Azərbaycandan sonra Gürcüstanın atdığı addım AŞPA-ya böyük zərbə oldu – deputat
Bakı, 3 fevral, AZƏRTAC
Azərbaycanın bir il öncə AŞPA ilə bağlı verdiyi qərarın haqlı olduğu bir daha təsdiqləndi. Ölkəmizə qarşı qərəzli siyasət aparan və bir neçə dövlətin maraqlarına xidmət edən bu qurum yeni üzvlərə təzyiq göstərmək üçün vasitəyə çevrilib. AŞPA-nın milli maraqlara və dəyərlərə hörmət etmədən siyasi iradəni basqı altına almaq siyasəti iflasa uğrayır.
Bu fikirləri AZƏRTAC-a müsahibəsində Milli Məclisin deputatı Mehriban Vəliyeva deyib. O bildirib ki, 2024-cü ilin yanvarında etimadnaməsi ratifikasiya edilməyən Azərbaycan nümayəndə heyəti haqlı olaraq AŞPA ilə əlaqələrini dayandırdı: “AŞPA özünü qanunlardan üstün tutaraq erməni separatçıları siyasi məhbus kimi qələmə verir. Halbuki Avropanın özündə siyasi motivlərlə həbs edilən liderlər var. Fransada və İspaniyada azadlıq tələb edən azlıqlara təzyiqlər göstərilir. Lakin AŞPA bu halları görməzdən gəlir, Azərbaycanla bağlı qərəzli qərarlar qəbul edir”.
Mehriban Vəliyeva vurğulayıb ki, AŞPA eyni yanaşmanı Gürcüstana da tətbiq edir: “Gürcüstanda son seçkilərin nəticələrini həzm etməyən Avropa təkrar seçki tələbi irəli sürüb. Bu, Gürcüstanın milli iradəsinə hörmətsizlikdir. Buna görə də Gürcüstan AŞPA-dan çəkilmə qərarı verdi. Beləliklə, iki qonşu dövlətin eyni addımı atması AŞPA-nın siyasətinin iflasa uğradığını göstərir”.
Deputat bildirib ki, AŞPA-nın qərəzli siyasəti yenilik deyil. 44 günlük Vətən müharibəsindən sonra da bu qurum Azərbaycanı hədəf almağa başlamışdı: “Ermənistanın kapitulyasiya aktını imzalamasını həzm edə bilməyənlər Azərbaycanı qaralama kampaniyasına başladılar. Onların “insan haqları”, “siyasi məhbuslar” kimi ifadələri siyasi vasitədir. Qərb həqiqətə obyektiv yanaşmaq istəyirsə, niyə 30 il haqqı tapdanan azərbaycanlıların səsini eşitmədi? Azərbaycan öz müstəqil siyasətini qoruyub saxlayacaq. Bizi bu cür kampaniyalarla yolumuzdan döndərmək mümkün deyil. Biz demokratiya və insan haqları sahəsində obyektiv dialoqa daim hazırıq. Lakin bu dialoq qərəzli yanaşmalar deyil, ədalət üzərində qurulmalıdır”.
Bölmənin digər xəbərləri
