AZƏRBAYCAN TENNİSÇİSİ RUSİYADA KEÇİRİLƏN TURNİRİN QALİBİ OLMUŞDUR
Azərbaycan tennisçisi Vüqar Əliyev Rusiyanın Vsevolojsk Tennis Akademiyasının açıq yay turnirinin qalibi olmuşdur.
Azərbaycan Tennis Federasiyasından AZƏRTAC-a bildirmişlər ki, turnirdə14 yaşadək idmançılar arasında çıxış edən V.Əliyev bu yaş qrupunda Rusiya reytinqinin birinci və ikinci onluğunda yer alan tennisçilərlə qarşılaşmışdır.
Bütün görüşlərini qələbə ilə başa vuraraq finala yüksələn Azərbaycan idmançısı həlledici mərhələdə ötən il Rusiya yığma komandasının 1 nömrəli oyunçusu hesab olunan Vsevolojsk Tennis Akademiyasının yetirməsi Pyotr Arxipovla qarşılaşmışdır. Gərgin mübarizə şəraitində keçən görüşün birinci hissəsi həmyerlimizin qələbəsi (6:3) ilə başa çatsa da, ikinci hissə ərəfəsində başlanan güclü yağış, oyunun 1,5 saat müddətinə dayandırılması ilə nəticələnmişdir. Görüş bərpa olunduqdan sonra isə V.Əliyev ikinci hissəni 3:6 hesabı ilə məğlub kimi başa vurmuşdur. Bununla belə, üçüncü həlledici hissədə rəqibindən üstün olduğunu sübut edən V.Əliyev 6:3 hesabı ilə qələbə qazanaraq birinci yeri tutmuşdur.
Yarışda Rusiyanın 15 şəhərini təmsil edən idmançılar mübarizə aparmışlar.
Bölmənin digər xəbərləri
