İQTİSADİYYAT
Azərbaycanın avtomobil həvəskarları ABŞ hərraclarında iştirak edə biləcəklər
Bakı, 27 iyun (AZƏRTAC). İyunun 27-də ABŞ-ın “Insurance Auto Auctions” şirkəti (IAA) Azərbaycan üzrə nümayəndəliyini ictimaiyyətə təqdim etmişdir. Şirkəti ölkənin avtomobil bazarında “IAA Motors Azerbaijan Branch” təmsil edəcəkdir.
AZƏRTAC xəbər verir ki, bu münasibətlə keçirilən tədbirdə şaxələnmiş şəbəkəyə, geniş alıcı bazası və hərrac iştirakçıları arasında ən yüksək mənfəətə malik olan IAA barədə ətraflı məlumat verilmişdir(www.iaa.az).
“Hərraclar canlı, onlayn və etibarnamə ilə keçirilir. Bu hərraclar bizim uyğunlaşdırılmış sxem müştəri bazası və müxtəlif lotlarla birgə iştirakçılara hər bir satışdan rekord mənfəət gətirir. Şirkətin 1982-ci ildə təsis olunmasından bəri, alıcılar üçün ən yaxşı qiymətlər, satıcılar üçün isə mənfəət zəmanəti verərək, işlənmiş avtonəqliyyatın hərracları sahəsində lider mövqedə qərarlaşmışıq”, - deyə IAA-nın vitse-prezidenti Den Oskarson bildirmişdir.
Azərbaycandan olan potensial alıcılar IAA-nın Bakıdakı səlahiyyətli nümayəndəliyinə - “IAA Motors Azerbaijan Branch” şirkətinə müraciət edərək, hərrac çərçivəsində sərfəli qiymətə avtomobil, xüsusi texnika, motosiklet və su nəqliyyatı vasitələrini topdan və ya pərakəndə şəkildə ala bilərlər.
“Biz Azərbaycan avtomobil həvəskarlarına yeni və işlənmiş avtomobil, motosiklet, xüsusi texnika, yük nəqliyyatı, qayıq, yaxta və katerlər təklif edirik. Bundan başqa, biz müştərilərimizə hərraclardan və dilerlərdən avtotexnikanın əldə olunmasında yardım, ABŞ-da avtomobillərin axtarışı, “CARFAX” və “Autocheck” bazaları üzrə yoxlanış, çatdırılması, Azərbaycan ərazisində gömrük prosedurları kimi xidmətləri göstərəcəyik”, - deyə nümayəndəliyin direktoru Ruslan Manquşev vurğulamışdır.
Bildirilmişdir ki, “IAA Motors Azerbaijan Branch” şirkəti alışı əsasən hərraclar vasitəsilə həyata keçirir. Alıcı avtomobili seçərək təklif etdiyi qiyməti nümayəndəliyə bildirir, bundan sonra şirkətin əməkdaşları alıcının adından hərracda iştirak edirlər. Müştərinin istəyindən asılı olaraq, hərracdan bir neçə gün öncə təcrübəli mexanik avtomobilə əsaslı surətdə baxış keçirir, hərrac başa çatdıqdan sonra şirkət 7-9 həftə ərzində avtomobili alıcıya çatdırır.
“IAA Motors Azerbaijan Branch” şirkəti geniş seçim təklif edir və alıcıya avtomobili hərrac və ya avtosalonda olduğu vəziyyətdə çatdırılmasını öhdəsinə götürür. Bundan başqa, avtomobilin komplektasiyası və yürüşünün hərrac vərəqəsində qeyd edilən məlumatla uyğunluğuna, lazımi sənədlərlə təqdim olunacağına zəmanət verilir.