Azərbaycan Universitetində bakalavriat səviyyəsinə plan yerlərinin artırılması nəzərdə tutulur
Bakı, 17 iyul, AZƏRTAC
Azərbaycan Universiteti 2026/2027-ci tədris ili üzrə bakalavriat səviyyəsinə qəbul planını təsdiqləyib.
Universitetdən AZƏRTAC-ın sorğusuna cavab olaraq bildirilib ki, yeni tədris ili üçün 24 ixtisas üzrə ümumilikdə 1155 plan yeri ayrılıb. Onlardan 1035-i Azərbaycan, 120-si isə ingilis bölməsi üçün nəzərdə tutulub. Ötən tədris ilində bu göstəricilər müvafiq olaraq 1075, 995 və 80 olub.
Bildirilib ki, Azərbaycan Universiteti bakalavriat səviyyəsi üzrə dövlət sifarişi əsasında tələbə qəbulunun müsabiqəsində də iştirak edir. Universitetin bütün bakalavriat ixtisaslarına dövlət sifarişi əsasında qəbul mümkündür. Bundan əlavə, qəbul formasından asılı olmayaraq, universitetin tələbələrinə dövlət büdcəsinin vəsaiti hesabına təqaüd almaq imkanı yaradılıb. 2026/2027-ci tədris ili üzrə qəbul planı hazırlanarkən abituriyentlərin ixtisas seçim meyilləri ilə yanaşı, əmək bazarının tələbləri nəzərə alınıb. Bu məqsədlə həm abituriyentlər arasında populyar olan, həm də əmək bazarında yüksək tələbat və geniş karyera perspektivləri ilə seçilən ixtisaslara daha çox qəbul yeri ayrılıb. Bu baxımdan informasiya texnologiyaları, biznesin idarə edilməsi, marketinq, sosial iş, dövlət və ictimai münasibətlər ixtisasları üzrə qəbul yerlərinin sayı daha çoxdur. Qəbul planına əsasən, ən çox yer ayrılan ixtisaslar bunlardır: sosial iş (əyani və qiyabi, Azərbaycan və ingilis bölmələri üzrə 100 yer), turizm işinin təşkili (əyani və qiyabi, Azərbaycan və ingilis bölmələri üzrə 100 yer), dövlət və ictimai münasibətlər (90 yer), biznesin idarə edilməsi (Azərbaycan və ingilis bölmələri üzrə 80 yer), marketinq (Azərbaycan və ingilis bölmələri üzrə 80 yer), mühasibat (Azərbaycan və ingilis bölmələri üzrə 60 yer) və informasiya texnologiyaları (50 yer).
Azərbaycan Universiteti tələbələrin beynəlxalq akademik və peşəkar mühitə inteqrasiyasını, eləcə də rəqabətqabiliyyətli mütəxəssis kimi formalaşmasını dəstəkləmək məqsədilə bu il də bir sıra ixtisaslar üzrə ingilis bölməsinə qəbulu davam etdirəcək. İnformasiya təhlükəsizliyi, biznesin idarə edilməsi, iqtisadiyyat, maliyyə, marketinq, menecment, mühasibat, turizm işinin təşkili və sosial iş ixtisaslarına Azərbaycan bölməsi ilə yanaşı, ingilis bölməsi üzrə də qəbul aparılacaq. Bu ixtisaslara qəbul olunan tələbələr üçün birillik ingilis dili hazırlıq mərhələsi nəzərdə tutulur. IELTS (6.0 və yuxarı), TOEFL (75 və yuxarı) və ya PTE (50 və yuxarı) beynəlxalq sertifikatına malik abituriyentlər hazırlıq mərhələsindən azad olunaraq birbaşa ixtisas təhsilinə başlayacaqlar.
Qeyd edək ki, bu ixtisaslara dövlət sifarişi əsasında qəbul olunan tələbələr üçün dövlət maliyyələşdirməsi yalnız ixtisas təhsilinin dörd ilini əhatə edir. Bu səbəbdən ingilis dili hazırlıq mərhələsinin təhsil haqqı universitetin mövcud qaydalarına uyğun olaraq tələbə tərəfindən ödənilir.
Müxbir - Tünzalə Zeyvəliyeva
Bölmənin digər xəbərləri
