Azərbaycan və Türkiyə Ədliyyə akademiyaları səmərəli əməkdaşlıq edirlər
Bakı, 22 iyul, AZƏRTAC
Azərbaycan Prezidenti İlham Əliyevin məhkəmə-hüquq islahatlarının dərinləşdirilməsinə dair 2019-cu il 3 aprel tarixli Fərmanı ilə əlavə ayrılmış hakim ştatlarının yüksək hazırlıqlı hüquqşünaslar hesabına komplektləşdirilməsi ilə bağlı ardıcıl tədbirlər görülür, bu məqsədlə hakimlərin şəffaf seçimi aparılır. Növbəti seçim zamanı uğur qazanmış 44 namizəd Ədliyyə Akademiyasında uzunmüddətli tədris kursuna cəlb olunub. Kurs zamanı onların, həmçinin beynəlxalq təcrübəni öyrənmələrinə xüsusi diqqət yetirilir.
Ədliyyə Nazirliyinin mətbuat xidmətindən AZƏRTAC-a bildiriblər ki, Azərbaycan və Türkiyə Ədliyyə akademiyaları arasında səmərəli əməkdaşlıq münasibətləri qurularaq ötən dövrdə Türkiyə tərəfinin dəstəyi ilə 300-ə yaxın azərbaycanlı hakimliyə namizəd qardaş ölkədə nəzəri və praktiki təlim keçib.
COVID-19 qlobal pandemiyası ilə əlaqədar xüsusi karantin rejiminin tətbiqi nəzərə alınaraq iki ölkənin Ədliyyə akademiyaları tərəfindən hazırda tədris kursu keçən namizədlər üçün iyulun 16-22-də videokonfrans formatında distant təlim kursu təşkil olunub.
Təlimin açılışında Türkiyə Ədliyyə Akademiyasının rektoru Muhittin Özdemirin və Azərbaycan Ədliyyə Akademiyasının rektor əvəzi Elçin Xələfovun çıxışlarında iki ölkə arasında qədim tarixə söykənən dostluq və qardaşlıq əlaqələrinin bütün sahələrdə inkişafı, dövlətlərimizin başçılarının ikitərəfli əməkdaşlığın möhkəmlənməsində güclü siyasi iradəsi qeyd olunub. Dövlətlərimizin hər zaman bir-birinə dəstək göstərdiyi, bu ərəfədə Azərbaycan-Ermənistan dövlət sərhədinin Tovuz istiqamətində Ermənistanın törətdiyi hərbi təxribat zamanı Türkiyənin Azərbaycana dəstəyi xüsusilə vurğulanıb.
Tədbirdə hüquqi sahədə əlaqələrimizin inkişafından məmnunluq ifadə olunub və birgə keçirilən tədbirlərin, o cümlədən hakimliyə namizədlər üçün distant təlimin və beynəlxalq təcrübənin öyrənilməsinin əhəmiyyəti qeyd edilib.
Təlimdə hakimliyə namizədlərə Türkiyə Ədalət Akademiyasının fəaliyyətinə dair təqdimat nümayiş etdirilib, Türkiyə məhkəmə sistemi və ixtisaslaşdırılmış məhkəmələrin mühakimə prosedurları, UYAP - SEGBİS (Türkiyə milli elektron məhkəmə və ədliyyə məlumat sistemi, səs və videoinformasiya sistemi), elektron bildiriş, icra qurumlarında elektron tədbirlərin tətbiqi və icra icraatı sistemi, mediasiya, korrupsiya cinayətləri barədə məlumat verilib.
Kursun proqramına uyğun olaraq mövzular Türkiyənin nüfuzlu hakimləri tərəfindən tədris olunub, maraqlı diskussiyalar keçirilib, namizədləri maraqlandıran suallar ətrafında faydalı fikir mübadiləsi aparılıb.
Bölmənin digər xəbərləri
