SOCAR: Təbii qaza tələbat hələ uzun müddət davam edəcək
Bakı, 2 iyun, AZƏRTAC
Azərbaycanda xarici sərmayədarları cəlb etməklə Günəş və küləkdən enerji alınması istiqamətində işlər davam edir. Bunun üçün Azərbaycanın böyük coğrafi potensialı var. Bununla yanaşı Azərbaycan beynəlxalq əhəmiyyət daşıyan yaşıl enerji layihələrində də aparıcı rol oynayır.
AZƏRTAC xəbər verir ki, bu sözləri Bakıda keçirilən 31-ci Beynəlxalq Xəzər Neft və Qaz Sərgisi çərçivəsində təşkil olunan “Cənub Qaz Dəhlizi: Enerji təhlükəsizliyi və regional əməkdaşlıq” mövzusundakı panel iclasında çıxışı zamanı SOCAR-ın Qaz marketinqi departamentinin rəisi Nəriman Şahsuvarov deyib.
Onun sözlərinə görə, “Xəzər-Qara dəniz Yaşıl Enerji Dəhlizi”nin formalaşdırmasında Azərbaycan həm də tranzit funksiyasını yerinə yetirir.
“Lakin bütün bunlara baxmayaraq təbii qaza olan tələbat uzun müddət qalacaq, təbii qazın ixracı, diversifikasiyası, bazarların öyrənilməsi, çeviklik və marşrutlar həmişə maraq doğuracaq. Bu gün Avropanın alternativ enerjiyə tələbatı artır. Onlar ekoloji təmiz enerjidən istifadə etməyə üstünlük verirlər. Bu, yaxşı haldır. Lakin bununla yanaşı təbii qaz idxalını da artırmağa çalışırlar. Bu isə bir daha təbii qaz tələbatının hələ çox uzun müddət davam edəcəyini deməyə əsas verir”, - deyə N. Şahsuvarov vurğulayıb.
Bölmənin digər xəbərləri
