AZƏRBAYCANDA QUŞLARI MÜŞAHİDƏ GÜNÜ KEÇİRİLMİŞDİR
Tədbir Qızılgölün beynəlxalq əhəmiyyətli su-bataqlıq sahəsində və Heydər Əliyev adına Dərin Özüllər Zavodunun yaxınlığında, Xəzərin sahilində təşkil edilmişdir.
Cəmiyyətin sədri, biologiya elmləri namizədi Elçin Sultanov demişdir ki, quşların köç yolunun üstündə yerləşən bu ərazi dünyanın “Qırmızı kitabı”na salınmış göydimdik ördəyin, ümumən, 8 minlik populyasiyasından 200 fərdinin qışladığı sahədir. Burada kəkilli dalğıc, kiçik ağvağ, otluq cüllütü quşlarına da rast gəlinir.
Quşları müşahidə gününü “Bird Life İnternational” təşkilatı 1993-cü ildən etibarən hər il oktyabrın birinci həftəsinin sonunda Avropa ölkələrində keçirir. Müşahidə zamanı quşların sayına və təsnifatına dair toplanılmış məlumatlar qurumun internet saytında yerləşdirilir.
Tədbirdən məqsəd ornitoloqlar üçün yeni məlumatlar əldə etmək, insanlara təbiətin gözəlliklərini göstərməklə, onlara ətraf mühiti qorumaq hissləri aşılamaqdır.
Quşlarin sayılmasında və müşahidəsində cəmiyyətin üzvləri ilə birlikdə Sumqayıt məktəbliləri və tələbələr də fəal iştirak etmişlər.
Bölmənin digər xəbərləri
