşib. Tamaşanın əsas obrazı Əliqulu satira və gülüş hədəfinə çevrilib.
Bu sözləri AZƏRTAC-ın müxbiri ilə söhbətində teatrın mətbuat xidmətinin rəhbəri Fəridə Aslanova deyib. Teatrın qazandığı uğurlardan və yeni layihələrindən söhbət açan F.Aslanovanın müsahibəsini təqdim edirik.
-115-ci mövsümünü geridə qoyan Azərbaycan Dövlət Akademik Musiqili Teatrı üçün 2024-cü ili necə dəyərləndirirsiniz?
-2024-cü il teatrımız üçün olduqca uğurlu bir il kimi yadda qaldı. Həm repertuarımızda yer alan tamaşaların nümayişi, həm də yeni səhnə əsərlərinin təqdimatı baxımından zəngin bir il keçirdik. Teatrsevərlərin zövqünü oxşamaq və sənətimizə olan marağı artırmağa çalışdıq. Bir-birindən maraqlı tamaşalarla həm ölkəmizdə, həm də xarici ölkələrdə teatrımızı uğurla təmsil etdik.
-Ötən il ərzində təqdim olunan tamaşalardan hansıları xüsusi qeyd edə bilərsiniz?
-Yeni səhnə əsərlərimiz arasında “Adamın adamı” (Vasif Adıgözəlov, Anar, quruluşcu rejissor Əsgər Əsgərov), “Palata” (Anton Çexov, rejissor Ər-Toğrul), “Qadınım” (Tuncər Çücənoğlu, rejissor İradə Gözəlova) və “Əliqulu bu gün evlənir” tamaşaları xüsusi maraq doğurdu. Bundan başqa, monotamaşalarımız - “Killerdən teleqram” (rejissor Zaur Əliyev) və “Aysedora” (rejissor Cavid İmamverdiyev) da böyük uğur qazandı. Balaca teatrsevərlər üçün “İki küpəgirən qarı” və Yeni il ərəfəsində təqdim olunan “Evdə tək” tamaşası da çox bəyənildi.
-Teatrın beynəlxalq əlaqələri hansı səviyyədədir?
-2024-cü ildə teatrımız beynəlxalq tədbirlərdə fəal iştirak etdi. May ayında Moskvanın “Pyotr Fomenkonun emalatxanası” teatrı bizdə qonaq oldu və “Qurdlar və qoyunlar” tamaşasını təqdim etdi. Sentyabr ayında isə “Aysedora” monotamaşamız Belarusun Brest şəhərində keçirilən 28-ci “Belaya Veja” Beynəlxalq Teatr Festivalında nümayiş olundu və mükafata layiq görüldü. Solistimiz Rauf Babayev Qazaxıstanda “DosStar” Operetta və Müzikl Festivalında çıxış edərək ölkəmizi uğurla təmsil etdi.
-Regionlara təşkil olunan səfərlər barədə fikirləriniz də maraqlı olardı...
- Regionlara qastrol səfərləri ənənəmiz davam edir. Ötən il teatrımız Şəki Beynəlxalq Teatr Festivalında və Gəncə Dövlət Filarmoniyasında uğurla çıxış etdi. Gənc rejissor Zaur Əliyevin quruluşunda hazırlanan “Killerdən teleqram” monotamaşası Qazaxıstanın Şimkənd şəhərində keçirilən Mərkəzi Asiya Ölkələrinin IX Beynəlxalq Teatr Festivalında mükafatlar qazandı.
-Ölkəmizin ev sahibliyi etdiyi COP29 tədbiri çərçivəsində teatr hansı repertuarla çıxış etdi?
- BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası, yəni COP29 günlərində teatrımız xüsusi repertuarla çıxış etdi. Qırğızıstanın “Adəm” adlı balet tamaşası teatrımızda böyük maraqla qarşılandı. Bu tədbir çərçivəsində qapılarımızı bütün teatrsevərlərə açıq elan etdik və hər kəsə zəngin bir proqram sərgilədik. Hətta Esvatini Krallığının xanımı Philile Thulile Dlamini teatrımızı ziyarət etdi və xoş təəssüratlarla ayrıldı.
- 2025-ci il üçün planlarınız...
- İnanırıq ki, yeni ildə də uğurlarımız davam edəcək. Tamaşaçılarımıza daha çox yeni səhnə əsərləri təqdim etməyi, beynəlxalq layihələrdə iştirak etməyi və teatrın sənət aləmindəki mövqeyini daha da gücləndirməyi planlaşdırırıq. Teatrımızda yanvarın 10-da “İnanıram”, 16-da “Leyli və Məcnun”, 17-də “Anamın kitabı” və “Kimdir müqəssir?”, 18-də “Paris Notr-Dama ithaf”, 19-da “Bir nəfəs qədər”, 23-də “Aysedora”, 24-də “999-cu gecə”, 25-də “Buratino”, “Psix”, 26-da “İki küpəgirən qarı”, “Lara Martin’s Jazz Club”, 30-da “Killerdən teleqram”, 31-də isə “O olmasın, bu olsun” tamaşaları nümayiş olunacaq. Bütün teatrsevərləri repertuarımızı izləməyə və tamaşalarımıza baxmağa dəvət edirik!
Bölmənin digər xəbərləri
