“Heydər Əliyev məktəbi” layihəsi çərçivəsində ilk düşərgə fəaliyyətə başlayıb
Bakı, 2 iyun, AZƏRTAC
İyunun 1-də Yeni Azərbaycan Partiyası (YAP) Mərkəzi Aparatının və partiyanın Gəncə şəhər təşkilatının birgə təşkilatçılığı ilə “Şəhərsalma və Memarlıq İli” çərçivəsində təşkil olunan “Heydər Əliyev məktəbi” layihəsinə başlanılıb.
AZƏRTAC xəbər verir ki, əvvəlcə Gəncə şəhərində müasir müstəqil Azərbaycanın qurucusu, xalqımızın Ümummilli Lideri Heydər Əliyevin abidəsi ziyarət olunub, dahi şəxsiyyətin əziz xatirəsi ehtiramla yad edilib.
Göygöl rayonu ərazisində yerləşən Yaylaq düşərgəsində keçirilən layihənin açılış mərasimində Ulu Öndər Heydər Əliyevin, Azərbaycanın ərazi bütövlüyü və suverenliyi uğrunda canlarını qurban vermiş şəhidlərin əziz xatirəsi bir dəqiqəlik sükutla yad edilib.
YAP Gəncə şəhər təşkilatının sədri, partiyanın İdarə Heyətinin üzvü Bayram Aslanov çıxış edərək layihənin ilk gününün “Dövlət gənclər siyasəti” mövzusuna həsr olunduğunu diqqətə çatdırıb. O bildirib ki, “Heydər Əliyev məktəbi”nin təşkilində əsas məqsəd partiya üzvlərinə Heydər Əliyev irsini hərtərəfli çatdırmaqdır.
Onun sözlərinə görə, Dağlıq Şirvan və Şəki-Zaqatala regionlarından olan gənclərin iştirak etdiyi layihə çərçivəsində onların sosial fəallığının artırılması, liderlik bacarıqlarının inkişaf etdirilməsi və asudə vaxtlarının səmərəli təşkili məqsədilə dəyirmi masalar, maarifləndirici görüşlər, intellektual oyunlar, müxtəlif əyləncəli proqramlar və ekskursiyalar təşkil olunacaq.
YAP İdarə Heyətinin üzvü, Milli Məclisin Gənclər və idman komitəsinin sədri Şahin İsmayılov çıxışında Azərbaycan gənclərinin milli ruhlu vətəndaş kimi formalaşmasında Ümummilli Lider Heydər Əliyevin misilsiz xidmətlərindən bəhs edib.
O qeyd edib ki, Ulu Öndərin əsasını qoyduğu dövlət gənclər siyasəti uğurlu inkişaf konsepsiyasının əsas dayağına çevrilib və Prezident İlham Əliyev tərəfindən müvəffəqiyyətlə davam etdirilir.
Şahin İsmayılov bildirib ki, Ümummilli Lider Heydər Əliyevin ideyaları əsasında Prezident İlham Əliyevin rəhbərliyi dövründə yetişən gənclərin qəhrəmanlığı nəticəsində Azərbaycanın ərazi bütövlüyü və suverenliyi bərpa olunub. O vurğulayıb ki, bu gün ölkə gəncləri siyasi, iqtisadi, elm, innovasiya və digər sahələrdə Azərbaycanı beynəlxalq arenada layiqincə təmsil edir, Dövlət Bayrağımızı daha yüksəklərə qaldırırlar.
Gəncə Şəhər İcra Hakimiyyətinin başçısı Niyazi Bayramov çıxışında bildirib ki, Ulu Öndər Heydər Əliyevin uğurlu gənclər siyasəti nəticəsində ölkədə vətənpərvər, milli dəyərlərə bağlı və müasir düşüncəli gənc nəsil formalaşıb. Onun sözlərinə görə, müasir gənclər həm elmi biliklərə yiyələnir, həm də milli-mənəvi dəyərlərə sadiqliyini qoruyurlar.
Göygöl Rayon İcra Hakimiyyətinin başçısı Vüqar Novruzov isə çıxışında Azərbaycanın müstəqillik tarixində müstəsna xidmətləri olan Ulu Öndər Heydər Əliyevin zəngin siyasi irsindən danışıb. O qeyd edib ki, Prezident İlham Əliyevin rəhbərliyi ilə ölkəmiz bütün sahələrdə mühüm nailiyyətlər əldə edib, gənclər üçün geniş imkanlar yaradılıb.
YAP Mərkəzi Aparatının Təşkilat şöbəsi müdirinin müavini Rafael Gülməmmədov bildirib ki, Ümummilli Lider Heydər Əliyevin qurucusu olduğu Yeni Azərbaycan Partiyası müstəqillik yolu ilə inamla irəliləyən Azərbaycanın hərtərəfli inkişafına mühüm töhfələr verir. Onun sözlərinə görə, Prezident İlham Əliyevin uğurla davam etdirdiyi siyasi xətt nəticəsində hazırda YAP sıralarında on minlərlə gənc təmsil olunur.
Tədbirdə çıxış edən gənc partiya fəalları Nazpəri Rzayeva və Nuranə Mirzəyeva da gənclərin Heydər Əliyevin zəngin siyasi və mənəvi irsindən bəhrələnmələrinin onların vətənpərvər və məsuliyyətli vətəndaş kimi formalaşmasında mühüm rol oynadığını bildiriblər.
Açılış mərasimindən sonra gənclər arasında komanda şəklində idman oyunları keçirilib, əyləncə proqramları təşkil olunub.
Bölmənin digər xəbərləri
