İQTİSADİYYAT
Azərbaycanda daha 9 dövlət əmlakı özəlləşdirilib
Bakı, 19 iyul, AZƏRTAC
Əmlak Məsələləri Dövlət Xidməti tərəfindən dövlət əmlakının özəlləşdirilməsinin sürətləndirilməsi və idarə edilməsinin səmərəliliyinin artırılması məqsədilə hərracların keçirilməsi davam etdirilir. Dövlət əmlakının özəlləşdirilməsi ilə bağlı növbəti hərrac iyulun 19-da keçirilib.
Xidmətdən AZƏRTAC-a bildirilib ki, hərracda 1 yarımçıq tikili və 8 nəqliyyat vasitəsi özəlləşdirilib. Ötən hərraclarda olduğu kimi, bu dəfə də nəqliyyat vasitələrinin özəlləşdirilməsində rəqabət müşahidə edilib. Belə ki, ilkin satış qiyməti 6000 manat olan “Chevrolet Nival” markalı avtomobilə edilən ən son təklif 9700 manatadək yüksəlib. Özəlləşdirilən yarımçıq tikili Xaçmaz rayonunun Nabran kəndində yerləşir.
Özəlləşdirilmiş əmlaklar üzrə dövlət büdcəsinə 96 min 750 manat vəsaitin ödənilməsi nəzərdə tutulur.
Hərracda özəlləşdirilən dövlət əmlaklarının siyahısı ilə buradan tanış olmaq mümkündür: (https://clck.ru/sKmjK).
Məlumat verilib ki, cari ay üzrə növbəti hərraclar iyulun 21-i və 26-da tarixlərində keçiriləcək. Hər kəs Xidmətin rəsmi saytından (emlak.gov.az) və ya Özəlləşdirmə portalından (privatization.az) hərraca çıxarılan dövlət əmlakı üzrə seçim edə bilər. Elektron Xidmətlər Portalından (e-emlak.gov.az) müvafiq hərrac xidmətini seçərək qeydiyyatdan keçib, dövlət əmlakının ilkin hərrac qiymətinin 10 faizi məbləğində behi ödəyib hərracda iştirakçı statusu almaq mümkündür.
Sifarişçilər hərraclara onlayn formada da qoşula bilər. Prosesə marağı olanların hərrac günü həm Əmlak Xidmətləri Məkanına gəlməklə, həm də Elektron Xidmətlər Portalından (e-emlak.gov.az) “Elektron hərrac” bölməsini seçərək hərracları qeydiyyatsız formada izləməsi mümkündür.