Azərbaycan televiziyası verilişlərinin Gürüstanda yayımlanma dairəsi genişlənir
Dmanisi rayonunun ən ucqar kəndlərindən olan Yırğançaya bu günlərdə rayon mərkəzindən 24 kilometr uzunluğunda yeni elektrik xətti çəkilmişdir.
Kənd sakinlərinin böyük sevincinə səbəb olmuş bu hadisə ilə əlaqədar Kvemo Kartli - Borçalı bölgəsi qubernatorluğu və rayon rəhbərliyi nümayəndələrinin iştirakı ilə mərasim keçirilmişdir. Kənd məclisi idarə heyətinin sədri Bahadur Mustafayev mərasimi açaraq, buraya əvvəllər elektrik enerjisinin Ermənistandan verildiyindən və onların tez-tez xətləri sıradan çıxarmasından, işığı kəsməsindən danışmış, yeni xəttin çəkilməsində kömək göstərmiş Azərbaycan dövlətinə minnətdarlığını bildirmişdir. O, həmçinin demişdir ki, Azərbaycan Rabitə Nazirliyinin Teleradio İstehsalat Birliyi rayon ərazisində ötürücü quraşdırdıqdan sonra kənd sakinləri Azərbaycan televiziyası birinci proqramının verilişlərinə baxa bilirlər.
Teleradio İstehsalat Birliyin nümayəndəsi Yunis Səfərov çıxışında bildirmişdir ki, Novruz bayramınadək Hamamlı və Qarabulaq kəndlərinin sakinlərinə də Azərbaycan televiziyasının verilişlərini izləmək imkanı yaradılacaqdır.
Şahismayıl Məmmədov
AZƏRTAC-ın xüsusi müxbiri
Dmanisi
Bölmənin digər xəbərləri
