AZƏRBAYCAN VƏ İRAN PREZİDENTLƏRİNİN BİRGƏ MƏTBUAT KONFRANSI
AZƏRTAC-ın xüsusi müxbiri xəbər verir ki, yanvarın 26-da Tehranda sənədlərin imzalanmasından sonra Azərbaycan Prezidenti İlham Əliyev və İran Prezidenti Seyid Məhəmməd Xatəmi birgə mətbuat konfransı keçirmişlər.
S U A L: Mənim ilk sualım cənab Prezident İlham Əliyevədir. Cənab Prezident, İran İslam Respublikasına rəsmi səfərinizi necə qiymətləndirirsiniz və imzalanan sənədlər münasibətlərimizə necə təsir göstərəcəkdir?
İkinci sualım hər iki prezidentədir. Xəzər dənizinin hüquqi statusunun müəyyən edilməsi məsələsini necə görürsünüz və iki ölkənin bu sahədə əməkdaşlığını necə qiymətləndirirsiniz?
İLHAM ƏLİYEV: İran İslam Respublikasına ilk rəsmi səfərimi çox yüksək qiymətləndirirəm. Hesab edirəm ki, bu səfər bizim gələcək əməkdaşlığımıza güclü təkan verəcəkdir.
İranla Azərbaycan arasında olan münasibətlər daha da inkişaf edəcəkdir, bütün sahələri əhatə edəcəkdir.
Bir neçə ay bundan əvvəl İran İslam Respublikasının Prezidenti hörmətli cənab Xatəmi Azərbaycanda səfərdə idi. Həmin səfər də çox uğurlu olmuşdu, çoxlu sənədlər imzalanmışdı. Gördüyünüz kimi, bu gün də çoxlu sənədlər imzalanıbdır. Bu sənədlərin icrası bizə imkan verəcək ki, Azərbaycanla İran arasında olan əlaqələr güclənsin, hər iki ölkə iqtisadi cəhətdən daha da inkişaf etsin, ölkələrimiz və xalqlarımız bir-birinə daha da yaxın olsunlar.
Biz ikitərəfli münasibətlərə böyük əhəmiyyət veririk. Şadıq ki, bu əlaqələr çox sürətlə inkişaf edir və demək olar, iki ölkə arasında olan əlaqələrdə yeni mərhələ başlanıbdır. Bu, bizi çox sevindirir və milli maraqlarımıza cavab verir.
İkinci suala gəldikdə, qeyd etməliyəm ki, Xəzər dənizinin hüquqi statusu mütəmadi qaydada müzakirə olunur, danışıqlar davam edir və çox səmərəli, işgüzar şəraitdə keçirilir. Aparılan danışıqlar bunu göstərir ki, hər iki tərəf bu danışıqları səmimi şəkildə aparır və bizim niyyətimiz ondan ibarətdir ki, bu məsələ öz həllini tapsın.
SEYİD MƏHƏMMƏD XATƏMİ: Mən də öz növbəmdə cənab Prezident İlham Əliyevin söylədiyi fikirlərə razılığımı bildirirəm. Ümid edirəm ki, bizim danışıqlarımız dostluq və hüsniyyətlə davam edir. Burada əsas mühüm məsələ ondan ibarətdir ki, Allahın bizə bəxş etdiyi çox gövhər bir dəniz olan Xəzər onun ətrafında yerləşən beş ölkəyə məxsusdur və burada hər birimizin mənafeyi, eləcə də, Allahın bizə bəxş etdiyi bu nemət də qorunmalıdır.
SUAL: Mənim sualım İran Prezidentinədir. Cənab Prezident, Azərbaycanla İran arasında iqtisadi əməkdaşlığın perspektivlərini necə görürsünüz və Şimal-Cənub nəqliyyat dəhlizinin reallaşması barədə nə deyə bilərsiniz?
SEYİD MƏHƏMMƏD XATƏMİ: Təbiidir ki, bizim apardığımız müzakirələrin əsas istiqamətlərindən biri də iki ölkə arasında iqtisadi münasibətlər idi. Cənab Prezident İlham Əliyev İran İslam Respublikasının böyük sənaye və istehsal müəsissəsi ilə tanış olmuşdur. Bu gün Təbrizə səfəri zamanı çox böyük istehsal kompleksi olan traktorqayırma kompleksi ilə yaxından tanış olacaqdır. Biz mövcud ticarət əlaqələrinin genişləndirilməsini bir daha təkid edərək, ölkələrimizin münasibətlərində iqtisadi sahədə əlaqələrin daha da inkişaf etdirilməsinə çalışacağıq.
Hər iki ölkənin iqtisadi imkanları hərtərəfli inkişafımızı tamamlaya bilər. Biz ümid edirik ki, bu gün razılaşdırdığımız sənədlər gələcəkdə özünün real nəticəsini verəcəkdir.
Şimal-Cənub nəqliyyat dəhlizi çox böyük dördyoldur ki, o, həm şimal ilə cənubu həm də şərq ilə qərbi birləşdirir. Bu istiqamətdə Rusiya, İran və Azərbaycan Respublikası çox mühüm əməkdaşlıq edirlər. Azərbaycanın dəmir yolu xətlərinin İranın dəmir yolu ilə birləşdirilməsi və dəhlizin daha da fəal istifadə olunması üçün çəkilməkdə olan və çəkiləcək yollar bu dəhlizin daha fəal nəqliyyat dəhlizi olacağını göstərir.
Bu gün imzalanan sənədlərdən biri də dəmir yolu sahəsində əməkdaşlığa aiddir. Şimal nöqtəsinin Azərbaycan dəmir yolu vasitəsilə Oman dənizinə birləşdirilməsi regionumuzda çox böyük dəyişikliklərin yaranmasına səbəb olacaqdır. Bu yol həmçinin qərbin və şərqin cənubla və şimalla birləşdirilməsi üçün, o cümlədən də şimalın Hind okeanına da yolunun açılması üçün çox mühümdür.
Şimal-Cənub nəqliyyat dəhlizi təkcə Rusiya, Azərbaycan və İrana məxsus deyildir. Bəlkə də bu, yeni dünya əsrində qlobal iqtisadiyyatın birləşdirilməsi dəhlizidir. Sağ olun.
Bölmənin digər xəbərləri
