Assosiasiya sədri: Yeni dəstək mexanizmləri quşçuluq sənayesinin inkişafını sürətləndirəcək
Bakı, 2 iyun, AZƏRTAC
Prezident İlham Əliyevin sədrliyi ilə keçirilən müşavirədə quşçuluq sektoruna dair müəyyən edilən hədəflər ölkənin ərzaq təhlükəsizliyinin gücləndirilməsi baxımından olduqca mühüm əhəmiyyət daşıyır. Yeni müasir quşçuluq komplekslərinin yaradılması, mövcud təsərrüfatların modernləşdirilməsi, damazlıq bazasının gücləndirilməsi və istehsal xərclərinin azaldılmasına yönəlmiş dövlət dəstəyi mexanizmləri sektorun davamlı inkişafına ciddi təkan verəcək.
AZƏRTAC xəbər verir ki, bu fikirləri Quş əti və Yumurta İstehsalçıları Assosiasiyasının sədri Mürvət Həsənli Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026-2030-cu illər üçün Dövlət Proqramında quşçuluq sektorunun inkişafı ilə bağlı nəzərdə tutulan hədəfləri şərh edərkən bildirib.
Onun sözlərinə görə, kommunal xidmətlərə qoşulma xərclərinin subsidiyalaşdırılması və torpaq təyinatı ilə bağlı məsələlərin həlli yeni investisiyaların cəlb olunmasını sürətləndirəcək, istehsalçıların maliyyə yükünü azaldacaq.
“Müasir texnologiyaların tətbiqi məhsuldarlığın yüksəlməsinə, yemdən istifadə səmərəliliyinin artmasına və istehsal itkilərinin azalmasına şərait yaradacaq. 2030-cu ilədək istehsalın təxminən 30 faiz artırılması hədəfi real və əldəolunandır. Bu artım ölkənin quş əti ilə özünütəminetmə səviyyəsinin yüksəlməsinə, idxaldan asılılığın azalmasına və daxili bazarın daha etibarlı şəkildə təmin olunmasına imkan verəcək. Bununla yanaşı, istehsal həcmlərinin artması qiymət sabitliyinin qorunmasına və gələcəkdə ixrac potensialının formalaşmasına da müsbət təsir göstərə bilər”, – deyə Mürvət Həsənli vurğulayıb.
Assosiasiya sədri hesab edir ki, dövlətin müəyyən etdiyi bu istiqamətlər quşçuluq sənayesinin rəqabət qabiliyyətinin artırılmasına, müasir beynəlxalq standartlara uyğun istehsalın genişlənməsinə və ölkəmizin ərzaq təhlükəsizliyinin daha da möhkəmləndirilməsinə xidmət edəcək.
Müxbir - Səbinə Əlizadə
Bölmənin digər xəbərləri
