Azərbaycanda qadınlar üçün ödənişsiz “IT əsasları” təlimləri keçiriləcək
Bakı, 7 yanvar, AZƏRTAC
Rəqəmsal İnkişaf və Nəqliyyat Nazirliyi (RİNN) ilə “İKT LAB” Tətbiq və Tədris Mərkəzi 2022-ci ildə qadınların informasiya texnologiyaları (IT) sahəsində inkişafına dəstək vermək üçün yeni təşəbbüslərə start verir.
Nazirlikdən AZƏRTAC-a bildirilib ki, xanımların IT üzrə bilik və bacarıqlarının artırılması məqsədilə ödənişsiz “IT əsasları” təliminə qeydiyyat başlayıb.
Bakı şəhərində 3 ay davam edəcək təlim sinif formatında keçiriləcək. Dərslərə Azərbaycanın müxtəlif regionlarından olan qadınlar da onlayn qoşula biləcəklər. Təlimi uğurla bitirənlər RİNN-nin, “İKT LAB” Tətbiq və Tədris Mərkəzinin sertifikatı ilə təltif olunacaqlar.
Treninqlər RİNN-nin və UNESCO təşkilatının dəstəyi ilə keçirilən “Gənc IT peşəkarlar” layihəsi çərçivəsində təşkil olunur.
Təlimdə iştirak üçün yanvarın 23-nə qədər bu link (https://docs.google.com/forms/d/e/1FAIpQLSdYdVOyuuIoElD7-RrD6zaxVDEawzyfHYio4O-rwndNk4vEoA/viewform) vasitəsilə qeydiyyatdan keçmək mümkündür.
Qeyd edək ki, yaxın vaxtlarda analoji sinif təlimləri müxtəlif bölgələrdə də təşkil olunacaq.
Bölmənin digər xəbərləri
