Azərbaycanın çağdaş tarixinin böyük bir dövrü Ümummilli Lider Heydər Əliyevin adı ilə bağlıdır
Qax, 4 oktyabr, Mustafa Dadaşov, AZƏRTAC
Xalq da, dövlət də insan kimidir, yaddaşı ilə yaşayır. Ulu Öndər Heydər Əliyev milli dövlətçiliyimizin tarixi yaddaşıdır. Müasir Azərbaycanın memarı kimi tarixə yazılan bu qüdrətli şəxsiyyət bu gün bütün dünyada Azərbaycan xalqının Ulu Öndəri olaraq qəbul edilir. Bu böyük şəxsiyyətin, qüdrətli dövlət xadiminin iradəsi, cəsarəti, əyilməzliyi, müdrikliyi sayəsində dövlətimiz həqiqi müstəqilliyə nail olub. Hər bir azərbaycanlının varlığı ilə qürur duyduğu doğma Vətənimizin dirçəlişi, tərəqqisi adına nə varsa, ömrünün 50 ilindən çoxunu milli dövlətçilik tariximizə bağışlayan Ulu Öndərin adı ilə bağlıdır.
AZƏRTAC-ın bölgə müxbiri xəbər verir ki, bu fikirlər Ümummilli Lider Heydər Əliyevin anadan olmasının 100 illiyi münasibətilə oktyabrın 4-də Yeni Azərbaycan Partiyası (YAP) Qax rayon təşkilatı tərəfindən keçirilən konfransda səsləndirilib.
YAP rayon təşkilatının fəalları və tədbirin iştirakçıları əvvəlcə Ümummilli Lider Heydər Əliyevin Qax şəhərinin mərkəzindəki abidəsi önünə gül dəstələri qoyub, xatirəsini ehtiramla yad ediblər. Sonra Şəhidlər xiyabanı ziyarət olunub.
Konfrans Azərbaycan Respublikasının Dövlət Himninin səsləndirilməsi ilə başlayıb. Ulu Öndərin və Azərbaycanın ərazi bütövlüyü uğrunda canlarından keçmiş şəhidlərin əziz xatirəsi bir dəqiqəlik sükutla yad edilib.
Sonra Heydər Əliyevə həsr edilmiş videoçarx nümayiş olunub.
Konfransda YAP Qax rayon təşkilatının sədri Natiq Allahverdiyevin “Heydər Əliyev Yeni Azərbaycan Partiyasının yaradıcısıdır” mövzusunda məruzəsi dinlənilib. Bildirilib ki, Azərbaycanın çağdaş tarixinin böyük bir dövrü Ümummilli Lider Heydər Əliyevin adı ilə bağlıdır. Müstəqilliyin ilk illərində xalqımız qarşıya çıxan çətin problemlərin həllini, xilaskarlıq missiyasını Heydər Əliyevdə görürdü. Ümummilli Lider xilaskarlıq missiyasının öhdəsindən layiqincə gəldi, ölkəmizi xaos və anarxiyadan qurtardı. Ulu Öndər müasir müstəqil Azərbaycan dövlətini yaratdı və onun bütün sahələrdə sarsılmaz təməllərini müəyyənləşdirdi. Azərbaycanda müstəqil dövlət təsisatlarının qurulması, beynəlxalq normalara söykənən demokratik, hüquqi dövlətin yaranması, milli, mənəvi və əxlaqi dəyərlərimizin qorunub saxlanması, bu dəyərlərin ümumbəşəri ideyalarla daha da zənginləşdirilməsi, ilk milli Konstitusiyanın qəbul edilməsi, vətəndaş cəmiyyətinin formalaşdırılması və yeni iqtisadi kursun müəyyənləşdirilməsi prosesinin müvəffəqiyyətli həlli məhz Ümummilli Lider Heydər Əliyevin xidmətləridir.
Diqqətə çatdırılıb ki, Ulu Öndərin siyasi hakimiyyətinin Naxçıvan mərhələsində atdığı cəsarətli üç addım - Azərbaycan Bayrağının dövlət rəmzi olaraq Naxçıvan Ali Məclisində qaldırılması, Dünya Azərbaycanlılarının Həmrəyliyi Gününün təsis edilməsi və Yeni Azərbaycan Partiyasının yaradılması hər bir azərbaycanlı üçün qiymətlidir. Xalqımızın birliyinə, bütövlüyünə, hesablanan bu müdrik qərarlar çoxmillətli məmləkətimizi məhz bir bayraq altında, bir partiya - Yeni Azərbaycan Partiyasının ətrafında birləşdirdi. Bu gün 700 mindən çox vətəndaşın Yeni Azərbaycan Partiyası ətrafında Azərbaycan naminə əqidə, məslək birliyinə tapınması, siyasi həmrəyliyə gəlməsi, dünyaya səpələnən 50 milyona yaxın soydaşımızın Azərbaycanı doğma diyarı, Ana Vətəni kimi sevməsi məhz həmin müqəddəs amalla bağlıdır.
Gənc Heydərçilər konfrans iştirakçılarına təbriklərini çatdırıblar.
Konfransda Qax Rayon İcra Hakimiyyətinin başçısı Musa Şəkiliyev, YAP İdarə Heyətinin üzvü, Ailə, Qadın və Uşaq Problemləri üzrə Dövlət Komitəsinin sədr müavini Aynur Sofiyeva, YAP Təftiş Komissiyasının üzvü, Milli Məclisin deputatı Vüqar İsgəndərov, Qax rayonu üzrə gənclər və idman sektorunun müdiri Elvin Həsilov, Vətən müharibəsi iştirakçısı Təbriz Cavadov çıxışlarında Azərbaycan dövlətçiliyinin formalaşmasında, ictimai-siyasi sabitliyin bərqərar olmasında, ölkəmizin beynəlxalq aləmdə nüfuzunun artmasında Yeni Azərbaycan Partiyasının mühüm rolundan bəhs ediblər. Vurğulanıb ki, bu gün müstəqil Azərbaycan Ümummilli Lider Heydər Əliyevin ideyaları əsasında inkişaf edir. Ulu Öndərin siyasi xəttini uğurla davam etdirən Prezident İlham Əliyevin liderliyi ilə Azərbaycan qarşıya qoyduğu mühüm hədəflərə nail oldu. Azərbaycan Ordusu 44 günlük Vətən müharibəsində Müzəffər Ali Baş Komandan İlham Əliyevin rəhbərliyi ilə möhtəşəm Qələbə qazandı, işğal altındakı torpaqlarımız düşməndən azad olundu. Qüdrətli Ordumuz bu il sentyabrın 19-20-də antiterror tədbirləri ilə tarixi missiyanı həyata keçirdi və ermənilərin 200 ildən çox dövrü əhatə edən planları 24 saatdan az müddətdə darmadağın edildi.
Sonda partiya sıralarına yeni daxil olan gənclərə üzvlük vəsiqələri, təşkilatın fəal üzvlərinə fəxri fərmanlar təqdim olunub.
Bölmənin digər xəbərləri
