AZƏRBAYCAN VƏ İRAN PREZİDENTLƏRİNİN GENİŞ TƏRKİBDƏ DANIŞIQLARI
AZƏRTAC-ın xüsusi müxbiri xəbər verir ki, yanvarın 24-də İran Prezidentinin sarayında Azərbaycan Respublikasının Prezidenti İlham Əliyevin və İran İslam Respublikasının Prezidenti Seyid Məhəmməd Xatəminin geniş tərkibdə danışıqları olmuşdur.
İran Prezidenti Xatəmi Azərbaycan Prezidentini və onu müşayiət edən nümayəndə heyətinin üzvlərini səmimiyyətlə salamlayaraq dedi:
- Cənab Prezident, Sizə və Sizi müşayiət edən nümayəndə heyətinin üzvlərinə bir daha “Xoş gəlmisiniz!” deyirəm. Bu gün bizim üçün çox yaxşı bir gündür. Çox əziz bir dostumuzu görmək və çox əziz bir millətin nümayəndəsini görmək böyük şərəfdir. Bizim Azərbaycanla münasibətlərimiz iki qonşu ölkə arasında olan münasibətlərdən qat-qat yüksəkdir. Hər halda, qonşular bir-birilə rəqabət şəraitində yaşamalıdırlar. Amma bizim münasibətlərimiz iki qonşu ölkənin münasibətlərindən qat-qat yüksəkdir. Bizi bir-birimizlə bağlayan tarixi, mədəni incilərdir və eyni zamanda qohumluq əlaqələridir. Bu, onu göstərir ki, bizim mənafeyimiz bir-birilə çox sıx bağlıdır.
Mən çox şadam ki, son aylar və son il ərzində münasibətlərimiz çox sürətlə inkişaf edir. Xoşbəxtlik ondadır ki, Siz əlaqələrimizə xoşniyyətli münasibət bəsləyirsiniz. Eləcə də mən bu cür münasibət bəsləyirəm. Bizim mənafeyimiz eynidir. Bizim təhlükəsizliyimizə olan təhdidlər də eynidir. Bu, bizi məcbur edir ki, bir-birimizin yanında olaq.
Son altı ay ərzində deyə bilərik ki, 20-dək sənəd imzalanıb, yaxud imzalanacaqdır. Bu, bizim əlaqələrimizə göstərdiyimiz ciddi münasibətin göstəricisidir. Allah rəhmət eləsin, Azərbaycan Respublikasının Prezidenti cənab Heydər Əliyevin ruhunu bir daha hörmətlə yad edirik. Biz qətiyyətlə inanırıq ki, rəhmətlik cənab Heydər Əliyevin öz ölkəsi üçün və bu bölgədə sülhün, əmin-amanlığın yaranması üçün gördüyü işlər Sizin güclü əliniz və möhkəm iradəniz nəticəsində davam etdiriləcəkdir.
Sonra Prezident Xatəmi İran nümayəndə heyətinin üzvlərini dövlətimizin başçısına təqdim etdi.
Azərbaycan Respublikasının Prezidenti İlham Əliyev səmimi görüşə görə minnətdarlığını bildirərək dedi:
- Hörmətli cənab Prezident, çox sağ olun. İlk növbədə, bu dəvətə görə, mənə və nümayəndə heyətinin bütün üzvlərinə göstərdiyiniz qonaqpərvərliyə görə Sizə öz dərin minnətdarlığımı bildirirəm. Biz bu səfəri çox səbirsizliklə gözləyirdik. Mən çox şadam ki, bu gün buradayam, İrandayam, Sizinlə görüşürəm və hələ iki gün İranda olacağam. Şübhə etmirəm ki, bu səfər iki ölkə arasında olan münasibətlərə yeni təkan verəcəkdir.
Azərbaycan öz dövlət müstəqilliyini bərpa etdikdən sonra ölkələrimiz arasında əlaqələr uğurla inkişaf edir və güclənir. Münasibətlərin yeni mərhələsi, demək olar ki, 2002-ci ildə xalqımızın ümummilli lideri Heydər Əliyevin İrana rəsmi səfərindən sonra başladı.
Hörmətli Prezident, Sizin Azərbaycana səfəriniz və səfər çərçivəsində imzalanmış çoxlu sənədlər, onların uğurlu icrası göstərir ki, ölkələrimiz arasında əlaqələr həqiqi mənada inkişaf edir və bütün sahələri əhatə edir. Hüquqi, siyasi, iqtisadi, enerji, humanitar və bütün digər sahələrdə bizim əməkdaşlığımızın əməli nəticələri vardır və ümid edirəm ki, bu əməkdaşlıq daha da yüksələcəkdir. İkitərəfli münasibətlərimiz regionda gedən proseslərə də təsir edir və regional əməkdaşlıq baxımından çox vacibdir.
Eyni zamanda regionda sülhün, təhlükəsizliyin təmin olunmasında çox böyük əhəmiyyəti vardır.
Danışıqlarda Azərbaycanın xarici işlər naziri Elmar Məmmədyarov, Naxçıvan MR Ali Məclisinin sədri Vasif Talıbov, iqtisadi inkişaf naziri Fərhad Əliyev, sənaye və energetika naziri Məcid Kərimov, təhsil naziri Misir Mərdanov, səhiyyə naziri Əli İnsanov, Prezident Administrasiyasının şöbə müdiri Novruz Məmmədov, “Azərbaycan Hava Yolları” Dövlət Konserninin baş direktoru Cahangir Əsgərov, Dövlət Dəmir Yolunun rəisi Arif Əsgərov, Milli Məclisin deputatı Əsmətxanım Məmmədova, Azərbaycanın Tehrandakı səfiri Abbasəli Həsənov, İranın Bakıdakı səfiri Əfşar Süleymani və digər rəsmi şəxslər iştirak edirdilər.
Bölmənin digər xəbərləri
