CƏMİYYƏT
Azərbaycan-Türkiyə münasibətlərinə dair yeni kitab nəşr edilib
![Azərbaycan-Türkiyə münasibətlərinə dair yeni kitab nəşr edilib](/files/2020/1/1200x630/15814149492330459173_1200x630.jpg)
Bakı, 11 fevral, AZƏRTAC
Beynəlxalq Münasibətlər Təhlili Mərkəzinin şöbə müdiri, fəlsəfə elmləri doktoru Cavid Vəliyevin “Azərbaycan-Türkiyə strateji müttəfiqliyi: tarixi və müasir əsasları” adlı kitabı çap edilib.
Mərkəzdən AZƏRTAC-a verilən məlumata görə, türk dilində nəşr olunan kitabda Azərbaycan-Türkiyə əlaqələri beynəlxalq münasibətlərdə strateji müttəfiqlik anlayışı çərçivəsində təhlil edilir.
Kitabda bugünkü Azərbaycan-Türkiyə strateji müttəfiqlik ideyasının əsaslarının XX əsrin əvvəllərində iki xalqın ziyalıları tərəfindən qoyulduğu qeyd olunur. Azərbaycan yenidən müstəqilliyini əldə etdikdən sonra iki dövlət arasında münasibətlərin mərhələli şəkildə strateji müttəfiqlik səviyyəsinə çatması təhlil edilir.
Nəşrdə Azərbaycanın ümummilli lideri Heydər Əliyevin və Türkiyənin mərhum Prezidenti Süleyman Dəmirəlin hakimiyyətləri dövründə münasibətlərdən bəhs olunur. Eyni zamanda, Azərbaycan Prezidenti İlham Əliyev ilə Türkiyə Prezidenti Rəcəb Tayyib Ərdoğan arasındakı dostluq münasibətlərinin iki dövlət arasında strateji müttəfiqlik əlaqələrinin müasir səviyyəyə çatmasına xidmət etdiyi vurğulanır.
Altı fəsil və 390 səhifədən ibarət kitabda hərbi, iqtisadi, enerji və nəqliyyat sahələrində əlaqələr ətraflı təhlil edilib.