Bakı, 31 yanvar, AZƏRTAC

Bu gün Azərbaycan öz inkişaf dinamikası ilə bir çox dövlətlərə örnəkdir. Bunun əsasında ölkəmizin iqtisadi potensialı ilə yanaşı, daxili siyasətdə yürüdülən uğurlu strategiya dayanır. Ümummilli Lider Heydər Əliyevin dahiyanə dövlət quruculuğu konsepsiyasını mükəmməl şəkildə tamamlayan Prezident İlham Əliyev hər bir xalqın, dövlətin inkişafında müstəsna dərəcədə mühüm yer tutan təhsil və səhiyyə sisteminə hər zaman ciddi önəm verir.

Bunu AZƏRTAC-a açıqlamasında Milli Məclisin deputatı Rəşad Mahmudov söyləyib.

O bildirib ki, Azərbaycanın ən böyük sərvətinin məhz insan amili olduğunu əsas prinsip hesab edən dövlətimizin başçısının səhiyyə sistemində apardığı islahatlar bu sahədə özünün yüksək nəticələrini göstərməkdədir. Məhz bunun təsdiqi olaraq bu gün səhiyyəmiz bütün parametrlər üzrə dünyanın qabaqcıl ölkələri ilə rəqabət aparmaq gücündədir.

“Xüsusi olaraq qeyd olunmalıdır ki, ölkədə İcbari Tibbi Sığortanın tətbiqi və ardıcıl olaraq xidmətlər zərfinə yeni tibbi xidmətlərin əlavə edilməsi sosial məmnunluq yaratmaqla yanaşı, həm də onun sübutudur ki, dövlətimiz vətəndaşının yanındadır. Vətəndaşımızın sağlamlığı, tibbi xidmətlərə əlçatanlığın təmin olunması dövlətimiz üçün son dərəcə önəmli, vacib məsələlərdən biridir.

Səhiyyə sistemi ilə bağlı mövcud uğurların əsasında həm də mütəmadi olaraq bu sahə üzrə aparılar rəsmi müzakirələr və dinləmələr xüsusi əhəmiyyət daşıyır. Bu baxımdan Milli Məclisin Səhiyyə komitəsində “İlkin səhiyyə xidməti: mövcud vəziyyət, görülən işlər, problemlər və onların həlli yolları" mövzusunda dinləmələr də bu məqsədlə təşkil olunmuşdu. Müzakirələr şübhəsiz ki, ölkədə aparılan uğurlu səhiyyə islahatlarını, tibbi xidmətlərin keyfiyyətini daha da yaxşılaşdırmaq məqsədi daşıyır. Əlbəttə, Azərbaycanda inkişaf etmiş səhiyyə sistemi var, öz vətəndaşlarına geniş çeşiddə tibbi xidmətlər göstərir. Ölkədə dövlət və özəl xəstəxanalar, klinikalar şəbəkəsi, bir sıra ixtisaslaşmış tibb mərkəzləri mövcuddur. Səhiyyə sisteminin düzgün işləməsini və vətəndaşların keyfiyyətli tibbi xidmətə çıxışını təmin etmək üçün zəruri addımlar atılır.

Təbii ki, Azərbaycanın səhiyyə sistemi infrastruktura, avadanlıqlara və tibb işçilərinin təliminə artan investisiyalar sayəsində son on ildə əhəmiyyətli irəliləyişlər əldə edib. Dövlət kənd yerlərində də əhalinin tibbi xidmətə çıxış imkanlarını yaxşılaşdırmaq üçün səylər göstərir. Ümumiyyətlə, Azərbaycanda səhiyyə sistemi yüksəkkeyfiyyətli hesab olunur və vətəndaşlara geniş spektrli tibbi xidmətlər göstərməyə qadirdir”, - deyə deputat vurğulayıb.

Rəşad Mahmudov etiraf edib ki, ölkənin ucqar rayonlarında tibbi xidmətlərin əlçatanlığı, eləcə də xəstəxanalarda bəzi xidmətlərin keyfiyyəti ilə bağlı problemlər var. Lakin son illər Azərbaycan hökuməti səhiyyənin vəziyyətinin yaxşılaşdırılması, o cümlədən xəstəxanaların təkmilləşdirilməsi, tibbi avadanlıqların yenilənməsi və tibb kadrlarının hazırlanması istiqamətində səylər göstərib.

“Hər bir ölkədə olduğu kimi, Azərbaycanda da tibbi xidmətlərin əlçatanlığı coğrafi mövqe, maliyyə imkanları, tibbi xidmətin keyfiyyəti və infrastruktur kimi bir çox amillərdən asılıdır. Şəhərlərdə (xüsusən də Bakıda) tibbi xidmətlər daha yüksəkdir. Bu ərazilərdə yüksəkkeyfiyyətli xidmət göstərən iri tibb müəssisələri, müasir klinikalar, xəstəxanalar və ixtisaslaşmış mərkəzlər yerləşir. Bəzi kənd yerlərində və ucqar ərazilərdə bu məsələdə əlçatanlıq məhdudlaşır. Təbii ki, hökumət son illər vəziyyəti yaxşılaşdırmaq üçün vacib addımlar atır və sadaladığımız ərazilərdə hər kəsin yüksəkkeyfiyyətli tibb xidməti almaq imkanlarını genişləşdirir.

Burada daha bir maraqlı məqama da toxunmaq zəruridir. Səhiyyə xidmətlərinin əlçatanlığı xüsusilə rəqəmsallaşma və səhiyyə islahatları kontekstində mühüm mövzudur. Beynəlxalq praktika göstərir ki, tibbin rəqəmsallaşması tibbi xidmətlərin əlçatanlığını və keyfiyyətini əhəmiyyətli dərəcədə artırır. Onlayn xidmətlərin, teletibbin və süni intellektin tətbiqi xəstələrlə qarşılıqlı əlaqəni yaxşılaşdırır, tibbi qeydlərdəki səhvləri azaldır və həkimlərin səmərəliliyini artırır. Bu mənada Azərbaycanda rəqəmsal tibbi xidmətlərin də inkişafı əhalinin sağlamlığının qorunmasına öz təsirini göstərə bilər”, - deyə deputat diqqətə çatdırıb.