Macarıstanın yeni Baş naziri Almaniyaya səfər edib
Berlin, 2 iyun, AZƏRTAC
Macarıstanın yeni Baş naziri Peter Macyar Almaniyaya səfər edib.
AZƏRTAC xəbər verir ki, Berlində yüksək səviyyədə qarşılanan Baş nazirin Almaniya Kansleri Fridrix Merts ilə görüşündə ikitərəfli münasibətlər, Avropa siyasəti sahəsində əməkdaşlıq, Ukraynaya dəstəyin davam etdirilməsi, eləcə də Avratlantik məkanın təhlükəsizliyi məsələləri müzakirə olunub.
Hər iki lider görüşdən sonra mətbuat konfransında çıxış ediblər. “Avropanın azadlığı və birliyi yenidən ciddi təhlükə qarşısındadır. Rusiyanın NATO-ya yaratdığı təhdid və Ukraynaya qarşı apardığı müharibə hamımız üçün fundamental çağırışdır”, - deyən Kansler rəsmi Budapeştin ilk növbədə, Ukraynadakı macar azlığının hüquqları kimi ikitərəfli məsələləri həll etmək istəyini anlayışla qaşrıladıqlarını ifadə edib. F.Merts bildirib ki, bu məsələ Avropanın Ukraynaya dəstəyi hesabına olmamalı və Avropanı Ukrayna ilə üzvlük danışıqlarının ilk fəslinin rəsmən açılması məqsədindən uzaqlaşdırmamalıdır.
Macarıstanı Avropa daxili bazarının və rəqabət qabiliyyətinin gücləndirilməsinə yönəlmiş prosesdə fəal iştirakının önəmini qeyd edən F.Merts bildirib: “Bizə suveren və iqtisadi cəhətdən güclü Avropa lazımdır. Bu xüsusilə çoxillik maliyyə çərçivəsinin islahatı üzərində işlədiyimiz bir vaxtda böyük əhəmiyyət daşıyır. Biz hələ bu il Avropa İttifaqının gələcək maliyyə siyasətinin əsaslarını müəyyənləşdirmək istəyirik. Bunun üçün isə həm rəqabət qabiliyyətinə, həm də müdafiə sahəsinə investisiyalar tələb olunur”.
P.Macyar isə Almaniyanın həm ixrac, həm də idxal baxımından Macarıstanın ən vacib xarici investoru olduğunu vurğulayaraq, iki ölkə arasında ticarət dövriyyəsinin 67 milyard avro təşkil etdiyini və ölkəsində Almaniya sərmayəsinin durmadan artdığını bildirib.
O, Ukrayna ilə Macarıstan arasında macar icmasının dil, mədəniyyət və təhsil hüquqlarına aid danışıqların bu həftə yekunlaşdırıla biləcəyini vurğulayaraq, prosesin kifayət qədər müsbət məcrada irəlilədiyini qeyd edib: “Buradan bir daha bəyan etmək istəyirəm ki, əgər fundamental insan hüquqları ilə bağlı prinsipial razılıq əldə olunarsa, gələn həftənin əvvəlində Ukrayna Prezidenti Volodimir Zelenski ilə görüşməyə və danışıqlar aparmağa hazıram”.
P.Macyar Avropa İttifaqı və NATO ilə yanaşı, Vişeqrad Qrupu (V4) çərçivəsində əməkdaşlığın Macarıstanın xarici siyasətində mühüm prioritetlərdən olduğunu qeyd edərək, iyulun 23-də Budapeştdə Vişeqrad Qrupu ölkələrinin Sammitində bu formatın genişləndirilməsini təklif edəcəyini bildirib: “İstərdik ki, Almaniya və Avstriya, həmçinin Xorvatiya, Sloveniya və Rumıniya da bu dialoqa qoşulsunlar və birlikdə güclü Mərkəzi Avropanın formalaşdırılması istiqamətində çalışaq. Bu isə infrastruktur, iqtisadiyyat və mədəniyyət sahələrində daha sıx əməkdaşlıq deməkdir”.
Bölmənin digər xəbərləri
